ފެންނަނީ ޑިޕްލޮމަސީގައި ސަރުކާރުގެ ތަޖުރިބާ ނެތްކަން: ޝާހިދު

އަހުމަދު ނިހާން

08 އޮކްޓޫބަރ 2024 - 16:14

0 comments

ފެންނަމުންދަނީ ޑިޕްލޮމަސީގައި ޅަ އަދި ތަޖުރިބާ ނެތް ސަރުކާރެއް ކަމަށް ވިދާޅުވެ ރައީސް ޑރ. މުހައްމަދު މުއިއްޒުގެ ސަރުކާރަށް އެމްޑީޕީގެ ރައީސް އަބްދުﷲ ޝާހިދު ފާޑުވިދާޅުވެއްޖެ އެވެ.

ޝާހިދު އެފަދައިން ވިދާޅުވިއިރު، ރައީސް ޑރ. މުހައްމަދު މުއިއްޒާއި ސަރުކާރުގެ ވަފްދެއް މިވަގުތު ގެންދަވަނީ އަވައްޓެރި އިންޑިއާއަށް ފުރަމާނަ ދަތުރުފުޅެއް ކުރައްވަމުންނެވެ. އެ ދަތުރުފުޅަކީ އިންޑިއާގެ ރައީސް ދުރްޕަތީ މުރްމޫގެ ދައުވަތަކަށް ކުރައްވާ ދަތުރުފުޅެކެވެ.

ޝާހިދު "އެކްސް"ގައި ކުރެއްވި ޕޯސްޓެއްގައި ވިދާޅުވީ ރާއްޖެ އާއި އިންޑިއާގެ ދުވަސްވީ ގާތް ގުޅުން އަލުން ބަދަހިވާ މަންޒަރު ފެނުމުން ވަރަށް އުފާ ކުރައްވާ ކަމަށެވެެ. އިންޑިއާ އިން އަބަދުވެސް ދިވެހިންނާ އެކުގައި ތިބި ކަމަށްޓަކައި ޝާހިދު ވަނީ އެ ގައުމަށް ޝުކުރު އަދާކުރައްވައިފަ އެވެ.

ޝާހިދު ވިދާޅުވީ ރާއްޖެއާ އެންމެ ގާތް ރަހުމަތްތެރިޔާގެ ގޮތުގައި އަބަދުވެސް އޮންނަ އިންޑިއާއާއެކު ގުޅުން ދެމިއޮންނާނެ ކަމަށް އުއްމީދުކުރައްވާ ކަމަށެވެ.

އަދި ކުރީގެ ރައީސް އިބްރާހީމް މުހައްމަދު ޞާލިޙުގެ ވެރިކަމުގައި ފައްޓަވާފައިވާ މަޝްރޫއުތައް ކާމިޔާބުވެ، ކުރިއަށް ދާތަން ފެންނާތީ އުފާކުރައްވާ ކަމަށް ވެސް ޝާހިދު ވިދާޅުވިއެވެ.

ޝާހިދު ވަނީ ދިވެހިންނާއެކު ސާބިތުވެ ދެމިއޮތީތީވެ އިންޑިއާއަށް ޝުކުރު ދަންނަވާފަ އެވެ. އަދި ދެ ގައުމުގެ ދެމެދުގައި މިހާރު އޮތް ގާތް ގުޅުން ކުރިއަށް އޮތް ތަނުގައިވެސް ދެމިއޮންނާނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ.