މިއަދު ހާމުކުރަން ބުނި ފުލެޓު ލިސްޓު ހާމަކުރުން މުއްދަތެއް ނެތް ގޮތަށް ފަސްކޮށްފި

ހުމާ ނަސީމް

16 ނޮވެމްބަރ 2024 - 18:16

0 comments

ހައުސިން މިނިސްޓަރު ޑރ. އަލީ ހައިދަރު، ފްލެޓްތައް ބައްލަވާލައްވަނީ.-- ފޮޓޯ: މިހާރު

ނިމިދިޔަ އެމްޑީޕީ ސަރުކާރުން ހިންގި 'ގެދޮރުވެރިޔާ' ސްކީމުން ފްލެޓު ލިބޭ މީހުންގެ ލިސްޓު މި ސަރުކާރުން މުރާޖައާ ކުރުމަށް ފަހު އާންމުކުރުން އަނެއްކާވެސް ފަސްކޮށްފި އެވެ.

ހައުސިން މިނިސްޓަރު ޑރ. އަލީ ހައިދަރު މިދިޔަ ބުރާސްފަތި ދުވަހު ވިދާޅުވީ ފުލެޓް ލިސްޓު މި ހަފްތާ ނިމުމުގެ ކުރީ ދުވަހު (ހޮނިހިރު) ދުވަހު އިއުލާން ކުރާނެ ކަމަށެވެ.

"ހަފުތާ ނިމޭ ދުވަސް،.. ހަފުތާ ފެށެނީ ކޮން ދުވަހަކުތޯ؟ އާދެ އެހެންވީމާ އަދިވެސް ހަމަ ތަކުރާރުކޮށް އަޅުގަނޑު ދަންނަވާނަން ހަފުތާ ފެށޭ ދުވަހުގެ ކުރީ ދުވަހު އިނގޭތޯ؟" ހައިދަރު ވިދާޅުވި އެވެ.

ނަމަވެސް ހައުސިން މިނިސްޓްރީން މިއަދު ނެރުނު ނޫސް ބަޔާނެއްގައި ބުނީ ފްލެޓަށް އެދި ހުށަހަޅާފައިވާ 20،697 އެޕްލިކޭޝަން ފޯމު ބެލުމުގައި ކަށަވަރު ކުރަން ޖެހޭ ގިނަ ކަންކަން ހުރުމާ ގުޅިގެން އެ މަސައްކަތް ނިންމުމަށް އިތުރު ވަގުތު ބޭނުންވާ ކަމަށެވެ.

"މި މަސައްކަތަށް އިތުރު މުއްދަތު ދިޔަ ކަމުގައި ވިޔަސް ސަރުކާރުގެ މަގްސަދަކީ މި ސްކީމުން ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރުކުރުމާ އެކު މި ސްކީމުގެ ދަށުން ތަރައްގީކުރާ ފްލެޓްތައް ދޫކުރެވޭނީ ހައްގުވެރިންނަށްކަން ކަށަވަރު ކުރުމެވެ،" ހައުސިން މިނިސްޓްރީގެ ބަޔާނުގައިވެ އެވެ.

އެ މިނިސްޓްރީން ވަނީ ސްކީމުގެ ވަގުތީ ލިސްޓު ރި-އިވެލުއޭޝަނާ ގުޅިގެން ކުރިއަށް ގެންދިޔަ މަސައްކަތްތަކުގެ ތަފްސީލުތައް ވެސް އެ މަސައްކަތްތައް ނިމުމުން ހިއްސާ ކުރާނެ ކަމަށް ބުނެފަ އެވެ.

ގާތްގަނޑަކަށް މަސައްކަތް އެއްކޮށް މިހާރު ނިމިފައިވާ އެ ފްލެޓުތަކަށް ހުޅުވައިލި މުއްދަތުގައި ކުރިމަތިލި 20،697 މީހުންގެ ތެރެއިން 18،167 މީހުން ފްލެޓަށް ޝަރުތު ހަމަވާ ކަމަށް ކުރީގެ ސަރުކާރުން އޮތީ ބުނެފަ އެވެ.

'ގެދޮރުވެރިޔާ' ސްކީމުން 4،000 ފްލެޓު ލިބޭ މީހުންގެ ދާއިމީ ލިސްޓެއް މިދިޔަ ސަރުކާރުގެ ފަހުކޮޅުގައި ވަނީ ގެޒެޓުކޮށްފަ އެވެ.

ދައުރު ހަމަވީ ފްލެޓު ލިބުނު ބައެއް މީހުންނާ އެކު ފްލެޓުގެ އެއްބަސްވުމެއްގައި ސޮއި ވެސް ކޮށްފައި ވަނިކޮށެވެ.