ތުރުކީގެ އޭރޯސްޕޭސް އިންޑަސްޓްރީއަށް ޓެރަރިސްޓް ހަމަލާއެއް

ހަސަން ހަލީމް

24 އޮކްޓޫބަރ 2024 - 11:23

0 comments

ތުރުކީ އަސްކަރިއްޔާގެ މައި ހިއްސާ އޮންނަ އެ ގައުމުގެ މުހިންމު ކުންފުންޏެއް ކަމަށްވާ ޓާކިޝް އެއަރޮސްޕޭސް އިންޑަސްޓްރީޒް (ޓީއޭއައި) ގެ މައި މަރުކަޒު ބޭރުގައި އިއްޔެ ދިން ޓެރަރިސްޓު ހަމަލާއެއްގައި ގިނަ ބަޔަކު މަރުވެ އެތައް ބަޔަކު ޒަހަމްވެއްޖެ ކަމަށް އިންޓީރިއާ މިނިސްޓްރީން ބުނެފި އެވެ.

ޒަހަމްވި މީހުންގެ ތެރޭގައި ވަރަށް ހާލުދެރަ ހަތަރު މީހަކު އޮތް ކަމަށް ވަޒީރު ވިދާޅުވި އެވެ.

އަލީ ޔެލިކަޔާ ވިދާޅުވި ގޮތުގައި ތުރުކީގެ ދިފާއީ ބާރުތަކުން ޓެރަރިސްޓުންގެ ދެ މީހަކު ވަނީ މަރާލާފަ އެވެ. އަދި އެއީ ކޮން ބައެއްތޯ ބަލަމުންދާ ކަމަށް ވެސް އޭނާ ވިދާޅުވި އެވެ.

މަންޒަރު ދުށް މީހުން ބުނާ ގޮތުން ޓެރަރިސްޓުން އޭރޯ ސްޕޭސް އިދާރާ ދޮށަށް ދިޔައީ ޓޭކްސީއެއްގަ އެވެ. އަދި އެ މަރުކަޒަށް ވަންނަން އުޅެފައި އެ ތަނުން އެކަކު އަމިއްލައަށް ގޮއްވާލީ އެވެ.

ޓީވީ ޗެނަލަކުން ބުނި ގޮތުގައި ހަމަލާ ދިނީ ޓެރަރިސްޓުންގެ ގްރޫޕަކުން ގޮސް ހަތިޔާރާ އެކު އިމާރާތްތަަށް ވަދެގަންނަން މަސައްކަތްކޮށްފަ އެވެ. ގޮއްވާލީ ހަށިގަނޑުގައި ބޮމެއް ހަރުކޮށްގެން އުޅުނު މީހެއް ކަމަށް ބުނެފައިވެ އެވެ.

ޓީއޭއައިގެ ވެބްސައިޓްގައިވާ ގޮތުން ހަތިޔާރު އުފައްދާ މި ބޮޑު ކުންފުނީގައި 15،500 މީހުން ވަޒީފާ އަދާކުރާ އިރު، ފަސް މިލިއަން އަކަމީޓަރުގެ ސަރަހައްދެއް ހިމެނޭ ގޮތަށް ބޮޑު ޕްރޮޑަކްޝަން ސައިޓެއް ހުރެ އެވެ.