މި މަހު 6،700 އަށް ވުރެ ގިނަ މީހުން އުމްރާއަށް ދިޔަ

އައިމިނަތު ޝިޔާޒާ

29 ޑިސެމްބަރ 2024 - 13:07

0 comments

މި ޑިސެމްބަރު މަހު ރާއްޖެއިން 6،373 އަށް ވުރެ ގިނަ މީހުން އުމްރާގެ އަޅުކަން އަދާ ކުރުމަށް މައްކާއަށް ދިޔަ ކަމަށް އިސްލާމިކް މިނިސްޓްރީން ބުނެފި އެވެ.

މީޑިއާތަކަށް މިނިސްޓަރު މިއަދު ފޮނުއްވި މެސެޖެއްގައި ވިދާޅުވީ ޑިސެންބަރު މަހު އުމްރާގެ އަޅުކަން އަދާކުރުމަށް ސައުދީ އަށް 6،373 މީހަކު ގޮސްފައިވާ ކަމަށާއި ހުރިހާ އެންމެންގެ ހާލު ވެސް ރަނގަޅު ކަމަަށެވެ.

ޝަހީމް ވިދާޅުވީ މިއީ ރާއްޖޭގެ ތާރީހުގައި ވެސް އެއްފަހަރާ އުމްރާގެ އަޅުކަމުގައި ބައިވެރިވުމަށް އެންމެ ގިނަ ބަޔަކު ދަތުރުކުރި ފަހަރަށް ވާނެ ކަމަށެވެ. މިހާރު އުމްރާވާ މީހުންގެ ތެރޭގައި ގިނަ އަދަދަކަށް ޒުވާނުން ވެސް ހިމެނޭކަން ފާހަގަކޮށްލެވެ އެވެ.

އުމްރާ އަށް މީހުން ގެންގޮސްދޭ ރާއްޖޭގެ ކުންފުނިތަކުގެ އަދަދު 50 އަށް ވުރެ ގިނަ އެވެ.

އުމްރާގެ އަޅުކަން އަދާ ކުރުމަށް އާންމު ގޮތެއްގައި ޑިސެމްބަރު މަހު ރާއްޖެއިން ގިނަ ބަޔަކު މައްކާއަށް ދެ އެވެ. މިފަހަރު ބައެއް ވިޔަފާރިވެރިންގެ އެހީތެރިކަމާ އެކު ވެސް އުމްރާގެ އަޅުކަން އަދާ ކުރުމަށް ރަށްރަށުން މީހުން ފޮނުވާފައިވެ އެވެ.