މަރިޔަމް އަނާ
20 ސެޕްޓެމްބަރ 2023 - 21:24
0 comments
ނިޒާމީ ވޯޓެއްގެ ވާހަކަ ދެއްކުން މި ވަގުތު މުހިންމު ނޫންކަމަށާއި ގާނޫނު އަސާސީގައި ބަޔާންކޮށްފައި އޮތީ ރައްޔިތުން އެންމެ ބޭނުންވާ ގޮތްކަމަށް ޕީޕީއެމް، ޕީއެންސީ ހިންގުމާ ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ދެވަނަ ބުރުގައި ތާއީދު ހޯދުމަށް މިއަދު ނ. ޅޮއްސަށް ވަޑައިގެން ވާހަކަދައްކަމުން އަދުރޭ ވިދާޅުވީ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީނަކީ ރައްޔިތުންގެ ނިންމުމާ އެއްގޮތަށް ކުރިއަށް ވަޑައިގަންނަވާ ބޭފުޅެއް ކަމަށާއި އިދިކޮޅު ދެ ޕާޓީގެ ސިޔާސަތަކީ ކޮންމެ ކަމެއްގައި ވެސް ދިވެހި ގައުމާއި ދިވެހި ރައްޔިތުން އިސްކުރުން ކަމަށެވެ."އެހެންވީމަ، ރައްޔިތުންގެ ނިންމުމަކީ، މި ރާއްޖޭގައި އޮންނާނީ ރިޔާސީ ނިޒާމެކޭ. އެ ނިޒާމަށް އަޅުގަނޑުމެން ތާއީދު ކުރަނީ،" އަދުރޭ ވިދާޅުވި އެވެ.އެ އިސްލާހާ އެކު މުޅި މަޖިލީހުގެ ކޮމިޓީން އެ ގަރާރު ފާސްކޮށް، މަޖިލީހުން އެ ގަރާރު ފާސްކުރަން ވޯޓު ނެގި ވަގުތު ތަޅުމުގައި ތިއްބެވީ ޕީޕީއެމް/ޕީއެންސީގެ ޖުމްލަ އަށް މެމްބަރުންގެ ތެރެއިން ދެ މެމްބަރުންނެވެ. އެއީ އޭދަފުށި ދާއިރާގެ ޕީޕީއެމް މެމްބަރު އަހުމަދު ސަލީމާއި ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމެވެ.އެ ދެ މެމްބަރުން ވެސް ގަރާރު ފާސްކުރަން ނެގި ވޯޓުގައި ބައިވެރިވެވަޑައިގެންފައެއް ނުވެ އެވެ.ރައީސް މުހައްމަދު ނަޝީދު އިސްވެ ހުންނަވައިގެން އުފެއްދި އާ ޕާޓީ "ދަ ޑިމޮކްރެޓްސް"އިން މަސައްކަތް ކުރަނީ ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވުމުގެ ކުރިން ނިޒާމާގުޅޭ ވޯޓެއް ނެގުމަށެވެ. ނަމަވެސް އެމްޑީޕީއާއި ޕީޕީއެމްއިން ވެސް އެއްބަސް ވަނީ ރިޔާސީ އިންތިޚާބަށް ފަހު ނިޒާމާ ގުޅޭ ވޯޓެއް ނެގުމަށެވެ.އެހެންކަމުން މިއަދު މަޖިލީހުން ފާސްކޮށްފައިވަނީ އަންނަ މަހުގެ 30 ގެ ކުރިން ނިޒާމު ބަދަލު ކުރުމާމެދު ފެންނަ ނުފެންނަ ވޯޓެއް ނެގުމަށް އިލެކްޝަންސް ކޮމިޝަނަށް މަޖިލީހުން އެންގުމަށެވެ.