އާބަން ޑިވެލޮޕްމެންޓުގެ ބިލް ރައީސް ތަސްދީގު ކުރައްވައިފި

އައިމިނަތު ޝިޔާޒާ

02 ޑިސެމްބަރ 2024 - 21:00

0 comments

އާބަން ޑިވެލޮޕްމަންޓު ބިލު ރައީސް ތަސްދީގުކުރައްވައިފި

އާބަން ޑިވެލޮޕްމަންޓްގެ ބިލު ރައީސް ޑރ. މުހައްމަދު މުއިއްޒު މިރޭ ތަސްދީގު ކުރައްވައިފި އެވެ.

މި ގާނޫނުގެ ދަށުން ރާއްޖޭގައި އާބަން ސަރަހައްދުތައް ކަނޑައަޅާ، އެ ސަރަހައްދުތައް ތަރައްގީކޮށް ހިންގުމާގުޅޭ ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެމަތިން ރައީސް އެވެ. އެ ސިޔާސަތުތައް ތަންފީޒު ކުރާނީ އުމްރާނީ ތަރައްގީގެ މަސްއޫލިއްޔަތުތައް ހަވާލުކޮށްފައި އޮންނަ ވުޒާރާ އިންނެވެ.

ގާނޫނުގައި ބުނާ ސިޔާސަތުތައް ތަންފީޒު ކުރާނީ އުމްރާނީ ތަރައްގީގެ މަސްއޫލިއްޔަތުތައް ހަވާލުކޮށްފައި އޮންނަ ވުޒާރާ އިންނެވެ. މިހާރު ނަމަ އެއީ ހައުސިން، ލޭންޑް އެންޑް އާބަން ޑިވެލޮޕްމެންޓު މިނިސްޓްރީ އެވެ.

މި ގާނޫނަށް އަމަލުކުރަން ފަށާނީ މި ގާނޫނު ތަސްދީގުކޮށް، ގެޒެޓުގައި ޝާއިއުކުރާ ތާރީޚުން ފެށިގެން ހަ މަސްދުވަހުގެ ތެރޭގަ އެވެ. ގާނޫނަށް އަމަލުކުރަން ފެށުމާއެކު ގާނޫނުގެ ދަށުން ކަނޑައަޅާ އާބަން ސަރަހައްދުތަކުގެ އާބަން އޭރިޔާ ޑިވެލޮޕްމެންޓު މާސްޓާ ޕްލޭން ތައްޔާރުކޮށް، އެފަދަ ސަރަހައްދުތައް ތަރައްގީކުރާ ފަރާތްތަކަށް ހުއްދަތައް ދިނުމާއި، އެފަރާތްތަކުން އެ ސަރަހައްދުތަކުގައި ކުރިއަށްގެންދާ ތަރައްގީގެ މަސައްކަތްތައް ވިލަރެސްކުރުމަށް "އާބަން ޑިވެލޮޕްމަންޓް އޮތޯރިޓީ" ގެ ނަމުގައި ސަރުކާރުގެ އިދާރާއެއް އުފައްދަން ޖެހެ އެވެ.

މި ބިލު މަޖިލީހުން ފާސްކުރީ މިދިޔަ ބުދަ ދުވަހުއެވެ. މި ބިލު ފާސްކޮށްފައިވަނީ ޖަލްސާގައި ބައިވެރިވި 70 މެންބަރުންގެ ވޯޓުންނެވެ.

ރާއްޖޭގައި އާބަން ސެންޓަރުތައް ގާއިމް ކުރުމަކީ ރައީސްގެ ރިޔާސީ ވައުދުފުޅެކެވެ. އެހެންކަމުން އާބަން ސެންޓަރުތައް ގާއިމުކުރާ ހަތް ރަށެއް މިދިޔަ މަހުގެ ކުރީކޮޅު ވަނީ އިއުލާންކޮށްފަ އެވެ.