އެންވަޔަރަމަންޓް މިނިސްޓަރު ޔޫއޭއީ އަށް، ޝަހީމް ޕާކިސްތާނަށް

އެންވަޔަރަމަންޓް މިނިސްޓަރު ތޯރިގް ޔޫއޭއީ އަށް، މިނިސްޓަރު ޝަހީމް ޕާކިސްތާނަށް

އައިމިނަތު ޝިޔާޒާ

10 ޖެނުއަރީ 2025 - 18:46

0 comments

އެންވަޔަރަމަންޓް މިނިސްޓަރު ތޯރިގް އިބްރާހީމް ރަސްމީ ދަތުރެއްގައި ޔޫއޭއީ އަށް އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ޕާކިސްތާނަށް ވަޑައިގެންފި އެވެ.

އިސްލާމިކް މިނިސްޓްރީން ބުނީ މި ދަތުރުފުޅުކީ މުސްލިމް ވޯލްޑް ލީގް (ރާބިޠަތުލް ޢާލަމިލްއިސްލާމީ) ގެ ދަޢުވަތަކަށް، އިސްލާމީ މުޖުތަމަޢުތަކުގައި އަންހެން ދަރީންނަށް ތަޢުލީމު ދިނުމާ ބެހޭގޮތުން ބާއްވާ ބައިނަލްއަޤުވާމީ ކޮންފަރެންސްގައި ބައިވެރިވުމަށް ކުރައްވާ ދެ ދުވަހުގެ ދަތުރުފުޅެއް ކަމަށެވެ.

މި ކޮންފަރެންސްގެ ޢިލްމުވެރިންގެ ސެޝަންގައި ޝަހީމް ވާހަކަދައްކަވާނެ ކަމަށް މިނިސްޓްރީން ބުނެ އެވެ.

މީގެ އިތުރުން އެންވަޔަރަމަންޓް މިނިސްޓްރީން ސޯޝަލް މީޑިއާ ޕޯސްޓެއްގައި ބުނީ މިނިސްޠަރުގެ މި ދަތުރަކީ 15 ވަނަ އިންޓަނޭޝަނަލް ރިނިއުވަބަލް އެނަޖީ އެޖެންސީ (އައިރީނާ) އެސެމްބްލީގައި ބައިވެރިވެވަޑައިގަތަށް ކުރައްވާ ދަތުރެއް ކަމަށެވެ

އައިރީނާގެ އެސެމްބްލީގެ 15 ވަނަ ސެޝަން ކުރިއަށް ދާނީ މި މަގުގެ 12 އިން 13 އަށް އަބޫދާބީގަ އެެވެ. މި ސެޝަނާ ގުޅޭ އެހެނިހެން ބައްދަލުވުންތަކެއް މާދަމާ ވެސް ކުރިއަށްދާނެ ކަމަށް މިނިސްޓްރީން ބުންޏެވެ.

ބައްދަލުވުމުގައި އައިރީނާގެ ކޮންމެ މެންބަރު ޤައުމަކުން އެއް ބޭފުޅަކު ބައިވެރިވެވަޑައިގަންނަވާނެ އެވެ. މިދިޔަ އަހަރު ނިމުނުއިރު އައިރީނާގެ މެންބަރުންގެ ތެރޭގައި 170 ޤައުމެއް ހިމެނޭ އެވެ.