ބޮޓްލިން ޕްލާންޓު މައްސަލަ: ހޯރަފުށީގައި މުޒާހަރާކޮށް މެންބަރު އަލީގެ އިސްތިއުފާ އަށް ގޮވައިފި

އިސްމާއިލް ރިޒާ

12 ޖޫން 2025 - 18:44

5 comments

ހއ. ހޯރަފުށީގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ ބޮޓްލިން ޕްލާންޓުގެ މަސައްކަތް ހުއްޓާލާ އެތަނުގެ މުވައްޒަފުން ވަޒީފާއިން ވަކިކުރަމުންދާތީވެ އެކަމާއި ނުރުހުން ފާޅުކުރުމުގެ ގޮތުން ހޯރަފުށީގައި މުޒާހަރާކޮށް އެ ދާއިރާގެ މެންބަރު އަލީ މޫސާގެ އިސްތިއުފާ އަށް ގޮވައިފި އެވެ.

މިއަދު މުޒާހަރާ ކުރި ރައްޔިތުންގެ ކަންބޮޑުވުމަކީ ރަށުގައި އާއިލާއާއިއެކު ވަޒީފާ އަދާކުރަމުން އަންނަ ރަށު ބައެއްގެ ވަޒީފާ ގެއްލުމެވެ. މިއަދު ހޯރަފުށީގައި ކުރި މުޒާހަރާގައި އެރަށު ކައުންސިލް ބައެއް މެންބަރުން ވެސް ބައިވެރިވި އެވެ.

ހޯރަފުށީ ކައުންސިލުގެ 40 އިން ސައްތަ އޮންނަ ގޮތައް ފެނަކަ އާ އެކު ހެދުނު އެއްބަސްވުމެއްގެ ދަށުން ކުރިއަށް ގެންދިޔަ މި މަޝްރޫއަށް ނަގާފައިވާ ދާއިމީ މުވައްޒަފުން ވަކި ކޮށް ޕްލާންޓް އުވާލަން ނިންމި ކަމެއް ކައުންސިލަށް ވެސް އެނގިފައި ނުވާ ކަން މިއަދުގެ މުޒާހަރާގައި ބައިވެރިވި ހޯރަފުށީ ކައުންސިލަރުން ވެސް ވަނީ ވިދާޅުވެފައި އެވެ.

މުޒާހަރާގެ ބައިވެރިން ވަނީ ސަރުކާރުން ހޯރަފުށީގައި ވަޒީފާ އިތުރު ކޮށްދިނުމަށާއި އަދި ސަރުކާރުގެ ވަޒީފާ ތަކުން މީހުން ކަނޑާ ބޭރުނުކުރުމަށް އެދިފައި އެވެ. އަދި މިހާރަށްވުރެ ސަރުކާރު ޒިންމާދާރުވުމަށާއި ރައްޔިތުންނަށްވީ ވައުދު ފުއްދުމުގައި ސަރުކާރުން އުޅުމަށް ވެސް މުޒާހަރާގެ ބައިވެރިން ވަނީ ބުނެފައި އެވެ.

"ނިކަމެތި ނުކުރޭ" ނަމުގައި ބޭއްވި މުޒާހަރާގެ ބައިވެރިން ވަނީ ރައީސްގެ ޑރ. މުއިއްޒުގެ އިސްތިއުފާ އަށާއި ދާއިރާގެ މެންބަރު އަލީގެ އިސްތިއުފާއަށް ވެސް މުޒާހަރާގެ ބައިވެރިން ވަނީ ގޮވާފައި އެވެ.

މީ ހޯރަފުށީގައި ރައީސް ޑރ. މުއިއްޒުގެ އިސްތިއުފާއަށް ގޮވި ފުރަތަމަ ފަހަރުކަން ވެސް ފާހަގަކޮށްލެވެ އެވެ. އަދި މީ މިހާ ފާޅުކަން ބޮޑުކޮށް ހޯރަފުށީ ދާއިރާގެ މެންބަރެއްގެ އިސްތިއުފާއަށް އެ ދާއިރާގެ ރައްޔިތުން ނިކުމެ ގޮވި ފުރަތަމަ ފަހަރެވެ.

