ރައީސް ބޫޓާންގެ ބޮޑުވަޒީރާ ބައްދަލުކުރައްވައިފި

އަހުމަދު ނިހާން

12 ނޮވެމްބަރ 2024 - 14:53

0 comments

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ބޫޓާންގެ ބޮޑުވަޒީރު ޝެރިންގ ތޮބްގޭއާ ބައްދަލުކުރައްވައިފިއެވެ. 29 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް29) ގެ ހަވާސާގައި ކުރިއަށްގެންދެވި މި ބައްދަލުކުރެއްވުމުގައި ދެ ބޭފުޅުން ވަނީ، ކޮޕް29 އަށް ދެ ޤައުމުން ހިއްސާކުރާ ތަޞައްވުރާއި، މޫސުމީ ހަރަކާތްތެރިކަމާއި، އެއް ޤައުމުން އަނެއް ޤައުމަށް އެއްބާރުލުން ދެވިދާނޭ ގޮތްތަކާ ގުޅޭގޮތުން މަޝްވަރާކުރައްވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ދެ ޤައުމުގެ ޤުދުރަކީ ތަފާތުތަކާއެކުވެސް ދެ ޤައުމުން ހިއްސާކުރާ އެކުވެރިކަން ފާހަގަކުރައްވާފައެވެ. އަދި ގްލޭޝިއަލް މެލްޓިން އާއި ކަނޑުގެ ލޮނުގަނޑު އުފުލުން ފަދަ، މޫސުމީ ބަދަލުތަކުން ކުރިމަތިވާ ހިރާސްތަކުގެ މައްޗަށް އެ މަނިކުފާނު ވަނީ އަލިއަޅުއްވާލައްވާފައެވެ. ދުނިޔޭގެ ފުރަތަމަ ކާބަން-ނެގަޓިވް ޤައުމަކީ ބޫޓާންކަމުގައިވާތީ އާއި، މޫސުމީ ބަދަލުތަކުން ކުރާ އަސަރުތައް ކުޑަކުރުމަށް އެ ޤައުމުން ކުރާ އީޖާދީ މަސައްކަތްތައް ފާހަގަކުރައްވައި ރައީސުލްޖުމްހޫރިއްޔާ ބޮޑުވަޒީރު ތޮބްގޭއަށް ތަހުނިޔާ ވިދާޅުވިއެވެ. އަދި މޫސުމީ މައްސަލަތަކުގައި، ޚާއްޞަކޮށް މޫސުމަށް އަންނަ ބަދަލުތަކުން ކުރާ ނޭދެވޭ އަސަރުތައް ކުޑަކުރުމަށް އަޑުއުފުލުމުގައި އެކުގައި މަސައްކަތްކުރުމަށް، ދެ ލީޑަރުންވަނީ އެއްބަސްވެވަޑައިގަންނަވާފައެވެ.

މި ބައްދަލުކުރެއްވުމުގައި ބޫޓާންގެ ބޮޑުވަޒީރު ޝެރިންގ ތޮބްގޭ ވަނީ ދެ ޤައުމުން ގުޅިގެން މަސައްކަތްކުރުމަށް ތާއީދުކުރައްވައި މޫސުމީ މައްސަލަތަކުގައި ރައީސުލްޖުމްހޫރިއްޔާ އަދާކުރައްވާ އިސް ދައުރަށް ސާބަސްދެއްވާފައެވެ. އަދި މި މައްސަލައިގައި ބޫޓާނުން އީޖާދުކުރި ބައެއް ކާމިޔާބު ޙައްލުތައްވެސް އެމަނިކުފާނު ވަނީ ރައީސުލްޖުމްހޫރިއްޔާއާ ހިއްސާކުރައްވާފައެވެ. މޫސުމީ މައްސަލަތަކުގައި ބޮޑެތި، މުއްސަނދި ޤައުމުތަކުން އަޅާ ފިޔަވަޅުތައް ހަރުދަނާކުރުމަށްޓަކައި، މޫސުމީ ބަދަލުތަކުގެ ނުރައްކަލަށް ހުށަހެޅިފައިވާ ޤައުމުތަކުން އެކުގައި މަސައްކަތްކުރުމުގެ މުހިންމުކަން ބޮޑުވަޒީރު ފާހަގަކުރެއްވިއެވެ.

މި ބައްދަލުކުރެއްވުން ނިންމަވާލައްވާފައިވަނީ، ފަންނީ މަޢުލޫމާތާއި، ކާމިޔާބު ތަޖުރިބާތައް ހިއްސާކުރުމަށާއި، މޫސުމީ ވިލުންތެރިކަން އިތުރުކުރުމުގައި ދެ ޤައުމުގެ އެއްބާރުލުން އިތުރުކުރުމަށް އެއްބަސްވެވަޑައިގަންނަވަމުންނެވެ. އަދި ދޭދޭ ގުޅުންތައް އިތުރަށް ހަރުދަނާކުރުމަށާއި، އިންވެސްޓްމަންޓްގެ ދާއިރާގައި އެއްބާރުލުންދިނުމަށްވެސް، ދެ ބޭފުޅުން މަޝްވަރާކުރައްވާފައިވެއެވެ.