މާބަނޑު އަންހެނުންގެ ޑިއުޓީއަށް ލުއިދޭ އުސޫލު އިޔާދަކުރަން އައިޖީއެމްއެޗުން ނިންމައިފި

އަހުމަދު ނިހާން

14 އޮކްޓޫބަރ 2024 - 20:37

0 comments

އައިޖީއެމްއެޗްގައި މަސައްކަތްކުރަމުން އަންނަަ މުވައްޒަފުންގެ ތެރެއިން މާބަނޑު އަންހެނުންނާއި ޅަދަރިމައިންނަށް ދެމުން އައި ޑިއުޓީގެ ފްލެކްސިބިލިޓީ ކަނޑައިލުމަށް އެ ހޮސްޕިޓަލުން ނިންމި ނިންމުން ބަދަލުކޮށްފި އެވެ.

އެ ހޮސްޕިޓަލުން މިގޮތަށް ވިދާޅުވެފައި ވަނީ "މާބަނޑު އަަންހެނުންނަށާއި ޅަދަރިމައިންނަށް ފްލެކްސިބަލް ޑިއުޓީ ހަމަޖައްސައިދިނުން ހުއްޓާލުމާ" ގުޅޭގޮތުން ނެރެފައިވާ އިންޓާނަލް މެމޯއާ ގުޅޭގޮތުން ހުރި ކަންބޮޑުވުންތަކާއި ގުޅިގެން ނެރުނު ބަޔާނެއްގަ އެވެ،

އެ ހޮސްޕިޓަލުން ނެރުނު ބަޔާނުގައި ބުނީ އެ މެމޯގައި ފްލެކްސިބަލްކޮށް މަސައްކަތްކުރުން އެއްކޮށް ހުއްޓާލެވިފައިވާކަމަށް ދޭހަވާފަދަ ގޮތަކަށް އިބާރާތް ކުރެވިފައި ވީނަމަވެސް، މާބަނޑު މީހުންނަށް މިހާރުވެސް ދެމުންގެންދާ ލުއިތަކަށް އެއްވެސް ބަދަލެއް ގެނެސްފައި ނުވާނެ ކަމަށެވެ.

އަދި އެ ހޮސްޕިޓަލަކީ 24 ގަޑިއިރު ޚިދުމަތް ދޭންޖެހޭ ސަރުކާރުގެ މައި ހޮސްޕިޓަލަށްވެފައި، ޝިފްޓު ޑިއުޓީގައި މަސައްކަތްކުރާ މުވައްޒަފުންގެ މަސައްކަަތުގަޑި ފްލެކްސިބަލް ޑިއުޓީގެ ގޮތުގައި ކުރުކުރުމުން، ހޮސްޕިޓަލުން ޚިދުމަތް ހޯދާ ބަލިމީހުންނަށް އެކަށީގެންވާ ގޮތެއްގައި ޚިދުމަތްދިނުމަށް ދަތިވާ ކަމަށެވެ.

ނަމަވެސް، މެނޭޖްމަންޓުުން ގެނައި ބަދަލުގެ ސަބަބުން ހޮސްޕިޓަލުގައި މަސައްކަތްކުރާ ގިނަ މުވައްޒަފުންގެ ކަންބޮޑުވުން ހުރި ކަމަށް ހިއްސާކޮށްފައިވާ ކަމަށް ބަޔާނުގައި ބުންޏެވެ.

"އެ ކަންބޮޑުވުންތަކަށް ރިއާޔަތްކޮށް މި އުސޫލު ކުރިން ވެސް އޮތް ގޮތަށް ބަދަލުކުރުމަށް މެނޭޖްމަންޓުން ނިންމާފައިވާ ވާހަކަ ދަންނަވަމެވެ. އަދި ރައްޔިތުންނަށް މި ހޮސްޕިޓަލުން ދޭ ހިދުމަތްތަކަށް ދަތިނުވާނެހެން މުވައްޒަފުން މަސައްކަތްކުރުމުގައި ފަސޭހަ ގޮތްތައް ހަމަޖައްސައިދީ އެކަށީގެންވާ މާހައުލެއް ގާއިމްކޮށްދިނުމަށް އަބަދު ވެސް އިސްކަންދޭނެ އެވެ،" ބަޔާނުގައި ބުންޏެވެ.