ވީޑިއޯ ފެންނަނީ އުސޫލާ އެއްގޮތަށް ނައްތާލި އުޅަނދުތަކެއް: ޕޮލިސް

ހުނައިދާ ޔާސިރު

22 ސެޕްޓެމްބަރ 2026 - 09:46

0 comments

ސައިކަލެއް ޓްރަކަކުން ވައްޓާލާ މަންޒަރު ފެންނަ ވީޑިއޯގައިވާ އުޅަނދުތަކަކީ ނައްތާލުމަށް ރަސްމީކޮށް ހުއްދަ ދެވިފައިވާ އުޅަނދުތަކެއް ކަމަށް ފުލުހުން ބުނެފި އެވެ.

ފުލުހުންގެ ޓްރަކަކުން ސައިކަލެއް ވައްޓާލާ މަންޒަރުން ފެންނަ ވީޑިއޯއެއް ސޯޝަލް މީޑިއާގައި އާންމުވެ، ގިނަ ބައެއްގެ ފާޑުކިޔުންތައް އަމާޒުވުމާ ގުޅިގެން ފުލުހުން މިއަދު ނެރުނު ބަޔާނެއްގައި ބުނީ އެ ވީޑިއޯއިން ފެންނަ އުޅަނދުތަކަކީ ޓޯކޮށް ދޫކުރުމަށް ހަމަޖެހިފައިވާ މުއްދަތުގައި ވެހިކަލްތަގެ ވެރި ފަރާތްތަކުން ހަވާލުނުވުމުގެ ސަބަބުން ގާނޫނީ އަދި އިދާރީ ގޮތުން ފުރިހަމަ ކުރަން ޖެހޭ އެންމެހާ އިޖުރާއަތްތައް ފުރިހަމަ ކުރުމަށް ފަހު ނައްތާލުމަށް ރަސްމީކޮށް ހުއްދަދެވިފައިވާ ވެހިކަލްތަކެއް ކަމަށެވެ.

އަދި ވީޑިއޯއިން ފެންނަ މަންޒަރަކީ އެ ވެހިކަލްތައް ނައްތާލުމަށްޓަކައި ތިލަފުއްޓަށް ކުނީގެ ގޮތުގައި ގެންދިޔުމަށް ހުޅުމާލެ ފޭސް ދޭކުން ފުލުހުންނަށް އަލަށް ހަމަޖެހުނު ޓޯޔާޑަށް ގެންގޮސް ކުނީގެ ގޮތުގައި އެއްތަނަކަށް ޖަމާކުރަމުން ދިޔަ މަންޒަރު ކަމަށް ފުލުހުން ބުންޏެވެ.

ޓޯކުރާ ވެހިކަލްތަކަށް ގެއްލުން ލިބޭ ގޮތަށް ފުލުހުން އަމަލުކުރާ ކަމަށް ބުނެ މީގެ ކުރިން ވެސް މިފަދަ ވީޑިއޯތައް އާންމުކޮށް، ފާޑު ކިޔާފައިވެ އެެވެ.

މާލެ ސަރަހައްދުގެ މަގުތައް ތޮއްޖެހުން ކުޑަކުރުމުގެ ގޮތުން ގަވާއިހިލާފަށް ޕާކްކުރާ ވެހިކަލްތަކާއި ގިނަ ދުވަސްތަކެއް ވަންދެން މަގުމަތީގައި ބަހައްޓާފައި ހުންނަ ވެހިކަލްތައް ފުލުހުން ގެންދަނީ ޓޯކުރަމުންނެވެ. އަދި ޓޯކުރާ ވެހިކަލްތައް ނައްތައިލަނީ، ހަވާލުވާން މުހުލަތެއް ވެސް ދިނުމަށް ފަހު އެވެ.

ހާއްސަކޮށް ޓޯކުރެވެނީ އާންމު ދަތުރުފަތުރަށް ދަތިވާގޮތަށް ގޯޅިތަކުގެ ކަންމައްޗާއި މަގުގެ ދެފަރާތުގައި ޕާކުކުރާ އުޅަނދުތަކާއި، މިސްކިތްތަކާއި ސްކޫލް އަދި ހޮސްޕިޓަލް ފަދަ ޒަރޫރީ ސަރަޙައްދުތަކުގެ ކުރިމަތީގައާއި، ހިނގާ މީހުންނަށް ދަތިވާގޮތަށް ޕޭވްމަންޓް މަތީގައި ޕާކުކުރާ އުޅަނދުތަކެވެ. މީގެއިތުރުން ރަޖިސްޓްރީނުކޮށް ހުންނަ އުޅަނދުތަކާއި މަގުމައްޗަށް ދޫކޮށްލާފައިވާ ބާ އުޅަނދުތައް ވެސް ފުލުހުން ޓޯކުރެވެ އެވެ.

ޓޯކުރެވޭ އުޅަނދުތައް ދޫކުރެވެނީ ކަނޑައެޅިފައިވާ ޖޫރިމަނާއާއި، ޓޯކުރުމުގެ ހަރަދާއި، އުޅަނދު ބެހެއްޓުމުގެ ފީ ދެއްކުމަށްފަހު، ލިޔެކިޔުންތައް ހުށަހަޅައި ގާނޫނީ އިޖުރާއަތްތައް ފުރިހަމަކުރުމުންނެވެ.

މި މަސައްކަތުގެ ސަބަބުން މަގުތަކުގެ ތޮއްޖެހުން ކުޑަވެ، ހިނގާ މީހުންނަށް ރައްކާތެރިކަން ލިބިގެންދާނެތީ، ހަމައެކަނި ކަނޑައެޅިފައިވާ ޕާކިން ޒޯންތަކުގައި އުޅަނދު ޕާކުކުރުމަށް ފުލުހުން އިލްތިމާސްކުރެ އެވެ.