ރާއްޖެއާ އެކު އޮތް ޒަމާންވީ ގުޅުން އިތުރަށް ވަރުގަދަކުރަން ތައްޔާރު: ޖަޕާނުގެ ބޮޑުވަޒީރު

އަހުމަދު ނިހާން

09 އޮކްޓޫބަރ 2024 - 17:31

0 comments

ޖަޕާނުގެ ބޮޑުވަޒީރު ޝިގެރު އިޝިބާ - ފޮޓޯ/ އޭޕީ

ރައީސް މުހައްމަދު މުއިއްޒަށް ޝުކުރު އަދާކުރެއްވުމާއެކު ރާއްޖެއާއި ޖަޕާނުގެ ގުޅުން އިތުރަށް ބަދަހިކުރައްވާނެ ކަމުގެ ޔަގީންކަން އެ ގައުމުގެ އައު ބޮޑުވަޒީރު ޝިގެރޫ އިޝިބާ ދެއްވައިފި އެވެ.

މި މަހުގެ އެއްވަނަ ދުވަހު، ޖަޕާނުގެ ބޮޑުވަޒީރުކަމާ ހަވާލުވެވަޑައިގެން ޝިގެރޫ އިޝިބާ އެފަދައިން ވިދާޅުވީ، ރައީސް ޑރ. މުހައްމަދު މުއިއްޒު މަރުހަބާ ވިދާޅުވެ، އެކްސްގައި ކުރެއްވި ޕޯސްޓަކާ ގުޅިގެންނެވެ.

އެ މަނިކުފާނު ވަނީ ޝިގެރޫ އިޝިބާގެ ބޮޑު ވަޒީރުކަމުގައި އެ ގައުމަށް ކާމިޔާބާއި ކުރިއެރުމަށް އެދިވަޑައިގެންފަ އެވެ. އަދި، ރާއްޖެއާއި ޖަޕާނާ ދެމެދު އޮތް ޒަމާންވީ ރަޙުމަތްތެރިކަމުގެ ގުޅުން އިތުރަށް ބަދަހިކުރުމަށް ދިވެހި ސަރުކާރާ އެކު މަސައްކަތް ކުރައްވަން އުއްމީދުކުރައްވާ ކަމަށް އެ މަނިކުފާނު ވިދާޅުވި އެވެ.

އެމަނިކުފާނުގެ މަރުހަބާގެ މެސެޖާ ގުޅިގެން ބޮޑުވަޒީރު އިޝިބާ މިއަދު އެކްސްގައި ކުރެއްވި ޕޯސްޓުގައި ރައީސް ވިދާޅުވި ހެޔޮ ބަސްފުޅުތަކަށްޓަކައި ޝުކުރު އަދާކުރެއްވި އެވެ. އަދި ރައީސާއެކު ގާތުން މަސައްކަތްކުރައްވާނެ ކަމުގައި ވިދާޅުވި އެވެ.

އެގޮތުން ހުޅުވާލެވިފަައިވާ މިނިވަން އިންޑިޔާ ޕެސިފިކް ސަރަހައްދެއް ކަށަަވަރުކުރުމަށް ދިވެހިރާއްޖެއާއި ޖަޕާނުގެ މެދުގައި އޮތް ދުވަސްވީ ގުޅުން އިތުރަށް ބަދަހިކުރެއްވުމަށް މަސައްކަތްކުރައްވާނެ ކަމުގައި ބޮޑުވަޒީރު އިޝިބާ ވިދާޅުވި އެވެ.