ބާރުތައް ހަނިކޮށް ޑިމޮކްރެސީއާ ދުރަށް ދަނީ ޕީޕީއެމް: ފައްޔާޒު

އިސްމާއިލް ރިޒާ

11 އޭޕްރީލް 2024 - 12:55

0 comments

ޕީޕީއެމް/ޕީއެންސީގެ ވެރިކަމުގައި ޑިމޮކްރަސީގެ އަސާސްތަކާ ދުރުވެ، ރައްޔިތުންގެ ބާރު ހަނިކުރާ ކަމަށާއި އަދި ލާމަރުކަޒީ ސިޔާސަތު އެފުށް މިފުށަށް ޖަހާކަމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

މަޖިލިސް އިންތިހާބުގެ ކެމްޕޭނުގައި ފުވައްމުލަކު މެދު ދާއިރާގެ ހަރުގެ ޖަލްސާގައި ރޭ ފައްޔާޒު ވިދާޅުވީ ޕީޕީއެމް/ޕީއެންސީގެ ވެރިކަންތަކުގައި ރައްޔިތުންގެ ހައްގުތައް ގެއްލިގެން ދިޔައިރުވެސް މަޖިލީހުގެ މެންބަރުން މަސައްކަތް ކުރެއްވީ ސަރުކާރު ދިފާއު ކުރުމަށް ކަމަށެވެ.

ޕީޕީއެމް އަށް މެޖޯރިޓީ އޮތް 18 ވަނަ ރައްޔިތުންގެ މަޖިލީހުގެ ބައެއް ހަނދާންތައް އާ ކުރައްވަމުން އެ މަޖިލީހުގެ މެންބަރެއްގެ ގޮތުގައި ވެސް ހުންނެވި ފައްޔާޒު ވިދާޅުވީ އެ މަޖިލީހަށް ސިފައިން ވަދެ މެންބަރުން ބޭރު ކުރިއިރު ސަރުކާރު ހިންގާ ޕާޓީގައި ތިއްބެވި މެންބަރުންގެ ކަންބޮޑުވުމެއް ނެތް ކަމަށާއި، އެ މެންބަރުން ދިޔައީ ސަރުކާރުގެ ނިންމުން ވެސް ރަނގަޅު ކަމަށް ގަބޫލުކުރައްވައި، ދިފާއު ކުރައްވަމުން ކަމަށެވެ.

"ރައްޔިތުން ވަރަށް ފުންކޮށް ވިސްނަން ޖެހޭ. މާލޭގައި ތިބެގެން ހުރިހާ ރަށެއްގައި ކަންކަން ނުހިންގޭނެ. ރައްޔިތުން ބޭނުންވާ ކަންކަން ރައްޔިތުންގެ މަންދޫބުން ރަށު ފެންވަރުން ފެށިގެން ގޮސް މަޖިލިސްއާ ހިސާބުން ސަރުކާރަކަށް ގެންގޮސްގެން، ތިން ބާރު ވަކިވެފައިވާ ނިޒާމުގެ ތެރެއިން ފުރިހަމަކޮށް އެކަން ކުރެވޭނީ،" އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވި އެވެ.

ފައްޔާޒު ވިދާޅުވީ ތަރައްގީ ކުރެވޭނީ ސަރުކާރުގެ މެމްބަރުން ހޮވައިގެން ކަމަށް ރައްޔިތުންނަށް ވިސްނުވަމުންގެންދާ ކަމަށެވެ. އެހެން ނަމަވެސް ސަރުކާރު މެމްބަރުން ތިބެ ތަރައްގީ ނުވާ އެތަށް ރަށެއް އެބައޮތް ކަމަށް އޭނާ ފާހަގަކުރެއްވި އެވެ. އަދި ރައްޔިތުންގެ ބާރު ދެމެހެއްޓޭނީ އިންތިހާބުތަކުން ކަމަށާއި ހުދުމުހުތާރު ވެރިކަމަކަށް ދިޔަ ނުދިނުމަށްޓަކައި އަބަދުވެސް ވޯޓުލުމުގެ ހައްގު ބޭނުން ކުރަންޖެހޭ ކަމަށާއި އިންތިހާބުތަކަށް ނުކުތުމާއި އެމްޑީޕީއަށް ވޯޓުލުން މުހިއްމު ކަމަށް އޭނާ ވިދާޅުވި އެވެ.