ރާއްޖެ ސަރަހައްދަށް ވަދެ އުޅެނިކޮށް ޑްރޯން ބޭނުންކޮށްގެން ހޯދީ ލަންކާ މަސް ބޯޓެއް

އައިމިނަތު ޝިޔާޒާ

29 ޑިސެމްބަރ 2024 - 12:52

0 comments

ރާއްޖެ ސަރަހައްދަަށް ވަދެ އުޅުނު ބޯޓު ފެންނަ ޑްރޯން ފޮޓޯއެއް

ރާއްޖޭގެ އިގްތިސޯދީ ސަރަހައްދަށް ގަވައިދާ ހިލާފަށް ވަދެ އުޅެނިކޮށް ޑްރޯންގެ އެހީގައި ހޯދި ބޭރުގެ މަސްބޯޓަކީ ސްރީ ލަންކާގެ މަސް ބޯޓެއް ކަމަށް އެމްއެންޑީއެފުން މިއަދު ބުނެފި އެވެ.

އެމްއެންޑީއެފްއިން ބުނީ އެ މަސް ބޯޓުން ތިން މީހުން ދަތުރުކުރި ކަމަށާއި އެ މީހުންނާއި މަސް ބޯޓު މިހާރު ފުލުހުންނާއި ހަވާލު ކޮށްފައިވާ ކަމަށެވެ.

ރާއްޖޭގެ ހާއްސަ އިގްތިސާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައި އެ ބޯޓު އަތުލައިގަތުމަށްފަހު، އެންމެ ފުރަތަމަ ގެންދިޔައީ އެމްއެންޑީއެފްގެ ކޯސްޓްގާޑްގެ ބެލުމުގެ ދަށަށެވެ.

ރާއްޖޭގެ އިގްތިސާދީ ސަރަހައްދަށް ދޭތެރެ ދޭތެރެއިން އެކި ގައުމުތަކުގެ ބޯޓުތައް އެތެރެވެގެން އެމްއެންޑީއެފްއިން ހިފަހައްޓަ އެވެ. އެގޮތުން ޑްރޯންގެ އެހީގައި މިދިޔަ ނޮވެމްބަރު 16, ގައި ވެސް ގަވާއިދާ ހިލާފަށް ރާއްޖެއަށް އެތެރެވި ބޭރުގެ މަސް ބޯޓެއް އަތުލައިގަތެވެ.

ރާއްޖޭގެ ސަރަހައްދަށް ގަވާއިދާ ހިލާފަށް ވަދެގެން އުޅުނު ސޯމާލިއާ ޑިންގީއެއް ވެސް މިދިޔަ ހަފްތާގައިވަނީ ހިފަހައްޓާފަ އެވެ.