ކަނޑު އުޅަނދުފަހަރު މޮނިޓާކުރާ ނިޒާމެއް އިމިގްރޭޝަނުން ގާއިމުކޮށްފި

އިސްމާއިލް ރިޒާ

05 އޯގަސްޓް 2025 - 12:16

0 comments

ޔުނިވާސަލް އޮޓޮމެޓިކް އައިޑެންޓިފިކޭޝަން ސިސްޓަމްގެ ޒަމާނީ ޓެކްނޮލޮޖީ (ޔޫއޭއައިއެސް) ބޭނުންކޮށްގެން ކަނޑުއުޅަނދުފަހަރުގެ ހަރަކާތްތައް މޮނިޓާކުރާ ނިޒާމެއް އިމިގްރޭޝަނުން ތައާރަފްކޮށް، ބޭނުންކުރަން ފަށައިފި އެވެ.

އިމިގްރޭޝަނުން ބުނި ގޮތުގައި މިއީ ޔުނިވާސަލް އޮޓޮމެޓިކް އައިޑެންޓިފިކޭޝަން ސިސްޓަމް (ޔޫއޭއައިއެސް) ގެ ޒަމާނީ ޓެކްނޮލޮޖީ ބޭނުންކޮށްގެން ގާއިމުކުރި ނިޒާމެކެވެ.

ސީޕޯޓް ޑިވިޝަނުން ގާއިމުކުރި މި ނިޒާމާއެކު މާލެ ޕޯޓު ސަރަހައްދުން ފެށިގެން 30 ނޯޓިކަލް މޭލު ސަރަހައްދުގައި ދުއްވާ ހުރިހާ ކަނޑު އުޅަނދުފަހަރުގެ ހަރަކާތްތައް ރިއަލްޓައިމްކޮށް ދެނެގަތުމުގެ ގާބިލުކަން ލިބިފައިވާ ކަމަށް އިމިގްރޭޝަނުން ބުންޏެވެ.

އިމިގްރޭޝަނުން ބުނީ މިއީ ބައިނަލްއަގުވާމީ ފެންވަރުގެ ޕޯޓުތަކުގައި ވެސް އެތަންތަނުގެ ހިންގުން ހަރުދަނާކުރުމަށާއި ސަލާމަތީ ކަންކަން ކަށަވަރުކުރުމަށް ބޭނުންކުރަމުން އަންނަ ޒަމާނީ ސިސްޓަމެެއް ކަމަށެވެ.

މީގެކުރިން ބޯޓު ފަހަރުތައް ރާއްޖެއަށް އަންނާނެ ކަމަށް ލަފާކުރެވޭ ވަގުތައް ހޯދަނީ ކަމާ ގުޅުން ހުރި އިދާރާތައް މެދުވެރިކޮށެވެ. އެކަމަކު އެ ސިސްޓަމާއެކު އިމިގްރޭޝަނަށް އުޅަނދުތައް މޮނިޓާކުރެވޭނެ އެވެ.

"ކުރީގައި އަމަލުކުރާ ގޮތަކީ އީޓީ ލިބުނީމަ ގުޅުން ހުރި އެހެން މުއައްސަސާތައް، އެމްޕީއެލް، ކަސްޓަމްސް މެދުވެރިކޮށް މައުލޫމާތު ހޯދައިގެން ބޯޓު ވަންނަ ގަޑިއަށް އޮފިސަރުން ތައްޔާރުކޮށް ބޯޓަށް ދިއުމަށް ތައްޔާރުވަމުންދަނީ. އެ ބޯޓު ފަހަރު ފުރައިގެންދިޔަތޯ، ބޯޓު އޮތީ ކޮން ހިސާބެއްގައިތޯ، ރާއްޖެއަށް ވަންނަން އައި ބޯޓު އަންނަން ކިހާ ހިސާބެއްގައި އޮތްތޯ މިހާރު ދެނެގަނެވޭނެ. ކެޕޭސިޓީ ބިލްޑު ކުރުމުގެ ގޮތުން އެޅޭ ވަރަށް މުހިންމު ފިޔަވަޅެއް މީއީ،" އިމިގްރޭޝަނުން ބުންޏެވެ.

ޔޫއޭއައިއެސް އަކީ ކަނޑު ބޯޓު ވަދެ ނުކުމެ އުޅޭއިރު ޓްރޭސް ކުރާ ސިސްޓަމެކެވެ. އިންޓަނޭޝަނަލް ޕޯޓުތަކުގައި އެތަންތަނުގެ ހިންގުން ހަރުދަނާ ކުރުމަށާއި ސަލާމަތީ ކަންކަން ކަށަވަރުކުރުމަށް ވެސް އެ ސިސްޓަމް އަންނަނީ ބޭނުން ކުރަމުންނެވެ.