ދައުރުން ބޭރުން މަޖިލީހުގެ 2 ޖަލްސާއެއް

އަހުމަދު ނިހާން

09 ޖެނުއަރީ 2025 - 12:40

0 comments

މިނިވަން މުއައްސަސާތަކުން ހުސްވެފައިވާ ގޮނޑިތަކަށް މެންބަރުން އައްޔަން ކުރަން ރައްޔިތުންގެ މަޖިލީހުގެ ދައުރުން ބޭރުން ދެ ޖަލްސާ ބާއްވަން ނިންމައިފި އެވެ.

މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވީ އެ ދެ ޖަލްސާ އޮންނާނީ މި މަހުގެ 16 އާއި 20 ގައި ކަމަށެވެ.

ދައުރުން ބޭރު ޖަލްސާތަކެއް ބާއްވަން ނިންމީ މިނިވަން މުއައްސަސާތަކަށް މެންބަރުން އައްޔަން ކުރުމުގެ މަސައްކަތް ކުރުމަށާއި އިތުރު އެހެން ބައެއް މަސައްކަތްތައް ނިންމުމަށް ކަމަށް ފަލާހު ވިދާޅުވި އެވެ.

ބްރޯޑްކޮމްއަށް ދެ މެންބަރުން އައްޔަން ކުރަން ރުހުން ހޯދަން މަޖިލީހަށް ފޮނުވީ އެ ކޮމިޝަންގެ ރައީސަކަށް ހުންނެވި މަރިޔަމް ވަހީދާ އާއި މެންބަރު އަލީ ޔޫސުފްގެ ދައުރު ހަމަވެފައިވާތީ އެވެ. އަދި އީސީގެ ދެ ގޮނޑި ހުސްވީ އެ ކޮމިޝަންގެ ނައިބު ރައީސްގެ މަގާމުގައި ހުންނެވި އަލީ ނަޝާތު އަދި މެންބަރުކަމުގައި ހުންނެވި މުހައްމަދު އާސިފް ނޮވެމްބަރު މަހު މަގާމުން ވަކިކުުރުމުންނެވެ.

ރައްޔިތުންގެ މަޖިލީހުގެ މިދިޔަ އަހަރުގެ ތިން ދައުރު ނިންމާލައި ޗުއްޓީ އަށް ދިޔައީ މިދިޔަ މަހުގެ 12 ގަ އެވެ. މަޖިލީހުގެ ގަވާއިދުގައިވާ ގޮތުން މި އަހަރުގެ ފުރަތަމަ ދައުރު ފެށޭނީ އަންނަ މަހުގެ 1 ގަ އެވެ.