ކާބަން މަދުކުރުމަކީ މިހާރު އިހްތިޔާރެއް ނޫން، އެއީ ކުރަންޖެހޭކަމެއް: ރައީސް

އަހުމަދު ނިހާން

13 ނޮވެމްބަރ 2024 - 17:49

0 comments

ކޮޕްގެ ހަވާސާގައި ޗައިނާއިން ބޭއްވި އިވެންޓުގައި ރައީސް މުއިއްޒު ވާހަކަދައްކަވަނީ --

ކާބަން މަދުކުރުމަކީ ކޮންމެހެން ކުރަންޖެހޭ ކަމެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ސިފަކުރެއްވީ، މޫސުމީ ބަދަލުތަކާބެހޭ އދގެ އިދާރާ (ޔޫ.އެން.އެފް.ސީ.ސީ) އިން ކޮންމެ އަހަރަކުވެސް ކުރިއަށް ގެންދާ ކޮންފަރަންސް އޮފް ޕާޓީސްގެ 29 ވަނަ ސެޝަން (ކޮޕް29)ގެ ހަވާސާގައި، ޗައިނާގެ ޑެންގޯންގް ޕްރޮވިންސުން އިންތިޒާމުކޮށްގެން ކުރިއަށްގެންދިޔަ އިފްތިތާޙީ ހަރަކާތުގައި ވާހަކަފުޅުދައްކަވަމުންނެވެ.

މޫސުމީ ބަދަލުތަކުން ސަލާމަތްވުމަށް ކުރާ މަސައްކަތުގައި ޗައިނާ އަކީ ބައިނަލްއަގުވާމީ ލީޑަރެއް ކަމަށާއި 2026 ގެ ކުރިން ކާބަން ނިއުޓްރަލް ގައުމަކަށް ވުމަށް ޗައިނާއިން ކުރާ މަސައްކަތަށް ރާއްޖެއިން މަރުހަބާ ކިޔާ ކަމަށް ވެސް ރައީސް މުއިއްޒު ވިދާޅުވި އެވެ.

"ގްރީން ޓެކްނޮލޮޖީއަށް އިންވެސްޓުކޮށް، ކަބާން މަދުކުރުން ޕްރޮމޯޓު ކުރުމާއެކު ޗައިނާއިން ދަނީ ވިހަ ގޭސްތައް ބޭރުކުރާ މިންވަރު މަދުކޮށް، އިގުތިސާދީ އާ ފުރުސަތުތަކެއް ވެސް ފަހިކުރަމުން،" އެމަނިކުފާނު ވިދާޅުވި އެވެ.

ރައީސް ވިދާޅުވީ މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތައް އިތުރުވަމުންދާއިރު، ކާބަން މަދުކުރުމަކީ ކޮންމެހެން ކުރަންޖެހޭ ކަމެއް ކަމަށެވެ. އަދި ޖައްވަށް ބޭރުކުރާ ވިހަ ގޭސްތައް މަދުކޮށް، ތިމާވެށި ޙިމާޔަތްކުރުމުގެ މުހިންމުކަމުގެ މައްޗަށް އަލިއަޅުއްވާލައްވަމުން، މޫސުމަށް އަންނަ ބަދަލުތަކުގެ ޝިކާރައަކަށްވުމުގެ ބަދަލުގައި، ދެމެހެއްޓެނިވި މުސްތަގްބަލެއްގެ ކަށަވަރުކަން ހޯދުމަށްޓަކައި ރާއްޖެއާއި، ރާއްޖެ ފަދަ ނާޒުކު ހާލަތުގައިވާ އެހެނިހެން ގައުމުތަކަކީވެސް ހަރަކާތްތެރި ލީޑަރުންކަމުގައި ވުމަށް އަޒުމް ކަނޑައަޅާފައިވާ ގައުމުތަކެއްކަން ރައީސް ފާހަގަކުރެއްވި އެވެ.

ގިނަ ގައުމުތަކެއް ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް އަލިއަޅުއްވާލައްވަމުން، ބައިނަލްއަޤްވާމީ ފޯރަމްތަކުގައި ރާއްޖެއިން ބައިވެރިވުމަކީ، ކުދި ޖަޒީރާ ގައުމުތަކުން ދެމެހެއްޓެނިވި އަދި ވިލުންވެރި މުސްތަގްބަލެއް ބިނާކުރުމަށް މަސައްކަތްކުރާކަން ހަނދާންކޮށްދޭ ކަމެއް ކަމަށްވެސް ވިދާޅުވި އެވެ.

އަދި މޫސުމަށް އަންނަ ނޭދެވޭ ބަދަލުތަކުގެ މައްސަލައިގައި ވަކާލާތުކޮށް އިސްނެގުމުގައި، ރާއްޖެއިން ލީޑަރޝިޕް ދައްކާނެ ކަމަށްވެސް ރައީސް ވިދާޅުވި އެވެ.

ރައީސް ދެއްކެވި ވާހަކަފުޅުގައި، ދުރުވިސްނުމުގެ ތަސައްވުރެއްގައި އަމަލުކުރައްވަމުން ގެންދަވާ، ލޯ-ކާބަން ސިޔާސަތުތަކުގެ ސަބަބުން، އަގުހުރި މައުލޫމާތުތަކެއް ލިބިގެންދާނެކަމަށް ޔަގީންކުރައްވާ ކަމުގައި ވިދާޅުވި އެވެ. އަދި މޫސުމަށް އަންނަ ނޭދެވޭ ބަދަލުތަކާ ގުޅިގެން ދެމެހެއްޓެނިވި ގޮތެއްގައި ރާއްޖެއިން މަސައްކަތް ކުރާނީ ރާއްޖެ ފަދަ ކުދި ޖަޒީރާ ގައުމުތަކަށް ނަމޫނާއެއްގެ ގޮތުގައި ކަމަށްގެސް ރައީސް ވިދާޅުވި އެވެ. އަދި ކްލައިމެޓް އެކްޝަނަކީ އެންމެން ގުޅިގެން މަސައްކަތް ކުރަން ޖެހޭ ކަމެއް ކަމަށާއި ކްލައިމެޓް ފައިނޭންސްގެ އަމާޒަކަށް އެއްބަސްވުމަށް ކޮޕް29 ގެ ގައުމުތަކުން ގުޅިގެން މަސައްކަތް ކުރުމަށްވެސް ރައީސް ވަނީ ގޮވާލައްވާފަ އެވެ.