ކައުންސިލްގެ މިލްކިއްޔާތުގައިވާ ތަންތަން ސަރުކާރަށް އަތުލެވޭ އިސްލާހު ފާސްކޮށްފި

އިސްމާއިލް ރިޒާ

26 އޯގަސްޓް 2026 - 15:28

0 comments

ކައުންސިލްތަކުގެ މިލްކިއްޔާތުގައިވާ ބިންތައް ނުވަތަ ތަންތަން ވަޒީރުންގެ މަޖިލީހަށް އަތުލުމުގެ ބާރު ދޭން ގާނޫނު އިސްލާހުކުރަން ހުށަހެޅި ބިލު މަޖިލިހުން މިއަދު ފާސްކޮށްފި އެވެ.

ވަކި ޕާޓީއަކަށް ނިސްބަތްނުވާ ތުޅާދޫ ދާއިރާގެ މެމްބަރު އަބްދުލްހަންނާނު ހުށަހެޅުއްވި އެ ބިލް ސަރުކާރު ހިންގާ ޕީއެންސީގެ މެންބަރުންގެ ތާއީދާ އެކު މަޖިލީހުގެ މިއަދުގެ ޖަލްސާގައި ފާސްކުރީ ވޯޓުގައި ބައިވެރިވެވަޑައިގަތް 59 މެންބަރުންގެ ތެރެއިން 47 ވޯޓުންނެވެ.

އެ ބިލު ފާސްކުރަން ފެނިވަޑައިނުގަންނަވާ ކަމަށް ވޯޓުދެއްވީ އިދިކޮޅު އެމްޑީޕީގެ 11 މެންބަރުންނެވެ.

ހަންނާނު ހުށަހެޅުއްވި ބިލް ސަރުކާރު ހިންގާ ޕީއެންސީގެ މެންބަރުންގެ ތާއީދާ އެކު ފާސްކުރީ ލާމަރުކަޒީ ކޮމިޓީން އިއްޔެ ރޭ ކުއްލި ގޮތަކަށް ބޭއްވި ބައްދަލުވުމެއްގަ އެވެ.

ސަރުކާރުގެ މަޝްރޫއުތައް ހިންގުމަށްޓަކައި ވަޒީރުންގެ މަޖިލީހުން ނިންމާ ނިންމުމަކުން، ކައުންސިލްތަކުގެ ބިންތައް ސަރުކާރަށް ނެގޭ ގޮތަށް ލާމަޒުކަޒީ ގާނޫނު ބަދަލުކުރަން ހުށަހެޅުއްވި އެ ބިލަށް ރޭގެ ބައްދަލުވުމުގައި ދެތިން އިސްލާހެއް ހުށަހެޅި އެވެ. އަދި ކޮމިޓީގައި ބިލް ފާސްކުރީ ރޭ ހުށަހެޅި މުހިއްމު އިސްލާހަކާ ވެސް އެކުގަ އެވެ.

ހެންވޭރު އުތުރު ދާއިރާގެ މެންބަރު އަހުމަދު އައިފާން ހުށަހެޅުއްވި އެ އިސްލާހުގައި އޮތީ ކައުންސިލުން ވަކިކުރާ ބިމުގައި ކައުންސިލުން ނުވަތަ އެހެން ފަރާތަކުން އިންވެސްޓްމެންޓެއް ކޮށްފައިވާ ނަމަ، ފިނޭންސް މިނިސްޓްރީއަށް ހުށަހަޅައި އެކަށީގެންވާ ބަދަލު ލިބެން ޖެހޭ ގޮތަށެވެ.

ލާމަރުކަޒީ ގާނޫނުގެ 1-56 ވަނަ މާއްދާ މިހާރު އޮންނަ ގޮތުންވެސް، ކައުންސިލެއްގެ އިހްތިސާސް ކަނޑައެޅުމުގެ ބާރު ދީފައި އޮންނަނީ ރައީސަށެވެ. އެ މާއްދާއާ ހަވާލާދީ ކައުންސިލްތަކުގެ އިހްތިސާސްގައިވާ ބައެއް ރަށްތަކާއި ފަޅުތައް މީގެ ކުރިން އަތުލާފައިވެ އެވެ. އެގޮތަށް އަތުލާއިރު، އެ ބިމަކަށް ކޮށްފައިވާ އިންވެސްޓްމަންޓަށް އެކަށީގެންވާ ބަދަލެއް ދޭން ޖެހޭ ކަމަށް ގަނޫނުގައި އޮވެ އެވެ.

މި އިސްލާހުން މިހާރަށް ވުރެ ފުޅާ ދާއިރާއެއްގައި ކައުންސިލްގެ މިލްކުގައިވާ ތަންތަން އަތުލުމުގެ ބާރު ސަރުކާރަށް ލިބުމުގެ ފުރުސަތު އޮންނާނެ އެވެ.