ޕީއެސްއެމްގެ އެމްޑީ ސައީދު އިސްތިއުފާ ދެއްވައިފި

އަލީ ރާޒީ

17 ޑިސެމްބަރ 2024 - 20:28

0 comments

މުހައްމަދު ސައީދު -ފޮޓޯ: މިހާރު

ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރު ކަމުގެ މަގާމުގައި ހުންނެވި މުހައްމަދު ސައީދު އެ މަގާމުން އިސްތިއުފާ ދެއްވައިފި އެވެ.

ސައީދު ޕީއެސްއެމްގެ އެމްޑީއަކަށް އައްޔަނުކޮށްފައިވަނީ މިދިޔަ އޮގަސްޓު މަހެވެ. އެއީ ކުރިން އެ މަގާމުގައި ހުންނެވި ޒީނާ ޒާހިރު އެ މަގާމުން އިސްތިއުފާދެއްވުމާ ގުޅިގެންނެވެ.

ސައީދުގެ އިސްތިއުފާއާ ގުޅޭ ގޮތުން މިހާތަނަށް އޭނާގެ ބަހެއް ލިބިފައިނުވެ އެވެ.

ސައީދު މަގާމުން އިސްތިއުފާ ދެއްވިއިރު، ޕީއެސްއެމްގެ ކޮންޓެންޓާ ގުޅޭ މައްސަލަތަކެއް މިފަހުން ފެންމަތިވެފައިވެއެވެ. އެގޮތުން ޕީއެސްއެމުން ވަގުތުން ގެނެސްދިން އިވެންޓެއްގައި ޤުރުއާނުން ބައެއް އުނިވީ ކަމަށް ބުނެ މިދިޔަ ބުރާސްފަތި ދުވަހު ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހަޅައިފައިވެއެވެ.

ކީރިތި ޤުރުއާނުގެ އާޔަތްތަކަށް ބަދަލު ގެނެސްގެން ޕީއެސްއެމުން ދައްކަމުންދާކަން ފާހަގަކުރެވިފައިވާ ކަމަށް ބުނެ އިދިކޮޅު އެމްޑީޕީން ހުށަހެޅި އެ މައްސަލަ މަޖިލީހުން ބަލައިގަނެ، ބަހުސް ވެސް ކުރިއެވެ.

ޕީއެސްއެމްގެ އެމްޑީގެ މަގާމަށް ސައީދު އައްޔަން ކުރެއްވީ އެ މަގާމުގައި ކުރިން ހުންނެވި ޒީނާ ޒާހިރު މަގާމުން އިސްތިއުފާ ދެއްވުމުން މިދިޔަ އޮގަސްޓް މަހުގެ 25 ވަނަ ދުވަހު އެވެ.