ރާއްޖޭގައި ބިނާކުރާ އެންމެ ބޮޑު މިސްކިތުގެ ބިންގާ އަޅައިފި

ޔޫނުސް އިބްރާހިމް

13 ސެޕްޓެމްބަރ 2026 - 20:01

0 comments

އެއްފަހަރާ ގާތްގަނޑަކަށް 10،000 މީހުންނަށް ނަމާދު ކުރެވޭ ޖާގައާ އެކު ރާއްޖޭގެ އެންމެ ބޮޑު މިސްކިތް ހުޅުމާލޭގައި އިމާރާތް ކުރުމުގެ މަސައްކަތް ފެށުމުގެ ގޮތުން މިއަދު ބިންގާ އަޅައިފި އެވެ.

މި މިސްކިތުގެ ބިންގާ އަޅުއްވައިދެއްވީ ރައީސް ޑރ. މުހައްމަދު މުއިއްޒު، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި މި މިސްކިތުގެ މަސައްކަތް ކުރުމަށް ހަމަޖައްސާފައިވާ ސައުދީއަރަބިއްޔާގެ އައްރާޖިޙީ ކުންފުނީގެ ޗީފް އެގްޒެކްޓިވް އޮފިސަރ، ބަންދަރު އަބްދުﷲ އައްރާޖިހީ، ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަޙްޔާ ހަސަން އަލްޤަޙްޠާނީ އަދި އެޗްޑީސީގެ މެނޭޖިން ޑިރެކްޓަރު އަލީ ޒުހައިރު އެވެ.

ރާއްޖޭގައި މިހާތަނަށް ބިނާކުރާ އެންމެ ބޮޑު މިސްކިތުގެ ބިންގާ އެޅުން ކުރިއަށްގެންގޮސްފައި މިވަނީ ރާއްޖެ އިސްލާމްވިތާ 900 އަހަރު ފުރުން ފާހަގަކުރުމުގެ މުނާސަބަތާ ގުޅުވަ އެވެ.

ދެ އަހަރުތެރޭ ނިންމުމަށް ހަމަޖެހިފައިވާ މި މިސްކިތަށް ކިޔަނީ، "ސުލްޠާން މުޙައްމަދު ބިން ޢަބްދުﷲ ގްރޭންޑް މޮސްކް އެންޑް އިސްލާމިކް ސިވިލައިޒޭޝަން ސެންޓަރ" އެވެ.

އިސްލާމިކް މިނިސްޓަރު ޝަހީމް ވިދާޅުވީ މިއީ އިސްލާމީ އާކިޓެކްޗާގެ ރީތިކަމާއި، ރާއްޖޭގައިވާ އިސްލާމީ ހަޟާރަތުގެ މުއްސަނދި ތަރިކަ ދައްކުވައިދޭނެ، އަދި އީމާންތެރިކަމާއި، އިލްމާއި، އެކުވެރިކަމާއި، އިޖުތިމާއީ ގުޅުމުގެ މަރުކަޒެއްގެ ގޮތުގައި ޚިދުމަތްކުރާނެ ބިނާއެއް ކަމަށެވެ.

މި މިސްކިތް ބިނާކުރެވިގެންދާ ކޮމްޕްލެކްސްގައި ވަގުފު ބިނާތަކާއި ކޮމާޝަލް ބިލްޑިންގާއި ޕާކިން ވެސް ހިމެނޭނެ އެވެ. އަދި ވަގުފު އިމާރާތުން ލިބޭ ނަފާ ހޭދަކުރެވިގެންދާނީ ރާއްޖޭގެ އިސްލާމީ ކަންތައްތަކަށް ކަަމަށް އިސްލާމިކް މިނިސްޓްރީން ބުނެ އެވެ.

10،000 މީހުންނަށް ނަމާދުކުރެވޭ މިސްކިތުގައި ހިމެނޭ ބައިތައް:

- އެޑިއުކޭޝަނަލް، ކަލްޗަރަލް އަދި ކޮމިއުނިޓީ ސެންޓަރު

- ނަމާދު ކުރާ މާލަން

- އިމާމުންގެ އަދި އިދާރީ އޮފީސްތައް

- އިސްލާމިކް ލައިބްރަރީ އަދި ކަލްޗަރަލް ސެންޓަރު

- ގުރުއާން މިއުޒިޔަމް

- މަލްޓިޕާޕޯސް ކޮމިއުނިޓީ ހޯލް

- ވިޒިޓާސް އޭރިޔާ

- އިސްލާމިކް ބުކްޝޮޕް އަދި ގިފްޓް ޝޮޕް

- އެކްޒިބިޝަން ހޯލް