ގްރޫމްކުރި ޓީޗަރު ހައްޔަރުކުރަން އަމުރުކޮށްފި

އަލީ ރާޒީ

08 ޖެނުއަރީ 2025 - 09:30

0 comments

ދަރިވަރުންތަކެއް ގްރޫލްކުރި ޓީޗަރު ޝަރުތުތަކެއް ކުރުމަށްފަހު ބަންދުން ދޫކޮށްލާފައިވަނީ ގާނޫނާ ހިލާފަށް ކަމަށް ކަނޑައަޅައި، އޭނާ އަލުން ހައްޔަރު ކުރުމަށް ހައިކޯޓުން އަމުރުކޮށްފި އެވެ.

އެ ޓީޗަރު އަލުން ހައްޔަރު ކުރަން ހައިކޯޓުން އިއްޔެ އަމުރުކޮށްފައިވަނީ ތިން ފަނޑިޔާރުންގެ އިއްތިފާގުންނެވެ.

ހައިކޯޓުން އަމުރު ކުރީ އެ ޓީޗަރު، ހަތް ދުވަހަށް ބަންދުކޮށް އެ މުއްދަތުގެ ތެރޭގައި ދަށު ކޯޓުން އަލުން އެ މައްސަލައާއި މެދު ގޮތެއް ނިންމުމަށެވެ.

މީޑިއާތަކަށް ފުލުހުން މި މައްސަލައާ ގުޅިގެން ކުރިން ފޮނުވި މެސެޖެއްގައި ބުނީ އެ މީހާ ދޫކޮށްލާފައިވަނީ ބަންދުގެ މުއްދަތު އިތުރު ކުރުމަށް ކޯޓަށް ހާޒިރު ކުރުމުން ކަމަށެވެ.

ގްރޫމްކުރި މައްސަލައިގައި ކޯޓު އަމުރެއްގެ ދަށުން ޓީޗަރު ހައްޔަރުކުރީ މިދިޔަ އަހަރުގެ އޮކްޓޯބަރު 27 ގައެވެ. އެ މައްސަލަ ތަހުގީގު ކުރުމަށް ފަހު އެ ޓީޗަރުގެ މައްޗަށް ދައުވާކޮށްދިނުމަށް އެދި މިދިޔަ ނޮވެމްބަރު 25 ގައި ޕީޖީ އޮފީހަށް ފޮނުވާފައިވާ ކަމަށް ވެސް ފުލުހުން ބުނެފައިވެ އެވެ.

މިއީ ކުޑަކުދިންތަކެއް ހިމެނޭ މައްސަލައަކަށް ވާތީ އެ ޓީޗަރުގެ ވަނަވަރުވެސް އަދި އެއީ ކޮން ރަށެއްގެ މީހެއްކަން ވެސް ފުލުހުން ހާމައެއް ނުކުރެ އެވެ. ނަމަވެސް އެ މީހާ މަސައްކަތް ކުރީ މ، ފ، ދ، ތ، ލ. އަތޮޅުގެ ތެރެއިން ކޮންމެވެސް އެއް އަތޮޅަކަށް ނިސްބަތްވާ ރަށެއްގެ ސްކޫލްގައި ކަމަށް ފުލުހުން ބުންޏެވެ.