ޑިމޮކްރެޓްސްގެ ރައީސަކަށް އިމްތިޔާޒު، ނައިބަކަށް ވަހީދު

އަލީ ރާޒީ

26 ޖެނުއަރީ 2025 - 23:56

0 comments

ޑިމޮކްރެޓްސްގެ ހުސްވެފައިވާ ރައީސްގެ މަގާމަށް އިމްތިޔާޒު ފަހުމީ އަދި ފިރިހެން ނައިބު ރައީސްގެ މަގާމަށް މުހައްމަދު ވަހީދު (ވައްޑެ) ހޮވުނުކަން މިރޭ އިއުލާނުކޮށްފި އެވެ.

މިރޭވަނީ އެ ޕާޓީގެ ގައުމީ މަޖިލީހުގެ ބައްދަލުވުމެއް ބާއްވައިފައެވެ.

އެ ބައްދަލުވުމުގައި ވަނީ އެ ޕާޓީގައި އިސްކޮށް ހަރަކާތްތެރިވާ ކުރީގެ މަޖިލިސް މެންބަރުންނާއި، އާންމު މެންބަރުން ބައިވެރިވެފައެވެ. އޮންލައިންކޮށް ވެސް ޖަލްސާގައި މެންބަރުން ބައިވެރިވެފައިވެއެވެ. އޭގެ ތެރޭގައި މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު (ބޮންޑޭ) އާއި ވިލުފުށީ ދާއިރާގެ ކުރީގެ މެންބަރު ހަސަން އަފީފު ހިމެނިވަޑައިގަންނަވައެވެ.

މިރޭގެ ނެޝަނަލް އެސެމްބަލީގައި ބައިވެރިވި 34 މެންބަރުން ވަނީ އެ މަގާމުތަކަށް އެ ބޭފުޅުން އައްޔަން ކުރިކަމަށް ޕާޓީގެ އިލެކްޝަންސް ކޮމެޓީ އިން ނިންމި ނިންމުން އެންޑޯޒްކޮށްފަ އެވެ.

ޑިމޮކްރެޓްސްއިން މި ފަހުން ހަސަން ލަތީފާއި ޝިފާޒުގެ އިތުރަށް ޑިމޮކްރެޓްސްގެ ޕާލިމެންޓްރީ ގްރޫޕުގެ ލީޑަރުކަން ކުރެއްވި އަލީ އާޒިމާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވެސް ވަނީ އެމްޑީޕީއަށް ސޮއިކުރައްވައިފަ އެވެ.