ކޫއްޑޫ އެއާޕޯޓް އަލުން އޮޕަރޭޝަނަށް

ހަސަން ހަލީމް

29 އޮކްޓޫބަރ 2024 - 13:08

0 comments

ގއ.ކޫއްޑޫ އެއާޕޯޓުގެ ރަންވޭ މަރާމާތުކޮށް ނިންމައި އަލުން ދަތުރުތައް ފަށައިފި އެވެ.

އެގޮތުން މިއަދު ހެނފުނު އެތަނަށް ވަނީ މޯލްޑިވިއަންގެ ބޯޓެއް ޖައްސައިފަ އެވެ.

ކޫއްޑޫ އެއާޕޯޓަށް ވަގުތީ ގޮތުން ގައުމީ އެއާލައިނުން ދަތުރުތައް މެދުކަނޑާލީ މި މަހުގެ 10 އިން ފެށިގެންނެވެ. އެއީ ރަންވޭގެ ހާލަތު ދަށްވުމާ ގުޅިެންނެވެ.

އެކަމާ ގުޅިގެން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ރަންވޭ ވަރަށް އަވަހަށް މަރާމާތުކޮށް ނިންމައި ކޫއްޑޫ އެއާޕޯޓް އަލުން އޮޕަރޭޝަނަށް ގެންނާނެ ކަމަށެވެ.

މޯލްޑިވިއަނުން ބުނީ އެއާޕޯޓުގެ މަރާމާތަށްފަހު މިހާރު އަނެއްކާ ވެސް ކޫއްޑޫއަށް ދަތުރުތައް ފަށާފައިވާ ކަމަށެވެ. ނަމަވެސް މިހާރު ކުރަމުން އަންނަނީ ކޮންމެ ހަފްތާއަކު ދެ ދަތުރުކަމަށެވެ.

"ޔެސް އަޅުގަނޑުމެން މިހާރު ދަތުރުތައް ފަށައިފިން. އެކަމު އަދި މި އިންނަނީ ވީކްލީ ޓޫ ފްލައިޓްސް. އެކަމު ހަމަ ކުރީގެ ގޮތަށް ނޯމަލްކޮށް ދަތުރުތައް ފެށޭނެ ވަރަށް އަވަހަށް،" މޯލްޑިވިއަންގެ އޮފިޝަލަކު ބުންޏެވެ.

ކޫއްޑޫ އެއާޕޯޓު ތަރައްގީ ކުރީ 2011 ވަނަ އަހަރު އޭރުގެ ސަރުކާރުން ދިގުރަށް ކިޔާ ފަޅު ރަށެއްގައި ރިސޯޓެއް ތަރައްގީކުރުމަށް 50 އަހަރަށް ބޮނަވެއްޗާ މޯލްޑިވްސްއާ ހަވާލުކޮށްގެންއެވެ.

ފަންސަވީސް އަހަރަށް އެއާޕޯޓު ހިންގައި ތަރައްގީ ކުރުމަށް 2012 ވަނަ އަހަރު ޑރ. މުހައްމަދު ވަހީދު ހަސަން މަނިކުގެ ސަރުކާރުން ހަވާލުކޮށްފައިވަނީ، ސިންގަޕޫރުގެ ކިއޮން ހޮންގް ކޮންސްޓްރަކްޝަނާއި އެލިސަން ކޮންސްޓްރަކްޝަން ކުންފުނި ގުޅިގެން އުފައްދާފައިވާ ކޭއެޗްއޭ ކޮންސްޓްރަކްޝަންއާއެވެ.