ޖެނިފާއަށް ވަޒީފާދޭން އެންގުމުން އައިއޭއެސް އިން ހައި ކޯޓަށް

އަލީ ރާޒީ

19 ނޮވެމްބަރ 2024 - 15:19

0 comments

ގައުމީ އެއާލައިން ހިންގާ ކުންފުނި -- އައިލެންޑް އޭވިއޭޝަން ސާވިސް (އައިއޭއެސް)ގެ ޑެޕިއުޓީ މެނޭޖިން ޑިރެކްޓަރުގެ މަގާމުން އައިޝަތު ޖެނިފާ ވަކިކުރީ ގާނޫނާ ހިލާފަށް ކަމަށް ނިންމައި، އޭނާ އަށް ވަޒީފާ އަލުން ދޭން ވަޒީފާއާ ބެހޭ ޓްރައިބިއުނަލުން ކުރި ހުކުމް، އައިލެންޑް އޭވިއޭޝަނުން ހައިކޯޓުގައި އިސްތިއުނާފު ކޮށްފި އެވެ.

އައިއޭއެސްގެ ޑީއެމްޑީގެ މަގާމަށް ޖެނިފާ އައްޔަންކުރީ މިދިޔަ ސަރުކާރުގައި، 28 ޑިސެމްބަރު 2018ގަ އެވެ. އޭނާ މަގާމުން ވަކިކުރީ މި ސަރުކާރު އައުމަށް ފަހު، 28 ޑިސެމްބަރު 2023ގައި ބޭއްވި ބޯޑު ބައްދަލުުވުމަކުން އެގޮތަށް ނިންމައިގެނެވެ.

އައިއޭއެސްގެ ޑީއެމްޑީގެ މަގާމުގެ މުސާރައިގެ ގޮތުގައި ޖެނިފާއަށް މަހަކު 34،304ރ. ލިބިވަޑައިގެންނެވިއިރު، އެ މަގާމުގެ އެހެން އިނާޔަތްތަކުގެ ގޮތުގައި 21،867ރ.އޭނާއަށް ދިނެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ޖެނިފާ އައްޔަންކުރީ ޑިސެމްބަރު 2018 ގަ އެވެ. އޭނާ މިދިޔަ ޖެނުއަރީ މަހު އެ މަގާމުން ވަކިކުރީ އެ ކުންފުނީގެ ބޯޑުން ނިންމައިގެންނެވެ.

އެ މައްސަލަ ޖެނިފާގެ ފަރާތުން ވަޒީފާއާ ބެހޭ ޓްރައިބިއުނަލަށް ހުށަހެޅުމުން، އެ ޓްރައިބިއުނަލުން ނިންމީ ޖެނިފާ މަގާމުން ވަކިކުރީ ވަޒީފާ އިން ވަކިކުރަން ޖެހޭ ފަދަ ހާލަތެއް މެދުވެރިވެގެން ނޫން ކަމަށާއި އޭނާ ވަކިކުރީ މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމުކުރުމެއް ނެތި ކަމަށެވެ. އެހެންވެ، އޭނާ އަށް އަލުން ވަޒީފާ ދިނުމަށާއި މައްސަލަ ނިމުނު މުއްދަތާ ހަމައަށް ލިބެންޖެހޭ މުސާރަ އާއި އިނާޔަތްތައް ވެސް ދޭން ޖެހޭނެ ކަމަށް އެ ނިންމުމުގައިވެ އެވެ.

ގާނޫނާ ހިލާފަށް ވަޒީފާއިން ވަކިކޮށްފައިވާތީ ގެއްލުމުގެ ބަދަލެއްގެ ގޮތުން އެއް މަހުގެ މުސާރަ އާއި އިނާޔަތްތަކަށް ވާ 56،000 އަށް ވުރެ ގިނަ ރުފިޔާ ޖެނިފާ އަށް ދޭންޖެހޭނެ ކަމަށް އެ ނިންމުމުގައިވެ އެވެ.

ހައި ކޯޓުގެ ރަޖިސްޓްރީން ދައްކާ ގޮތުގައި، މިދިޔަ ހަފްތާގެ އަންގާރަ ދުވަހު އެ ހުކުމް އެ ކޯޓުގައި ވަނީ އިސްތިއުނާފުކޮށްފަ އެވެ. އިސްތިއުނާފުގެ މައްސަލަ ބަލައިގަތުމާ މެދު ކޯޓުން ވަކި ގޮތެއް އަދި ނުނިންމާ ކަމަށް ވެސް ރަޖިސްޓްރީން ދައްކަ އެވެ.