އީރާނަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު 1،000އަށްވުރެ މައްޗަށް

ހުނައިދާ ޔާސިރު

05 މާޗް 2026 - 10:56

0 comments

އެމެރިކާ އާއި އިޒްރޭލުން އިރާނަށް ބޮން އަޅައި ފެށި ހަނގުރާމައިގައި މިހާތަނަށް ޝަހީދުވި މީހުންގެ އަދަދު 1،000 އިން މައްޗަށް އަރައިފި އެވެ.

އިރާނުގެ ދައުލަތުގެ މީޑިއާއިން ރިޕޯޓުކުރާ ގޮތުގައި މި ހަމަލާތަކުގައި މިހާތަނަށް 1،045 މީހުން ވަނީ ޝަހީދުވެފަ އެވެ.

ފާއިތުވި ފަސް ދުވަހުގެ ތެރޭގައި، އީރާނުގެ 2،000 އެއްހާ ޢަމާޒަކަށް އެމެރިކާ އާއި ޔަހޫދީން ގުޅިގެން ހަމަލާތައް ދީފައިވާއިރު، އެ ހަމަލާތަކުގައި އީރާނުގެ ރޫހީ އެންމެ މަތީ ވެރިޔާ އާޔަތުﷲ އަލީ ޚާމަނާއި އާއި އެމަނިކުފާނުގެ އާއިލާގެ ބޭފުޅުންތަކެއް ވެސް ވަނީ ޝަހީދުކޮށްލައިފަ އެވެ.

އެމެރިކާއާއި އިސްރާއީލުން އީރާނަށް ހުއްޓުމެއްނެތި ވައިގެ މަގުން ގަދަފަދަ ހަމަލާތައް ދެމުން ގެންދާއިރުވެސް އީރާނުން ގެންދަނީ އިސްރާއީލުގެ އެންމެ އެތެރެއަށާއި އަރަބި ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ވަރުގަދައަށް ރައްދު ހަމަލާތައް ދެމުންނެވެ.

އީރާނަށް ލިބޭ ގެއްލުންތައް ބޮޑުނަމަވެސް އީރާނުން އިސްރާއީލަށް ދޭ ގަދަފަދަ ހަމަލާތަކުން އިސްރާއީލަށް ލިބޭ ގެއްލުންތައްވެސް ކުޑައެއް ނޫނެވެ. އީރާނުގެ ހަމަލާތަކުން ލިބޭ ގެއްލުންތައް ފޮރުވަން އިސްރާއީލު ގިނަ މަސައްކަތްތަކެއް ކުރެއެވެ. ނަމަވެސް ލީކުވެފައިވާ ފޮޓޯތަކުން އިސްރާއީލަށް ލިބެމުންދަނީ އެ ގައުމުގެ މުޅި ހަޔާތުގައިވެސް ނުލިބޭފަދަ ބޮޑެތި ގެއްލުންތަކެއްކަން ވަނީ ހާމަވެފަ އެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވީ އީރާނާ ދެކޮޅަށް ކުރާ ހަނގުރާމައިގައި އެމެރިކާ ކުރިހޯދަމުން ދާ ކަމަށެވެ. ނަމަވެސް މި ހަނގުރާމައިގައި މިހާތަނަށް އެމެރިކާގެ ހަ ސިފައިން މަރުވެފައިވާތީ އެކަމާ ހިތާމަކުރައްވާ ކަމަށް އޭނާ ވިދާޅުވި އެވެ. އަދި އީރާނަށްވުރެ ގިނަ ދުވަހު ހަނގުރާމައިގައި ދެމިއޮތުމުގެ ގާބިލުކަން އެމެރިކާއަށް ލިބިގެންވާ ކަމަށްވެސް އޭނާ ވިދާޅުވި އެވެ.