ވޯޓު ހޯދަން ހިނގާއިރު މިކަންކަން ރަނގަޅު ކޮށްލަން ވާނެ!

މަރިޔަމް އަނާ

17 ޑިސެމްބަރ 2025 - 17:08

0 comments

ނިމުނު ރިޔާސީ އިންތިހާބާއި މަޖިލިސް އިންތިހާބު ވެސް ރައްޔިތުން ދިނީ ރައީސް ޑރ. މުހައްމަދު މުއިއްޒު ވިދާޅުވި ފަދައިން ނެވެ. އެމަނިކުފާނު ސަރުކާރު ހިންގަން ފަސޭހަ ވާނެ މީހުން ނަށެވެ. ނަމަވެސް ރިޔާސީ ދައުރުން ދެ އަހަރު ވެގެން ދިޔައިރު ރައީސް މުއިއްޒު ސަރުކާރުން މިހާރު އަވަދި ނެތި އެ އުޅެނީ އެހެން ސިޔާސީ ޕާޓީތައް ފަދައިން އަންނަ ލޯކަލް ކައުންސިލް އިންތިހާބު ބޯމަތިވާތީ ވޯޓު ހޯދުމަށެވެ.

އިދިކޮޅުގައި އޮތް ޕާޓީއަށް ވުރެ ސަރުކާރުގައި ތިބޭ ބަޔަކަށް ރައްޔިތުންނަށް ކަމެއް ކޮށްދޭން ފަސޭހަވާނެ އެވެ. އެއީ ދައުލަތުގެ ހަޒާނާގެ ތަޅުދަނޑި އޮންނާނީ ވެރިކަން ކުރާ ސިޔާސީ ޕާޓީގެ "ރައީސުލްޖުމްހޫރިއްޔާ" އަތުގައި އެވެ. އެހެން ކަމުން ނިމުނު ދެ އިންތިހާބަށް ވީ ވައުދު ފުއްދުމަށް އިލްތިމާސްކޮށް ނަސޭހަތްތެރިވަމެވެ. އަދި ރައްޔިތުން އުޅޭ ދަތިހާލު ދެކި އެކަމަށް ދާއިމީ ހައްލެއް ހޯދައި ދިނުމަށް މަސައްކަތް ކުރުމަށް އިލްތިމާސް ކުރަމެވެ.

ރައްޔިތުންގެ މަޖިލީހުގެ ފުރިހަމަ ކޮންޓްރޯލް އާއިއެކު މިހާރު ރާއްޖެއަށް ދިމާވެފައިވާ ގިނަ މައްސަލަތަކުގެ "ހައްލު" އޮތީ ވެރިމީހާ އަތުގައި އެވެ. އަންނަ ލޯކަލް ކައުންސިލް އިންތިހާބުގެ ކުރިން މިކަންކަން ރަނގަޅު ކުރެވޭތޯ ބަލާށެވެ. ރައްޔިތުންގެ ބައެއް ޝަކުވާތައް މި ލިޔުމުގައި ހިއްސާ ކޮށްލާނަމެވެ.

މުހިންމު ބޭސްތައް ރާއްޖެއަކުން ނުލިބޭ

ރައީސް މުހައްމަދު މުއިއްޒު ސިލްސިލާކޮށް މިހާރު މާލޭގައި ބާއްވަމުންދާ "ރައްޔިތުންގެ ބައްދަލުވުން" ތަކުގައި، އެންމެ އާންމުކޮށް އިވޭ ވާހަކައަކީ، ރާއްޖެއިން ލިބޭ ސިއްހީ ފަރުވާގެ ދޯހަޅި ކަމުގެ ވާހަކަތަކެކެވެ.

މީގެ ތެރެއިން ވެސް އެންމެ ގިނަ ބައެއްގެ ކަންބޮޑުވުން އޮންނަ އެއް މައްސަލައަކީ، ބޮޑެތި ދާއިމީ ބަލިތައް ތަހަންމަލުކުރަންޖެހޭ މީހުން ވެސް ހިމެނޭހެން، ބަލިމީހުން ބޭނުންވާ މުހިންމު ބޭސް ރާއްޖެއިން ލިބެން ނުހުންނާތީ އެވެ.

