ހަނގުރާމައިގެ މައިދާނުގައި ޝަހީދުވާ މީހުންގެ މައްޗަށް ކަށުނަމާދުކުރުން ނޯވޭ: ޝަހީމު

އަހުމަދު ނިހާން

21 އޮކްޓޫބަރ 2024 - 12:49

0 comments

ހަނގުރާމައިގެ މައިދާނުގައި ދުޝްމަނުންނާ ހަނގުރާމަ ކުރަނިކޮށް ޝަހީދުވާ މީހުންގެ މައްޗަށް ކަށު ނަމާދު ކުރުމަކީ އެއީ އޮންނަ ކަމެއް ނޫން ކަމަށް ވިދާޅުވެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ބަޔަކަށް ރައްދުދެއްވައިފި އެެވެ.

ޝަހީމު މިފަދައިން ވިދާޅުވީ އިސްރާއީލުން ޣައްޒާއަށް ދެމުންދާ އުދުވާނީ ހަމަލާތަކުގައި ހަމާސްގެ ލީޑަރު ޔަހްޔާ ސިންވާރު ޝަހީދުކޮށްލުމާ ގުޅިގެން އޭނާގެ މައްޗަށް ރާއްޖޭގެ މިސްކިތްތަކުގައި ކަށުނަމާދުކުރަން ނާންގާތީ ބައެއް މީހުން ފާޑުކިޔަމުންދާތީ ދެއްވި ރައްދުގަ އެވެ.

ޝަހީދުންގެ މައްޗަށް ކަށުނަމާދުކުރުމަކީ ގިނަ އިލްމުވެރިންގެ އަރިހުގައި ދީނުގައި އޮތްކަމަކަށްނުވާއިރު އެކަމަކީ ހުއްދަކަމެއްގެ ގޮތުގައި ދެކެވަޑައިގަންނަވާ މަދު އިލްމުވެރިންގެ އަރިހުގައިވެސް ޝަހީދުންގެ މައްޗަށް ކަށުނަމާދުކުރުމަކީ ކޮންމެހެން ވާޖިބު ކަމެއް ނޫންކަން މިނިސްޓަރު ފާހަގަކުރެއްވި އެވެ.

ޝަހީމް ވިދާޅުވި ގޮތުގައި އިސްލާމް ދީނުގެ ކަންކަމުގައި އަޅުގަނޑުމެން އަމަލުކުރަންވާނީ ދީނުގައި އޮންނަ ރަނގަޅު ގޮތަށެވެ. ކީރިތި ރަސޫލާ ސައްލަﷲ އަލައިހި ވަސައްލަމްގެ ސައްހަ ސުންނަތުގައި އޮންނަ ގޮތަށް އަމަލުކުރަން ވާނެ ކަމަށް ވިދާޅުވެ މިފަދަ މައްސަލަތަކުގައި ރަސޫލާ އަމަލުކުރެއްވި ގޮތް ކަމަށް ވިދާޅުވެ ޝަހީމް ވަނީ މިސާލެއްވެސް ދައްކަވާފަ އެވެ.

"އުހުދު ހަނގުރާމައިގައި ޝަހީދުވި މާތް ސަހާބީންގެ މައްޗަށް ކީރިތި ރަސޫލާ ސައްލަﷲ އަލައިހި ވަސައްލަމް ކަށު ނަމާދު ކުރައްވާފައެއް ނުވެ އެވެ. އެހަނގުރާމައިގައި އެކަލޭގެފާނުގެ މާތް ބޮޑު ބޭބޭފުޅު ހަމްޒަތުގެފާނުގެ ވެސް ޝަހީދުވެވަޑައިގެންނެވި އެވެ. ޙަމްޒަތުގެފާނުގެ މައްޗަށް ވެސް، އެހެން ބޭކަލެއްގެ މައްޗަށް ވެސް ވަޅުލުމުގެ ކުރިން ކަށު ނަމާދުކުރައްވާފައެއް ނުވެ އެވެ،" ޝަހީމް ވިދާޅުވި އެވެ.

ޝަހީމު ވިދާޅުވި ގޮތުގައި އެ ހަނގުރާމާގައި ޝަހީދުވެވަޑައިގެންނެވި ސަހާބީންގެ މައްޗަށް ކަށުނަމާދު ކުރެއްވުމަކާ ނުލައި ސަލާމާއި ސަލަވާތް ލެއްވުނު ނަބިއްޔާ އެ ބޭފުޅުން ފަސްދާނުލެއްވީ އެވެ. އަދި އެބޭކަލުން ފަސްދާނުލެއްވީ ލޭފޮދާއެކު ހިނެވުމެއްވެސް ނެތިކަން އޭނާ ފާހަގަކުރެއްވި އެވެ.

ހަމާސްގެ ކުރީގެ ލީޑަރު އިސްމާއީލު ހަނިއްޔާ ޝަހީދުކޮށްލުމުން އޭނާގެ މައްޗަށް ޣައިރު ހާޒިރުގައި އިސްލާމީ ގިނަ ގައުމުތަކެއްގައި ކަށުނަމާދުކުރިއިރު ރާއްޖޭގެ ބައެއް މިސްކިތްތަކުގައި ކަށުނަމާދުކުރީ އިސްލާމިކް މިނިސްޓްރީން ނާންގަނީހެވެ.