އެއް ވޯޓުން އދ އަނެއްކާވެސް ފެއިލް ވެއްޖެ: ރާއްޖެ
ހަސަން ހަލީމް
02 މެއި 2024 - 11:54
0 comments
އދގެ އާންމު ބައްދަލުވުމުގައި ދިވެހި ސަރުކާރުގެ ފަރާތުން ހައުސިން މިނިސްޓަރު ޑރ. ހައިދަރު ވާހަކަދައްކަވަނީ
ފަލަސްތީން ރައްޔިތުންގެ ހައްގުތައް ކަށަވަރުކޮށްދީ ފަލަސްތީނަށް މިނިވަން ދައުލަތެއްގެ ދަރަޖަ ހޯދައިނުދެވި އދ.ގެ ސަލާމަތީ މަޖިލިސް އަނެއްކާވެސް ފެއިލްވެއްޖެ ކަމަށް ބުނެ އދ. ގައި ބައެއް ގައުމުތަކަށް އޮންނަ ވީޓޯ ކުރުމުގެ ބާރަށް ދިވެހި ސަރުކާރުން ވަރަށް ބޮޑަށް ފާޑު ކިޔައިފި އެވެ.އދ. ގެ އާންމު މަޖިލީހުގެ 78 ވަނަ ބައްދަލުވުމުގައި ރާއްޖޭގެ ފަރާތުން އިއްވި ބަޔާނުގައި ހައުސިން މިނިސްޓަރު ޑރ. އަލީ ހައިދަރު ވިދާޅުވީ އދ. ގެ އެންމެ ބާރުގަދަ ގުނަން ކަމަށްވާ، ސަލާމަތީ މަޖިލީހުން ފަލަސްތީނުގައި ހައްގުގައި ފިޔަވަޅެއް އެޅުމަށް، އެންމެ ގައުމެއްގެ ވޯޓުން ހުއްޓުވޭނެ މަގު އޮތުމަކީ ލަދުވެތިކަމެއް ކަމަށެވެ."ފަލަސްތީނުން އިންސާފަށް ހަރުއަޑުން ގޮވާލައި ގޮވާލުން އެންމެ ވޯޓަކުން އަޑުނީވޭ ކަމަށް ހެދުމަކީ ލަދުވަތި ކަމެއް،" ހައިދަރު ވިދާޅުވި އެވެ.ހައިދަރު ވިދާޅުވީ އިޒްރޭލުގެ ޖަރީމާތައް މިއަދު އާދައިގެ އާންމު ކަމަކަށް ވެގެން ގޮސްފައިވާ ކަމަށެވެ. އަދި އިޒްރޭލާ ދެކޮޅު ގަރާރުތަކާއި މައްސަލަތައް އދގެ ސަލާމަތީ މަޖިލީހުން ވީޓޯ ކުރަމުންދާތީ އދގައި އޮންނަ ވީޓޯގެ ބާރަކީ އިޒްރޭލުން އަނިޔާވެރިކަން އިސްކުރުމަށް ބޭނުންކުރާ ހަތިޔާރަކަށް ހަދާފައިވާ ކަމަށްވެސް ވިދާޅުވި އެވެ.
މިނިސްޓަރު ހައިދަރު ހަރުއަޑުން އދއަށް ގޮވާލެއްވީ އިޒްރޭލުގެ ލާއިންސާނީ އަމަލުތަކާ ގުޅިގެން ރެފިއުޖީންގެ ގޮތުގައި ތިބި ފަލަސްތީން ރައްޔިތުންގެ ބިންތައް އެމީހުންނަށް އަނބުރާ ހޯދައިދިނުމަށެވެ.
ފަލަސްތީނަކީ އދގައި މިނިވަން މުސްތަގިއްލު ގައުމެއްގެ ދަރަޖަ އަދި އޮތް ގައުމެއް ނޫނެވެ. އދގެ އޮބްޒާވަރެއްގެ ދަރަޖަވެސް ފަލަސްތީނަށް ދީފައިވަނީ 2012 ވަނަ އަހަރު އެވެ. ފަލަސްތީނަށް މިނިވަން ދައުލަތެއްގެ ދަރަޖަ ހޯދައިދިނުމަށް އދގެ އާންމު މަޖިލީހަށް ހުށަހެޅުމަށް ތައްޔާރުކުރި މައްސަލަ މިދިޔަ މަހުގެ ތެރޭގައި އެމެރިކާ އިން ވަނީ ސަލާމަތީ މަޖިލީހުގައި އެ ގައުމަށް އޮންނަ ވީޓޯގެ ބާރު ބޭނުންކޮށްގެން މައްސަލަ ބޭރުކޮށްލާފަ އެވެ.
ފަލަސްތީނަށް މިނިވަން ދައުލަތެއްގެ ދަރަޖަ ދިނުމަށް އދގެ ސަލާމަތީ މަޖިލީހުގެ ތެރެއިން އެންމެ ބޮޑަށް ހުރަސް އަޅަނީ އިޒްރޭލަށް އެންމެ ބޮޑަށް ވާގިވެރިވާ އެމެރިކާ، އިނގިރޭސިވިލާތުންނެވެ. ބައެއް ފަހަރު ފްރާންސުންވެެސް މި ދެ ގައުމާ ބައިވެރިވެ އެވެ. މިތިން ގައުމުގެ އިތުރުން އދގައި ވީޓޯގެ ބާރު ލިބިފައިވަނީ ޗައިނާ އަދި ރަޝިއާ އަށެވެ.
ދިވެހިރާއްޖެ އަކީ ފަލަސްތީން ރައްޔިތުންގެ ހައްގުތައް ކަށަވަރުކޮށްދީ ފަލަސްތީނަށް މިނިވަން ދައުލަތެއްގެ ދަރަޖަ ދިނުމަށް ބައިނަލްއަގްވާމީ މަޝްރަހްގައި އެންމެ ވަރުގަދައަށް ވަކާލާތު ކުރާ ގައުމުތަކުގެ ތެރޭގައި ހިމެނޭ ގައުމެކެވެ. އަދި ދިވެހިންނަކީ ފަލަސްތީނަށް އެހީތެރިކަން ބޭނުންވާ ކޮންމެ ފަހަރަކުވެސް ވަރަށް ދީލަތި ކަމާއެކު ފަލަސްތީނަށް އެހީވާ ރައްޔިތުންތަކެއް ތަކެކެވެ. ފަލަސްތީނަށް އދ.ގެ އޮބްޒާވަރެއްގެ ދަރަޖަ ވެސް ލިބުނީ 2012 ވަނަ އަހަރު އެވެ. ފަލަސްތީނުން ވަނީ ފުރިހަމަ މެމްބަރުކަން ހޯދުމަށް އަހަރުތަކެއް ވަންދެން ލޮބީކޮށްފަ އެވެ. އެއީ ފުރިހަމަ މެންބަރުކަން ހޯދަން 2011 ވަނަ އަހަރު ހުށަހެޅުމުން އެކަމާ މެދު މިހާތަނަށް ވެސް އެއްވެސް ނިންމުމެއް ނުނިންމާ ބޭއްވުމަށް ފަހު އެވެ.
ކިޔުންތެރިންގެ ޝުއޫރު