ރަޖިސްޓްރީނުކޮށް ހިންގާ މީޑިއާތަކުގެ މައްސަލަ ބަލަން އުސޫލެއް ހަދަނީ

އައިމިނަތު ޝިޔާޒާ

15 ފެބުރުއަރީ 2024 - 12:41

0 comments

ރަޖިސްޓްރީނުކޮށް ހިންގަމުންދާ އަދި ދޮގު ޚަބަރު ފަތުރާ ކަމަށް ބުނެ ތިން އޮންލައިން ނޫހަކަށް ފިޔަވަޅު އަޅަން މޯލްޑިވްސް މީޑިއާ ކައުންސިލް (އެމްއެމްސީ) އިން ނިންމައިފި އެވެ.

މައުލޫމާތު ސާފުނުކޮށް ހަގީގަތް އޮޅޭ ގޮތަށް މައުލޫމާތު ފަތުރާ މައްސަލައިގައި މީޑިއާ ކައުންސިލުން ކަންބޮޑުވުން ފާޅުކޮށް ނެރުނު ބަޔާނުގައި ބުނީ މީޑިއާގެ ގޮތުގައި ރަޖިސްޓްރީނުކޮށް ހިންގާ، "ދިޔަވަރު" އާއި "ކުރުސީ" އަދި "ދޮންއަމާ" ވެބްސައިޓުން ރައްޔިތުންނަށް ހަގީގަތް އޮޅޭ ގޮތަށް މައުލޫމާތު ފަތުރާ ކަމަށް ބުނެ ގިނަ ބަޔަކު ޝަކުވާ ކުރަމުން އަންނަ ކަމަށެވެ.

އެމްއެމްސީން ބުނީ އެ ތިން ވެބްސައިޓުން ރައްޔިތުންނަށް ހަގީގަތް އޮޅޭ ގޮތަށް ދުގި މައުލޫމާތު ފަތުރަމުންދާ އަންނަ ކަމަށް ބުނެ ގިނަ އަދަދެއްގެ ޝަކުވާތައް ލިބިފައިވާތީ ބެލި އިރު، އެ ތިން ވެބްސައިޓުގައި ވެސް އެފަދަ ޚަބަރުތައް ގެނެސްދީފައިވާ ކަމަށެވެ.

"މީޑިއާގެ ނަމުގައި ހަގީގަތާ ހިލާފު މައުލޫމާތުތައް ފަތުރަމުން އަންނައިރު އެއްވެސް ފިޔަވަޅެއް ނޭޅި އޮތުމަކީ ވެސް ކަންބޮޑުވުމެއް ކަމަށް މޮ ކައުންސިލުގެ ގިނަ މެމްބަރުން ދެކެމެވެ. އެހެންވެ ކައުންސިލުން ވަނީ ރަޖިސްޓްރީނުކޮށް ހިންގާ މީޑިއާތަކުގެ މައްސަލަތައް ބެލޭނެ ހަރުދަނާ ނިޒާމެއް އެކުލަވާލުމަށްޓަކައި ކަމާ ގުޅޭ އުސޫލެއް ހަދަން ފާސްކޮށްފައި،"

މީޑިއާ ކައުންސިލުން ބުނި ގޮތުގައި އެ މަސައްކަތް ކުރި އޮތް ދުވަސްތަކުގައި ކުރާނީ މީޑިއާތަކާއި ކަމާ ގުޅޭ ޖަމިއްޔާތަކާއި ދައުލަތުގެ އިދާރާތަކާއި މުވައްސަސާތަކާއި އާންމުންގެ ހިޔާލާ ވެސް އެކުގަ އެވެ.

އެމްއެމްސީ އިން އިތުރަށް ބުނީ ރަޖިސްޓްރީނުކޮށް ހިންގާ ނޫސްތަކުގެ މައްސަލަ ބަލާނެ ހަރުދަނާ އުސޫލެއް އެކުލަވާލުމަށް އެ ކައުންސިލުން ނިންމާލާފައިވާ ކަމަށެވެ. ރަޖިސްޓްރީކޮށްގެން ވިޔަސް އަދި ރަޖިސްޓްރީ ނުކޮށް ވިޔަސް ނޫހެއްގެ ގޮތުގައި ހިންގާނަމަ އެއީ "މީޑިއާ" ގޮތުގައި ބަލައި ފިޔަވަޅު އެޅުމުގެ ބާރު ކައުންސިލަށް ލިބިގެންވާ ކަމަށްވެސް ބަޔާނުގައިވެ އެވެ.