"އަޅުގަނޑު އެންސްޕާ ތެރޭގައި ހުރެ އަޅުގަނޑުގެ އަމިއްލަ ފޯނުން، [އެންސްޕާގެ ސީއީއޯ] ހީނާ [ވަލީދަށް] ގުޅާލިން. ތިން ފަހަރު ގުޅީމާ ވެސް ވޮއިސް މެއިލަށްލީ. ފޯނެއް ނުނަގާ. އެހެންވީމާ އަޅުގަނޑު އުންމީދުކުރަނީ އަޅުގަނޑުމެންގެ ރައީސް[މުހައްމަދު މުއިއްޒު]ހެން ހުރިހާ މިނިސްޓަރުން ވެސް އަދި ކުންފުނިތަކުގެ ވެރިން ވެސް ރައްޔިތުންގެ އަޑު ގާތުން އައްސަވާ، ރައްޔިތުން އެދޭ ފަދަ ކަންކަން ކޮށްދެއްވާށޭ،" ގަލޮޅު ރައްޔިތުންނާއެކު ރައީސް މުއިއްޒު ރޭ ބޭއްވި ބައްދަލުވުމުގައި ވާހަކަ ދެއްކި މީހަކު ބުންޏެވެ.

މި ބައްދަލުވުމުގައި ހަމަ މި ޝަކުވާ ކުރި އެހެން މީހަކު ވެސް ބުނީ، އާދައިގެ ކަމަކަށް ވެސް ރާއްޖޭގެ ހޮސްޕިޓަލުތަކުން ފަރުވާ ނުލިބޭ ކަމަށާއި އެކަމަށް ބޭނުންވާ ކޮލެޓީ ބޭހެއް ވެސް ނުލިބޭ ކަމަށެވެ.

އީފާސްއިން ޕޯޓަލް މެދުވެރިކޮށް އެފަދަ ބޭސްތަކަށް އެދެންޖެހޭތީ ދިމާވާ ދަތިތައް ވެސް ބޮޑު ކަމަށް އޭނާ ބުންޏެވެ.

އޭނާ ބުނިގޮތުގައި، "ހަމަ ހަގީގަތުގައި ވެސް ކޮލިޓީ ބޭސް ރާއްޖެއަަކަށް ނުގެނެ" އެވެ. އެކަން އޭނާގެ ތަޖުރިބާއިން ކިޔައިވެސް ދިނެވެ. އެގޮތުން ބުނީ، ޗިކަންގުންޔާ ޖެހިގެން ފައިދުޅަވެ، ފައިނޭޅޭ ހިސާބަށް ދިއުމުން ދެ މަސް ދުވަސް ވަންދެން ރާއްޖޭގެ ތިން ހޮސްޕިޓަލަކުން ފަރުވާ ކުރުމަށް މަސައްކަތް ކުރި ކަމަށެވެ. އެކަމަކު ދެ މަސް ދުވަސްވީއިރު ވެސް، އެކަމަށް ފަރުވާއެއް ނުލިބުނު ކަމަށް އޭނާ ބުންޏެވެ. އޭނާއަށް ފައިއެޅޭވަރުވީ ލަންކާއަށް ގޮސް ހޯދި ފަރުވާއިން ކަމަށް ބުންޏެވެ.

މީގެ އިތުރުން، ރާއްޖެއިން ނުލިބޭ ބޭސްތައް އީފާސް މެދުވެރިކޮށް ގެންނަންޖެހުމަކީ، އޭނާ ކަހަލަ ކިޔައިވައިގެން ތިބޭ މީހުންނަށް ވެސް އުނދަގޫ ކަމަަކަށްވާއިރު، އުމުރުން ދުވަސްވީ މީހުންނަށް އެކަން ކުރަން އުނދަގޫވާނެ ވަރު އިހުސާސްކޮށްލަން އޭނާ އެދުނެވެ.

ސިނަމާލެ، މާލެ ހިޔާ ވީރާނާވެފައި

ސިނަމާލެ ފްލެޓުތައް ލިބުނު މީހުންނާ ހަވާލުކޮށް އެ ތަނުގައި މީހުން ދިރިއުޅެން ފެށީ 1990ވަނަ އަހަރުގެ ޖުލައި މަހެވެ. މިހާރު އެ ސިނަމާލެ ފްލެޓުތަކަށް 32 އަހަރު ވެދާނެއެވެ.

