ޕީއެންސީގެ އެތެރޭގެ އިންތިހާބު ފަށައިފި

އަލީ ރާޒީ

23 ނޮވެމްބަރ 2024 - 11:44

0 comments

ޕީއެންސީގެ އެތެރޭގެ އިންތިހާބުގެ ވޯޓްލުން ކުރިއަށް ދަނީ-- ފޮޓޯ: ސަން

މިއަދު ހެނދުނު 10:00 އިން ފެށިގެން މެންދުރު 14:00 އަށް ކުރިއަދާ ވެރިކަންކުރާ ޕީއެންސީގެ އެތެރޭގެ އިންތިހާބަކީ މިހާތަނަށް ރާއްޖޭގެ ތާރީހުގައި ޕާޓީއެއްގެ އެތެރޭގައި ބާއްވާ އެންމެ ބޮޑު އިންތިހާބެވެ.

ޕީއެންސީގެ ދާއިރާތަކުގެ އިންތިހާބުގެ އެންމެ ފަހުގެ ތައްޔާރީތައް ނިންމާ މިއަދުގެ 10:00 ގައި ވަނީ ވޯޓުލާން ފަށާފައެވެ.

މި އިންތިހާބުގައި މާލެއާއި އަތޮޅުތެރޭގެ 88 ރަށެއްގައި ވޯޓުލުން ކުރިޔަށްދެއެވެ. އޭގެތެރެއިން މާލެ ސަރަހައްދުގައި ބަހައްޓާފައި ހުރި 56 ވޯޓު ފޮއްޓާއި އަތޮޅުތެރޭގައި ބަހައްޓާފައި ހުރި ފޮށިތަކާ އެކު ޖުމްލަ 144 ވޯޓް ފޮށި ވަނީ ބަހައްޓައިފައެވެ.

އެ ޕާޓީން ބުނާ ގޮތުގައި މި އިންތިހާބުގެ މައިގަނޑު އަމާޒަކީ ލާމަރުކަޒީ އުސޫލުން، ޕާޓީގެ އާންމު މެންބަރުންގެ ބައިވެރިވުމާއި ޝާމިލުވުމާއެކު ޕާޓީ ހިންގައި، ރަށްރަށާއި ދާއިރާތަކުގެ ލެވެލްގައި ޕާޓީގެ ހަރަކާތްތައް ހިންގާނެ ލީޑާޝިޕު އިންތިހާބުކުރުމެވެ.

މި އިންތިހާބު ނިމި ދާއިރާތަކާއި ރަށްރަށުގައި ޕާޓީގެ ހަރަކާތްތައް އިންތިޒާމުކޮށް ހިންގާނެ މީހުން ކަނޑައެޅުމުން ލާމަރުކަޒީ ގޮތެއްގައި ޕާޓީ ހިންގަން ފެށޭނެ ކަމުގައި އެ ޕާޓީން ދެކެ އެވެ.

އަދި ޕީއެންސީން ބުނެފައިވަނީ މި އިންތިހާބުގެ ތެރެއިން މުސްތަގުބަލުގައި އެ ޕާޓީގެ ލީޑަރުންގެ ގޮތުގައި ހަރަކާތްތެރިވެވަޑައިގަންނަވާނެ ބޭފުޅުން އުފެދިގެންދާނެ އެވެ.