"ހއ. ހޯރަފުށީ ބޮޓްލިންގ ޕްލާންޓްގެ މަސައްކަތް މި ކުންފުނިން ހުއްޓުމަކަށް ގެނައުމަށް ނިންމާފައިވާތީ، އެތަނުގައި މަސައްކަތް ކުރަމުންދާ މުވައްޒަފުންގެ ވަޒީފާގެ އެއްބަސްވުން ނިމުމަކަށް ގެނައުމަށް ކުންފުނީގެ ޑިރެކްޓަރުންގެ ބޯޑުން ނިންފައިވާ" ކަމަށް 10 ޖޫންގެ ތާރީހުގައި ފޮނުވި ޗިޓުގައި ބުނެފައިވެ އެވެ.

ނަމަވެސް ރޭ ފެނަކައިން ބުނެފައި ވަނީ ބޮޓްލިން ޕްލާންޓުގެ މަސައްކަތް ހުއްޓާނުލާ ކަމަށާއި އެ މަސައްކަތް މިވަގުތު ހުއްޓިފައި އޮތަސް އަންނަ މަހު އަލުން މަސައްކަތް ފެށުމަށް ހަމަޖެހިފައިވާ ކަމަށާއި މަސައްކަތް ފެށުމުން އިތުރު މުވައްޒަފުން ހޯދަން އިއުލާނު ވެސް ކުރާނެ ކަމަށެވެ.

ފެނަކަ އިން އިތުރަށް ބުނީ އެ މަޝްރޫއުއަށް އެ ކުންފުނިން 30 މިލިއަނެއްހާ ރުފިޔާ މިހާތަނަށް ހޭދަކޮށްފައި ވިޔަސް، 2023 ވަނަ އަހަރުގެ ރިޔާސީ އިންތިހާބާ ހަމައަށް ނިމިފައި އޮތީ މަޝްރުއޫގެ 70 ޕަސެންޓް މަސައްކަތް ކަމަށެވެ. އެ މަޝްރޫއަށް ޖުމްލަ 36.7 މިލިއަން ރުފިޔާ ހަރަދުވެފައިވާއިރު، އެއީ އިންޑިއާ ސަރުކާރުން ދިން 9 މިލިއަން ރުފިޔާގެ އެހީ އާއި ކައުންސިލުން ހިއްސާކޮށްފައިވާ 2.4 މިލިއަން ރުފިޔާ އަދި ފެނަކައިން ހަރަދުކޮށްފައިވާ 34.3 މިލިއަން ރުފިޔާ ހިމަނައިގެން ކަމަށް އެ ކުންފިނިން ބުންޏެވެ.

"ފެނަކައިގެ ޓެކްނިކަލް ޓީމެއް ހޯރަފުށްޓަށް ގޮސް، މަޝްރޫއުގެ މަސައްކަތް އަލުން ފެށުމަށް ޓަކައި ކުރަންޖެހޭ ކަންކަން ބެލުމަށްފަހު، ޖުލައިމަހު މަޝްރޫއުގެ މަސައްކަތް ފަށައި ވަރަށް އަވަހަށް ނިންމައިލެވޭނެ" އެ ކުންފުނިން ބުންޏެވެ.

ހޯރަފުށީގައި ބިއްލޫރި ފުޅީގައި ފެން ބަންދުކުރަން ހަދަމުން އަންނަ އެ ބޮޓްލިން ޕްލާންޓުގެ މަސައްކަތް ހުއްޓާލައި އެ ތަނުން މުވައްޒަފުން ވަކިކުރާތީ އިދިކޮޅު އެމްޑީޕީން މިއަދު ވަނީ ކަންބޮޑުވުން ފާޅުކޮށްފަ އެވެ.