ކެންޑިޑޭޓުންގެ ހައްގުތަކަށް އުނިވާ ގޮތަށް ކެމްޕެއިން ކުރާނަމަ ފިޔަވަޅު އަޅާނަން: އީސީ

މަރިޔަމް އަނާ

15 އޭޕްރީލް 2024 - 17:14

0 comments

އަންނަ ހަފުތާގައި ބާއްވާ މަޖިލިސް އިންތިހާބުގެ ކެމްޕޭން ތެރޭގައި އެންޓީ-ކެމްޕޭން ކުރާކަމުގެ ޝަކުވާތައް ލިބެމުންދާ ކަމަށާއި އެފަދަ ފަރާތްތަކަށް ފިޔަވަޅު އަޅާނެކަމުގެ އިންޒާރު އިލެކްޝަން ކޮމިޝަން (އީސީ) އިން ދީފި އެވެ.

އީސީން މިއަދު ނެރުނު ބަޔާނެއްގައި ބުނީ މަޖިލިސް އިންތިހާބުގައި ކެންޑިޑޭޓުންނަށް ތާއީދު ހޯދަން ކުރާ މަސައްކަތުގައި އެންޓި ކެމްޕެއިންގެ އަމަލުތައް ފެންނަމުންދާ ކަމަށާއި ތާއީދު ހޯދުމަށް ބޭނުން ކުރާ ޕޯސްޓަރުތަކާއި ބެނާތަކުގައި ވެސް ކެންޑިޑޭޓެއްގެ އިންތިހާބީ ހައްގަށް އުނިކަން ލިބޭފަދަ މެސެޖުތައް ދައުރު ކުރަމުންދާ ކަމަށެވެ.

ކެންޑިޑޭޓުންގެ އިންތިހާބީ ހައްގަށް އުނިކަން އަތުވެދާނެ ފަދަ އެއްވެސް ކަމެއް ކުރުމާއި ކެންޑިޑޭޓަކާ ބެހޭ ގޮތުން ދޮގު މައުލޫމާތު ފެތުރުމަކީ އިންތިހާބުތަކާ ބެހޭ އާންމު ގާނޫނުން މަނާ ކަމެއް ކަމަށް އެ ކޮމިޝަނުން ބުންޏެވެ.

އެ ސުލޫކީ މިންގަނޑަށް ތަބާވުމަށް އިލްތިމާސް ކުރާ ކަމަށް ވެސް އީސީން ބުންޏެވެ.

"ގަވައިދު ނަންބަރު 2020/R-48 (އިންތިހާބުތަކާބެހޭ އާންމު ގަވައިދު) ގެ 19 ވަނަ މާއްދާގައި ބަޔާންކުރާ ސުލޫކީ މިންގަނޑަށް ތަބާވުމަށް ހުރިހާ ކެންޑިޑޭޓުންނަށް އިލްތިމާސްކުރަން،" އީސީގެ ބަޔާނުވައިވެ އެވެ.

އީސީން މިހާރު ވެސް އަންނަނީ މަޖިލިސް އިންތިހާބުގައި ވާދަކުރާ ޕީއެންސީގެ ކެންޑިޑޭޓުންގެ ކެމްޕެއިން ޖަލްސާތަކުގައި ވަޒީފާގެ ބިރު ދައްކާ މައްސަލައެއް މިހާރު ބަލަމުންނެވެ.

އިންތިހާބާ ގުޅޭ 40 އަށްވުރެ ގިނަ މައްސަލަ އެ ކޮމިޝަނުން ބަލައި ނިންމާފައި ވީނަމަވެސް މިހާތަނަށް އެއްވެސް މައްސަލައަކާ ގުޅިގެން އީސީއިން ފިޔަވަޅެއް ނާޅަ އެވެ.

މި މައްސަލާގައި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ވެސް ވަނީ ފާހަގަކޮށް އެފަދަ އަމަލުތައް ހުއްޓާލުމަށް ގޮވާލައިފަ އެވެ.