ނަމަވެސް މިއަދު އެ އެ ފްލެޓުތައް ހުރީ ވަރަށް ބޮޑަށް ވީރާނާވެފައެވެ. އެގޮތުން ބޯކޮށް ވާރޭ ވެހޭނަމަ އެންމެ މަތީ ފްލޯއަށް ފެން ފައިބައެވެ. ތަނުގެ ރައްކާތެރިކަމުގެ ގޮތުން ބަލާނަމަ ގިނަ މައްސަލަތަކެއް ވެސް އެ ފްލެޓުތަކުން ވަނީ ފާހަގަވެފައެވެ.

ސިނަމާލެ އާއި މާލެ ހިޔާ ފްލެޓްތައް ތަޅާލައި، އެތަނުގައި ބޯހިޔާވަހިކަމުގެ އާ މަޝްރޫއެއް ހިންގުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. އެ މަޝްރޫއު ހިންގަން މާލޭ މޭޔަރު ކަމުގައި ހުންނެވިއިރު ފާސް ވެސް ކުރި އެވެ. އެމަނިކުފާނު އޭރުގެ ވިސްނެވުމަކީ މިހާރު އެތަނުން ފްލެޓް މިލްކުކޮށްފައިވާ މީހުންނަށް އާ މަޝްރޫއުން ހިލޭ ފްލެޓް ދީ، އިތުރު ބަޔަކަށް ވެސް ފްލެޓް ދިނުމެވެ.

ގަލޮޅު ރައްޔިތުންނާ ބައްދަލުކުރެއްވުމަށް ރައީސް ރޭ ބޭއްވެވި ބައްދަލުވުމުގައި އެ ތަނަށް ދިޔަ ގިނަ ބަޔަކު ވަނީ ފްލެޓްތަކުގެ ހާލަތު ބަޔާންކޮށް ވަރަށް ބޮޑަށް ޝަކުވާ ކޮށްފަ އެވެ.

އެގޮތުން އެކަކު ބުނީ، އެތަންތަނުގެ ހާލަތު ބަލައިލަން އެއްވެސް ވެރިއަކު މިވީ އަހަރެއްހާ ދުވަސް ތެރޭ ވެސް ޒިޔާރަތްކޮށްލާފައި ނުވާ ކަމަށާއި ކައުންސިލުން ވެސް އެތަނުގެ ހާލަތު ބަލަމުން ނުދާ ކަމަށެވެ.

"މާލެ ހިޔާގެ 1، 2، އަދި ސިނަމާލެ ތެރެވެސް ވަަރަށް ހާލު ވަރަށް ދެރަ. އެއްވެސް ވެރިއަކު މިވީ އަހަރެއްގެ ތެރޭގައި[އައިސްފައެއްނުވޭ،] ސިޓީ ކައުންސިލުން ވެސް އެއްވެސް ބޭފުޅަކު އަންނަ ތަނެއް ނޫން އެއީކީ. އެއްވެސް ބަޔަކު ނާދޭ، ކައުންސިލަށް ހޮވިފައި ހުރި ބޭފުޅަކީ ވެސް އަންނަ މީހެއް ނޫން. އެންމެ ފަހުން އައީވެސް [ރައީސް މުހައްމަދު]މުއިއްޒު ޑޯޓު ޑޯ ކުރެއްވި ދުވަހެއްގައި،" އޭނާ ބުންޏެވެ.

މާލޭ ހިޔާ 1 ފްލެޓުގައި ދިރިއުޅޭ އެހެން މީހަކު ވެސް ބުނީ، އޭނާ ދިރިއުޅޭ އިމާރާތް ވަރަށް ބޮޑަށް ވީރާނާވެ، ހަލާކުވެފައިވާއިރު އެ މައްސަލާގައި ކައުންސިލާ ވާހަކަދެއްކުމުން އެތަނުގެ މަރާމާތު މަސައްކަތްތައް ކުރަން ކުންފުންޏަކާ ހަވާލުކޮށްފައިވާ ކަމަށް ބުނެފައިވާ ކަމަށެވެ. އެކަމަކު އެ ކުންފުނީގެ ފަރާތުން ފަސް ފްލެޓުގެ މަސައްކަތްތައް ކުރަން ތިބެނީ އެންމެ ތިން ބިދޭސީން ކަމަށާއި އެހެންވެ އެކަމުގައި ވެސް ބޮޑެތި ދަތިތަކެއް ކުރިމަތިވާ ކަމަށް އޭނާ ބުންޏެވެ.

