ފަނޑިޔާރުން ވަރަށް ބޮޑަށް ކަންނެތްވެއްޖެ: އައްބާސް

ހުމާ ނަސީމް

09 ޑިސެމްބަރ 2024 - 11:10

0 comments

ވެލިދޫ ދާއިރާގެ މެންބަރު މުހައްމަދު އައްބާސް

ކޯޓުތަކުގެ ފަނޑިޔާރުން ކަންނެތްވެފައިވާ ކަމަށާއި، ކޯޓުތަކުގައި ނުނިމި ހުރި މައްސަލަތައް އަވަހަށް ނިންމުމަށް ވެލިދޫ ދާއިރާގެ މެންބަރު މުހައްމަދު އައްބާސް ގޮވާލައްވައިފި އެވެ.

ރައްޔިތުންގެ މަޖިލީހުގައި މިއަދު ކުރިއަށް ދިޔަ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލްގައި އައްބާސް ވިދާޅުވީ މަސްތުވާތަކެތި ހުއްޓުވޭނީ ފުލުހުންނާއި ކަސްޓަމްސް އަދި ޖުޑިޝަރީ ގުޅިގެން ކަމަށާއި ފަނޑިޔާރުން "ކަންނެތްކަމުން" ސަލާމަތްވާން ޖެހޭ ކަމަށެވެ.

އައްބާސް ވިދާޅުވީ ބޮޑެތި މުސާރައާއި އިނާޔްތްތައް ލިބޭ ފަނޑިޔާރުން މިއަދު ކަންނެތް ވެފައިވާ ކަމަށާއި ފަނޑިޔާރުން ކަންނެތްކަމުން ސަލާމަތްވާންޖެހޭ ކަމަށެވެ. މަޖިލީހުގެ މެންބަރުން ރައްޔިތުންގެ ހައްގުގައި ޗުއްޓީއަށް ނުގޮސް މަސައްކަތްތައް ނިންމުމަށް ތިބިކަން ފާހަގަކޮށް އައްބާސް ވަނީ ފަނޑިޔާރުން ކޮންމެ އަހަރަކު މަސްދުވަހަށް ޗުއްޓީއަށް ދާންޖެހޭތޯ ސުވާލު އުފައްދަވާފަ އެވެ. އަދި ޗުއްޓީ ނެގުމުގެ ބަދަލުގައި ނުނިމިހުރި މައްސަލަތައް ނިންމުމަށް އައްބާސް ގޮވާލެއްވި އެވެ.

ކޯޓުތަކުގައި ނުނިމި މައްސަލަތައް ގިނަ ދުވަސްވާތީ އެކަމަށް ފާޑުވިދާޅުވެ އައްބާސް ވަނީ އެ މައްސަލަތައް އަވަހަށް ނިންމުމަށް ގޮވާލައްވާފަ އެވެ. އަދި ވާނުވާ ބަންދުގައި ހުކުމެއް ނުކޮށް ޖަލުގައި ތިބޭ މީހުންގެ މައްސަލަތައްވެސް އަވަހަށް ނިންމުމަށް ގޮވާލެއްވި އެވެ.

އޭނާ މިހެން ވިދާޅުވީ މާލޭގައި ހިންގާ ބައެއް ކޯޓުތައް މިމަހުން ފެށިގެން ޗުއްޓީއަށް ގޮސްފައި ވަނިކޮށެވެ.

އެގޮތުން މިމަހުގެ ފުރަތަމަ ދުވަހުން ފެށިގެން އަންނަ ޖެނުއަރީ މަހުގެ އެއްވަނަ ދުވަހުގެ ނިޔަލަށް ސުޕްރީމް ކޯޓު ވަނީ ޗުއްޓީއަށް ގޮސްފަ އެވެ.

ހައިކޯޓު ޗުއްޓީއަށް ދިޔައީ މިމަހުގެ ފުރަތަމަ ދުވަހުން ފެށިގެން މިމަހުގެ 31 ވަނަ ދުވަހުގެ ނިޔަލަށެވެ. ސިވިލް ކޯޓު ޗުއްޓީއަށް ދިޔައީ މިމަހުގެ ފުރަތަމަ ދުވަހުން ފެށިގެން މިމަހުގެ 20 ވަނަ ދުވަހުގެ ނިޔަލަށެވެ. ކްރިމިނަލް ކޯޓުވެސް މިމަހު ޗުއްޓީއަށް ދެއެވެ.

ކޯޓުތައް ޗުއްޓީއަށް ދިއުމުން އާންމުކޮށް ހިނގާ ޝަރީއަތްތައް ކުރިއަކަށް ނުދާނެ އެވެ. އެކަމަކު ކޯޓުތަކުގެ އިދާރީ މަސައްކަތްތައް ކުރިއަށްދާނެ އެވެ.