ގާނޫނުއަސާސީގެ ދިފާއުގައި އެމްޑީޕީން ޑިސެމްބަރު 10 ގައި ނުކުންނަނީ

މަރިޔަމް އަނާ

29 ނޮވެމްބަރ 2024 - 18:56

0 comments

ރައްޔިތުންގެ މަޖިލީހުގެ މެންބަރުން އިންތިހާބުވުމަށް ފަހު، ސިޔާސީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ މަޖިލީހުގެ މެންބަރުކަން ގެއްލޭ ގޮތަށް ގާނޫނުއަސާސީ އަށް މި ހަފުތާގައި ގެނައި އިސްލާހާއި ސަރުކާރުގެ "ދޯހަޅި" އިތުރު ސިޔާސަތުތަކާ ދެކޮޅަށް އަޑުއުފުލުމަށް އަންނަ މަހުގެ 10 ގައި މާލޭގައި ބޮޑު ޖަލްސާއެއް ބާއްވަން އިދިކޮޅު އެމްޑީޕީން ތައްޔާރު ވެއްޖެ އެވެ.

މި ޖަލްސާ ބޭއްވުމަށް ހަމަޖައްސާފައިވަނީ ކުރިއަށް އޮތް ޑިސެމްބަރު 10 ވަނަ ދުވަހު މާލޭގައެވެ.

އެމްޑީޕީ އިން އިންތިޒާމުކޮށްގެން "ގާނޫނުއަސާސީގެ ދިފާއުގައި ރައްޔިތުން"ގެ ނަމުގައި މި ޖަލްސާ ބާއްވާ ދުވަހަކީ ރާއްޖޭގެ މަސްވެރިންގެ ދުވަހާއި ބައިނަލްއަގްވާމީ އިންސާނީ ހައްގުތަކުގެ ދުވަހެވެ.

އެމްޑީޕީ އިން ބުނާ ގޮތުގައި މެންބަރުންގެ ގޮނޑި ގެއްލޭނެ ގޮތްތަކެއް ކަނޑައަޅައި ގާނޫނުއަސާސީއަށް ގެނައި އިސްލާހު ތަކަކީ މިނިވަންކަމާ އެކު މަސައްކަތް ކުރައްވަންޖެހޭ މެންބަރުންގެ މަސްއޫލިއްޔަތުތަކާއި ޒިންމާތަކަށް އަރައިގަތުމަށް ގެނެސްފައިވާ އިސްލާހުތަކެކެވެ.

އެ ޕާޓީން ބުނިގޮތުގައި ސަރުކާރުގެ ދޯހަޅި ސިޔާސަތުގެ ސަބަބުން މަސްވެރިކަމާއި ޓޫރިޒަމް ހީނަރުވެ، މުޅިން އުވި ދާނެ ކަމުގެ ބިރުވެސް އެބަ އޮތެވެ.

މި ކަންކަމުގެ ޝަކުވާތައް ލިބެމުންދަނީ ރައްޔިތުންގެ ފަރާތުން ކަމަށާއި އެމްޑީޕީއަކީ ގައުމުގެ މިސްރާބު ހަމަ މަގަށް އަޅުވައި ރައްޔިތުންގެ ހައްގުތައް ދިފާއުކުރުމުގައި އަބަދުވެސް އޮންނަ ޕާޓީއަކަށް ވާތީ އެ މަސައްކަތަށް ނުކުންނަން ތައްޔާރުވެފައިވާ ކަމަށް ބުންޏެވެ.