ކަޅު ބާޒާރުގައި ޑޮލަރެއްގެ އަގު 20ރ. އަށް

އިތުރު ރައްޔިތެއްގެ ކަންބޮޑުވުމަކަށްވީ ޑޮލަރު އަގު އުފުލެމުން ދިއުމެވެ. އޭނާ ވިދާޅުވީ ރައީސް ނުއުފުލޭނެ ކަމަށް ވިދާޅުވިޔަސް ޑޮލަރު އަގު އަތުފަތު ނުޖެހި ބޮޑުވާ ކަމަށެވެ. ރާއްޖޭގެ ރަސްމީ ޑޮލަރު ރޭޓަކީ 15.42 ރ. އެވެ. މިއަދު ކަޅު ބާޒާރުގައި ޑޮލަރެއް ލިބެން ހުރީ އެ ރޭޓަށްވުރެ 4.78ރ. ބޮޑުކޮށެވެ. މިއީ އެތައް ބަޔަކަށް ހައިރާންކަން ގެނުވި އަގެކެވެ. ސްކޫލް ބަންދާއި ހައްޖު މޫސުން ކަހަލަ ދުވަސްވަރު ދިވެހިން ޖެހެނީ ޑޮލަރު ފަހާ ދުވާށެވެ.

ރައީސް ޑރ. މުހައްމަދު މުޢިއްޒު ވެސް ވަނީ ޑޮލަރުގެ އަގު މަތި ނުވާނެ ކަމަށާއި ދެން ދާނީ ތިރިއަށް ކަމަށް ވިދާޅުވެފައެވެ. ނަމަވެސް އަދިއަދަށް ވެސް އެކަން ކާމިޔާބު ވާގޮތެއް ނުވެއެވެ.

މިދިޔަ އޭޕްރީލް މަހު ރައީސް މުއިއްޒު ވަނީ ރާއްޖެއަށް ދިމާވެފައި އޮތް ޑޮލަރުގެ މައްސަލަ ހައްލުކުރެވި، ޑޮލަރެއްގެ އަގު ބޭންކް ރޭޓަށް 2027 ނިމުމުގެ ކުރިން ދަށްކުރެވޭނެ ކަމަށެވެ. އޭގެ ކުރިން ރައީސް ވަނީ ޑޮލަރުގެ ރޭޓު ދެން ވާނީ ދަށްކަމަށާއި އިތުރަށް މަތިނުވާނެ ކަމަށް ވިދާޅުވެފަ އެވެ.

އެކަމަކު، އެމެރިކާ ޑޮލަރެއްގެ އަގު އަންނަނީ ދުވަހުން ދުވަހަށް ބޮޑުވަމުންނެވެ.

މާލޭގެ ފަސް އަވަށުގެ ރައްޔިތުންގެ ދުލުން އެ އުދާސްތައް ބޭރުކުރަމުންދިޔައިރު، ރައީސްގެ ވައުދުތައް ފުއްދަން ނުވަތަ ސިޔާސީ އެޖެންޑާ ފުރިހަމަ ކުރަން ސުމާރެއް ނެތް މިންވަރަށް ސިޔާސީ މުވައްޒަފުން އައްޔަނުކޮށްފައި އެބަ ތިއްބެވެ. ދެން ކުރަންވީ ކަމަކީ ރައްޔިތުންގެ ޝަކުވާގެ އަޑުން އެމީހުންގެ ހިތައް ތަސައްލީއެއް ހޯދައި ދިނުމަށް އިހްލާސްތެރި ހިތަކައިގެން މަސައްކަތް ކުރުމެވެ. ވައުދު ފޮތް މަތާރަންފިލާ މާތީ އޮތުމަކުން ރައްޔިތުންގެ ހިތަށް ލިބޭނެ ތަސައްލީއެއް ނެތެވެ. ރައްޔިތުންގެ މަޖުބޫރީ ހާލަތްތަކާއި ފަގީރުކަމުގެ ނާޖާއިޒު ފައިދާ ނަގައިގެން، އިތުރު ދައުރެއް، އިތުރު އިންތިހާބެއްގެ ވޯޓުގެ ވާހަކަ ދައްކަންވާނީ ނިމުނު ދެން އިންތިހާބަށް ވީ ވައުދު ފުއްދާފަ އެވެ.