އައްޑުއާއި ފުވައްމުލަކުގެ ފެނާއި ނަރުދަމާގެ ހިދުމަތް ދޭން އެމްޑަބްލިއުއެސްސީއަށް

އިސްމާއިލް ރިޒާ

27 ސެޕްޓެމްބަރ 2026 - 20:20

0 comments

ފުވައްމުލަކާއި އައްޑޫގެ ފެނާއި ނަރުދަމާގެ ހިދުމަތާ އެމްޑަބްލިއުސްސީން ހަވާލުވާން ނިންމައި އެކަމާ ގުޅޭ ފްރޭމްވޯކް އެއްބަސްވުމެއްގައި މިއަދު ސޮއިކޮށްފި އެވެ.

މިކަމަށްޓަކައި މިއަދު ބޭއްވި ހާއްސަ ރަސްމިއްޔާތެއްގައި އެމްޑަބްލިއުއެސްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީއެވެ. އަދި ފެނަކަ ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހަސަން އެވެ.

އެއްބަސްވުމުގައި ސޮއިކުރެއްވުމަށް ފަހު ފަހުމީ ވިދާޅުވީ، އަންނަ މަހުގެ 13 އިގެ ކުރިން މަސައްކަތްތައް ނިންމައި ފުވައްމުލަކާއި އައްޑޫގައި ފެނާއި ނަރުދަމާގެ ހިދުމަތް ދޭން އެމްޑަބްލިއުއެސްސީން ފަށާނެ ކަމަށެވެ.

އޭނާ ވިދާޅުވި ގޮތުގައި އެއީ ފެނަކައިގެ ހިދުމަތް ދޭ ބައެއް ރަށްރަށުގެ ހިދުމަތްތައް އެމްޑަބްލިއުއެސްސީ އާއި ސްޓެލްކޯގެ ދަށަށް ބަދަލުކުރަން ރައީސް ޑރ. މުހައްމަދު މުއިއްޒު ނިންމަވާފައިވާ ނިންމެވުމުގެ ބައެކެވެ

ފެނަކައިގެ އެމްޑީ އަފީފް ވިދާޅުވީ ޚިދުމަތްތައް ބަދަލުކުރުމުގެ މަސައްކަތް ދެ ކުންފުނި ގުޅިގެން ވަރަށް ބޮޑަށް ކުރިއަށްދާ ކަމަށެވެ. އަދި "މި އެއްބަސްވުމުގެ ދަށުން ދެބައި މީހުން ސައިޓްތަކަށް ޒިޔާރަތް ކުރުމާއި ސައިޓްތައް ބެއްލެވުމާއި ސާވޭ ކުރެއްވުމާއި މިހެން ގޮސް ބައިވަރު ކަންކަން އަދި ހަމަޖެހިގެންދާނެ" ކަމަށް އޭނާ ވިދާޅުވި އެވެ.

ހަމައެއާއެކު ފެނަކައިން ދިން ހިދުމަތަށް ވުރެ ރަނގަޅަށް އެމްޑަބްލިއުއެސްސީން މި ހިދުމަތް ފޯރުކޮށްދޭނެ ކަމަށް އުންމީދު ކުރައްވާ ކަމަށް ވެސް ފަހުމީ ވިދާޅުވި އެވެ.

ރާއްޖޭގެ ދެ ވަނައަށް އެންމެ ބޮޑު އާބާދީ އޮންނަ އައްޑުއާއި 10000 އަށް ވުރެ ގިނަ މީހުން ދިރިއުޅޭ ފުވައްމުލަކުގައި ފެނުގެ ހިދުމަތް މެދުކެނޑުމާއި ބޯން ބޭނުންކުރާ ފެން ނުސާފުވުމުގެ މައްސަލަތައް ބޮޑުވެ، މިދިޔަ ނޮވެމްބަރު މަހު ފުވައްމުލަކުގެ ފެން ބިލުތައް ވެސް މައާފުކޮށްދީފައިވެ އެވެ.

ފެނަކައިގެ އޮޑިޓް ރިޕޯޓްގައި ވެސް ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި އެ ކޯޕަރޭޝަނުން މުދަލާއި ހިދުމަތް ހޯދުމުގައި ހިންގާފައިވާ ކޮރަޕްޝަންގެ މައްސަލަތައް ހިމަނާފައިވާއިރު އޭގެ ތެރެއިން އެއް މައްސަލާގައި ފެނަކައިގެ އޭރުގެ މެނޭޖިން ޑިރެކްޓަރު އަހުމަދު ސައީދަށް ޖަލު ހުކުމެއް ވެސް އިއްވި އެވެ.

މިވަގުތު އެ ކުންފުނީގައި 8،000 އަށް ވުރެ ގިނަ މުވައްޒަފުން އެބަތިއްބެވެ.