ހުކުރު ހުތުބާތަކުގެ އިނގިރޭސި ތަރުޖަމާ ފޮތެއް ނެރެފި

އަލީ ރާޒީ

06 މެއި 2025 - 14:22

0 comments

މިދިޔަ އަހަރުގެ ހުކުރު ހުތުބާތަކުގެ އިނގިރޭސި ތަރުޖަމާ ހިމެނޭ ފޮތެއް އިސްލާމިކް މިނިސްޓްރީން ނެރެފި އެވެ.

މިނިސްޓްރީއިން ވަނީ ޚުތުބާގެ އިނގިރޭސި ތަރުޖަމާ ފޮތް މިނިސްޓްރީގެ ވެބްސައިޓުން ލިބެން ހުންނާނެ ކަމަށް ބުނެފައެވެ.

މިނިސްޓްރީގެ އިސްލާމިކް ވަގުފު ލައިބްރަރީގައި އާންމުކޮށްފައިވާ މި ފޮތުގައި 35 މައުޟޫއަކާ ގުޅޭ ގޮތުން ކިޔާފައިވާ ހުތުބާ ހިމެނެ އެވެ.

އޭގެ ތެރޭގައި ސިހުރާއި ޝިރުކުގެ ނުބައިކަމުން ރައްކާތެރިވުމާއި ފަލަސްތީނުގެ ރައްޔިތުންނާ މެދު އިސްލާމީ އުއްމަތުގެ ޒިންމާތަކާއި ގެވެށި އަނިޔާ އާއި ޖުވާގެ ނުބައިކަމާއި އާއިލީ ގުޅުން ދެމެހެއްޓުމުގެ އިތުރުން އަނބިދަރިންނަށް ހަރަދު ދިނުން ފަދަ ކަންކަމާ ގުޅޭ ހުތުބާތައް ހިމެނެ އެވެ.

ހުކުރު ޚުތުބާގެ އިނގިރޭސި ތަރުޖަމާ ޓީވީއިން ފެންނަ ގޮތަށް މިނިސްޓްރީއިން ހަދާފައި ވަނީ ނިމިދިޔަ 2024 ވަނަ އަހަރުގެ އޮގަސްޓު މަހުގެ ތެރޭގައެެވެ.

އިނގިރޭސިބަހުގެ އިތުރުން ބަންގާޅު ބަހުން ވެސް ޚުތުބާގެ ތަރުޖަމާ ލިބޭނެ އިންތިޒާމު މިނިސްޓްރީއިން ވަނީ ހަމަޖައްސައިފައެވެ. ނަމަވެސް ޓީވީތަކުން އަރާނީ ހަމައެކަނި އިނގިރޭސި ސަބްޓައިޓަލްއެވެ.