އުމަރު ޒާހިރު އަވަހާރަވެއްޖެ

އަލީ ރާޒީ

20 ޑިސެމްބަރ 2021 - 14:41

0 comments

އުމަރު ޒާހިރު -- ފޮޓޯ: ސަން އޮންލައިން

ނިޝާން އިއްޒުއްދީނުގެ އިއްޒަތުގެ ވެރިޔާ އޮނަރަބަލް އުމަރު ޒާހިރު ދެންމެ އަވަހާރަވެއްޖެ އެވެ.

އެމަނިކުފާނު އަވަހާރަވީ ކޮވިޑް ބަލީގައި ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން އަންނަނިކޮށެވެ. އަވަހާރަވިއިރު އުމުރުފުޅަކީ 85 އަހަރެވެ.

އަވަހާރަވިއިރު، އަންހެން ބޭފުޅަކާއި ކާފަ ދެ ކުދިން ދުނިޔޭގައި އެބަތިއްބެވި އެވެ.

ޢުމަރު ޒާހިރަކީ ޤައުމީ ބޮޑެތި މަސައްކަތްތައް ޢަމަލީގޮތުން ހިންގެވުމާއި އެމަސައްކަތްތައް ހިނގާނުހިނގާގޮތް ބެއްލެވުމާއި، އިޖުތިމާޢީ އަދި ޤައުމީ އެންމެހައި ކަންކަމުގައި ޙަރަކާތްތެރިވެވަޑައިގަތުމުގެ ލާމަސީލު ނަމޫނާ ޝަޚްޞިއްޔަތެކެވެ. އެމަނިކުފާނު ދުނިޔޭގެ އަލިކަން ދެކެވަޑައިގަތީ 26 އޮކްޓޫބަރު 1936ގައެވެ.

އެމަނިކުފާނު ވަނީ ދިވެހި ދަޢުލަތަށް 50 އަހަށްވުރެ ގިނަ އަހަރު ޚިދުމަތް ކުރައްވާފައެވެ. އެގޮތުން 1953 އިން ފެށިގެން 2008ވަނަ އަހަރާހަމައަށް ސަރުކާރުގެ އެކި ފަންތީގެ 26 މަޤާމެއް ފުރުއްވާފައިވެއެވެ. ޢުމަރު ޒާހިރަށް، ނިޝާން ޢިއްޒުއްދީންގެ ޢިއްޒަތްތެރި ވެރިކަމުގެ ލަޤަބު ލިބިވަޑައިގެންނެވީ 2008ވަނަ އަހަރުގެ ނޮވެމްބަރުމަހުގެ 10ވަނަ ދުވަހުއެވެ.

އުމަރު ޒާހިރަށް ދިވެހި ދައުލަތުން ވަނީ ނިޝާން ޢިއްޒުދީންގެ ޢިއްޒަތުގެ ޝަރަފް އަރުވައިފަ އެވެ. އަދި 1990 ވަނަ އަހަރު މިނިވަން 25 ގެ އިނާމު ވެސް ދެއްވި އެވެ. އަދި ކުޅިވަރަށް ކޮށްދިން ހިދުމަތުގެ އަގުވަޒަންކޮށް "މިހާރު އެވޯޑްސް" ގައި ވަނީ "ޒާހިރު ނަސީރު" އެވޯޑް ދެއްވައިފަ އެވެ.

އުމަރު ޒާހިރަކީ ދިވެހި ކުޅިވަރަށް އަގުނުކުރެވޭ ފަދަ ހިދުމަތްތަކެއް ކުރައްވާފައިވާ ޒާހިރު ނަސީރުގެ ކޮއްކޯފުޅެވެ.

އުމަރު ޒާހިރު އަވަހާރަވުމާއި ގުޅިގެން ސަރުކާރުގެ އިސްވެރިންނާއި ސިޔާސީ ޕާޓީތަކާއި ޕާޓީތަކުގެ ލީޑަރުން އަދި ރައްޔިތުންގެ މަޖިލީހުގެ މެންބަރުންނާއި ވަރަށް ގިނަ އަދަދެއްގެ އާންމު ރައްޔިތުން ގެންދަނީ ހެޔޮ އެދުމުގެ ޝުއޫރުތައް ފާޅުކުރަމުންނެވެ.