ބޭސް ސިޓީއަށް ސަލާން ޖެހުން އާންމުވާތީ ހުށަހެޅި ކުއްލި މައްސަލަ ބޭރުކޮށްލައިފި

އައިމިނަތު ޝިޔާޒާ

26 ނޮވެމްބަރ 2025 - 11:15

0 comments

ރާއްޖޭގައި ބޭސް ލިބުން ދަތިވެފައިވާ މައްސަލައިގައި ޕީއެންސީގެ މެޖޯރިޓީ އޮންނަ ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ 36 މެންބަރުންގެ ވޯޓުން ބޭރުކޮށްލައިފި އެވެ.

"އާންމު ރައްޔިތުންނަށް ބޭސް ލިބުން އިންތިހާއަށް ދަތިވެފައި މިވަނީ، އާސަންދަ ރިފޯމް ކުރުމުގެ ނަމުގައި، އެއްވެސް ރޭވުންތެރިކަމެއް ނެތި ސަރުކާރުން ނިންމި ނިންމުންތަކެއްގެ ސަބަބުން،" އެ މައްސަލާގައި ބުނެފައިވެ އެވެ.

ބޭސް އެތެރެކުރާ ފަރާތްތަކާ ދެކޮޅަށް މުހައްމަދު މުއިއްޒު ވާހަކަ ދެއްކެވުމަށް ފަހު ވެސް ރާއްޖެއަށް ކޮންމެހެން ބޭނުންވާ މިންވަރަށް ބޭސް އެތެރެކުރުމަށް ސަރުކާރުން ނުކުޅެދިފައިވާ ކަމަށް ކުޑޫގެ މައްސަލާގައި ބުނެފައިވެ އެވެ.

މީގެ އިތުރުން، ސީދާ ސަރުކާރުން ޔޫރަޕުގެ މޮޅު ބޭސް ގެންނާނެ ކަމަށް ބުނެ، ބޭސް އެތެރެކުރާ ފަރާތްތަކާ ދެކޮޅަށް ވާހަކަ ދެއްކުމަށްފަހު ވެސް، ރާއްޖެއަށް ކޮންމެހެން ބޭނުންވާ މިންވަރަށް ބޭސް އެތެރެކުރުމަށް ސަރުކާރުން ނުކުޅެދިފައިވާ ކަމަށް ވެސް އެ މައްސަލާގައި ފާހަގަކޮށްފައިވެ އެވެ.

މި ސަރުކާރު ވެރިކަމާ ހަވާލުވި ފަހުން ރާއްޖެއިން ބޭސް ލިބުމުގައި ބޮޑެތި ދަތިތަކެއް ކުރިމަތިވި އެވެ. ސަރުކާރުން ފުރަތަމަ އެކަން ދޮގުކުރި އެވެ. އޭގެ ފަހުން ރައީސް ޑރ. މުހައްމަދު މުއިއްޒު ބޭހުގެ ދަތިކަމުގެ ސަބަބެއް ކަމުގައި ދެއްކެވީ، "މެޑިކަލް މާފިއާ" ނުވަތަ ސިއްހީ ހިދުމަތްތަކުގެ ވިޔަފާރި ކުރާ ފަރާތްތަކުން ގަސްތުގައި ބޭސް ނުގެނެއުމެވެ.

ރާއްޖެއިން މަދުވާ ބޭސްތައް ހޯދުމަށާއި މެދުނުކެނޑި، އަތްފޯރާ އަގެއްގައި މުހިންމު ބޭސްތައް ލިބޭނެ އިންތިޒާމު ހަމަޖެއްސުމަށްޓަކައި އެސްޓީއޯ އާއި އިންޑިއާގެ އެޗުއެލްއެލް ލައިފްކެއާއާ އެކު މިފަހުން ވަނީ އެއްބަސްވުމެއްގައި ސޮއިކޮށްފަ އެވެ.

"މި އެއްބަސްވުމުގެ ދަށުން ރާއްޖެއަށް ހޯދަން އުނދަގޫ ބޭސްތައް ލިބޭނެ އިންތިޒާމުތައް ހަޖެހިގެންދާނެ އެވެ،" އެސްޓީއޯއިން ނެރުނު ނޫސްބަޔާނެއްގައި ބުނެފައިވެ އެވެ.

"މިވަގުތު ރާއްޖެއަށް ބޭނުންވާ އަސާސީ ބޭހުގެ ދަތިކަމަށް ވަގުތީ ހައްލެއް ހޯދައިދެވިފަވާއިރު، އެޗްއެލްއެލް އާއެކު މި އައު ޕާޓްނަޝިޕްގެ މަގްސަދަކީ މިކަމަށް ދާއިމީ ހައްލެއް ހޯދައިދިނުމެވެ. އަދި ހުރިހާ ބޭހެއްވެސް ހުންނާނީ ޑަބްލިއުއެޗްއޯ މިންގަނޑުތަކާއި، ރާއްޖެއަށް ބޭސް އެތެރެކުރުމަށް ހަދާފައިވާ ގަވާއިދުތަކާއި އެއްގޮތަށެވެ."