މޫސުން ގޯސްވެ، ބުޅާތައް ރައްކާތެރި މާހައުލަކަށް ބަދަލު ކުރަން ފަށައިފި

އަލީ ރާޒީ

14 އޯގަސްޓް 2024 - 00:10

0 comments

މޫސުން ގޯސްވުގެ ސަބަބުން، މާލޭ މަގުމަތީގައި އުޅޭ ބުޅާތައް ވަގުތީ ގޮތުން ރައްކާތެރި މާހައުލަކަށް ބަދަލު ކުރުމުގެ މަސައްކަތް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ކުރަންފަށައިފި އެވެ.

އެ ވުޒާރާއިން ވަނީ ވުޒާރާގެ ޓީމެއް އެ މަސައްކަތުގައި ހަރަކާތްތެރިވާ ފޮޓޯތަކެއް "އެކްސް"ގައި އާންމު ކޮށްފައެވެ. އަދި ވުޒާރާއިން ބުނީ، ވިއްސާރާގައި މާލޭ މަގުމަތީގައި އުޅޭ ބުޅާތައް ވަގުތީ ގޮތުން ރައްކާތެރި މާހައުލަކަށް ބަދަލު ކުރުމުގެ މަސައްކަތް ފަށާފައިވާ ކަމަށެވެ. ނަމަވެސް މިކަމުގެ އިތުރު ތަފްސީލެއް ހާމަކޮށްފައެއް ނުވެއެވެ.

މީގެކުރިން ވެސް މާލޭގައި ފެންބޮޑުވުމުގެ ސަބަބުން ބުޅާތައް ގެނބިގެން މަރުވާތީ އެބުޅާތައް ވަގުތީ ހިޔަލަކަށް ބަދަލު ކުރުމުގެ މަސައްކަތް އެ މިނިސްޓްރީން އެންޖީއޯތަކާ ގުޅިގެން ކޮށްފައިވެއެވެ.

މިއަދު މެންދުރު މާލެއަށް ވެހެން ފެށި ވާރޭ އަދިވެސް މެދުކެނޑިފައި ނުވާއިރު މާލޭގެ މަގުތަކުގައި ހިނގާބިނގާވެ އުޅެން ދަތިވާ ވަރަށް ވަނީ ފެން ބޮޑުވެފަ އެވެ. ބައެއް ގެތަކަށާއި ފިހާރަތަކަށް ފެން ވަނުމުގެ ސަބަބުން ގެއްލުންތަކެއް ވެސް ވަނީ ލިބިފަ އެވެ.

މާލޭގެ އިތުރުން އުތުރުގެ ގިނަ ރަށްތަކަށްވެސް މިހާރު ކުރަމުންދާ ވިއްސާރާގައި ވަނީ ގެއްލުން ލިބިފަ އެވެ.