ފުލުހުންގެ ޕްރޮމޯޝަންތައް މަޑުޖައްސާލަން އަމުރެއް ނުދިން

މަރިޔަމް އަނާ

27 ޖެނުއަރީ 2025 - 18:13

0 comments

ދިވެހި ފުލުހުންގެ ޚިދުމަތުގެ އިސް އޮފިސަރުންތަކަކަށް އަވަސް އަރުވާލައިގެން ޕްރޮމޯޝަން ދިން ކަމަށް ބުނާ މައްސަލައިގައި އެކަން ހުއްޓުވަން ސިވިލް ކޯޓުން އަމުރެއް ނެރެނުދިން މައްސަލަ ހައިކޯޓުގައި އިސްތިއުނާފުކުރުމުން އެ ކޯޓުން ވެސް އަމުރު ނެރެނުދޭން މިއަދު ނިންމައިފިއެވެ.

ރައީސް އިބްރާހިމް މުހައްމަދު ސޯލިހުގެ ރިޔާސީ ދައުރު ނިމެން ދެ ދުވަހަށް ވެފައި ވަނިކޮށް ފުލުހުންގެ އިސް ރޭންކުގެ ބައެއް އޮފިސަރުންނަށް އަވަސް އަރުވާލައިގެން ހާއްސަ ޕްރޮމޯޝަންތަކެއް ވަނީ ދީފަ އެވެ.

އެ މައްސަލައިގެ ތަހުގީގު ފެށުމަށް ފަހު އޭސީސީން ވަނީ އެކަން ހުއްޓަން އަންގައި ފުލުހުންނަށް ސިޓީއެއް ފޮނުވައިފަ އެވެ. ނަމަވެސް އޭސީސީގެ އެންގުމަށް ބެލުމެއް ނެތި ޕްރޮމޯޝަން ދިނުން ކުރިއަށް ގެންގޮސްފައިވެ އެވެ.

އެ މައްސަލަ އޭސީސީން ސިވިލް ކޯޓަށް ހުށަހަޅައި ޕްރޮމޯޝަން ދިނުން ހުއްޓުވަން ވަގުތީ އަމުރެއް ނެރެދިނުމަށް ސިވިލް ކޯޓުގައި އެދުނެވެ. ނަމަވެސް ސިވިލް ކޯޓުން ނިންމީ ވަގުތީ އަމުރު ނެރެދެވެން ނެތް ކަމަށެވެ. އޭސީސީން ސިވިލް ކޯޓުގެ ނިންމުން ހައި ކޯޓުގައި އިސްތިއުނާފު ކުރީ އެ ކޯޓުން ވަގުތީ އަމުރެއް ނެރެދިނުމަށް އެދި އެވެ.

އެ ނިންމުން އޭސީސީން ހައި ކޯޓުގައި އިސްތިއުނާފް ކުރުމުން އެ ކޯޓުން މިއަދު ކުރި ހުކުމުގައިވަނީ ޕްރޮމޯޝަންތައް މަޑުޖައްސާލަން އަމުރެއް ނުނެރެފިނަމަ ލިބޭނެ ގެއްލުންތައް ކަމަށް ބުނެ އޭސީސީން ފާހަގަކުރާ ކަންކަމަކީ އެ މައްސަލާގައި ސިވިލް ކޯޓުން އަސްލު މައްސަލަ ބަލާއިރު ގޮތް ނިންމަންޖެހޭ ކަންތައްތަކެއް ކަމަށެވެ. އަދި މިހާރު ވަގުތީ އަމުރެއް ނުނެރެފިނަމަ އޭސީސީއަށް ލިބޭނެ ގެއްލުމެއް އެ ކޮމިޝަނަށް ބުނެދެވިފައި ނުވާ ކަމަށް އެ ހުކުމުގައިވެ އެވެ.

ހުކުމުގައިވާ ގޮތުން ފުލުހުންނަށް ޕްރޮމޯޝަންތައް ދީ މިހާރު ނިމިފައިވާއިރު، އެފަދަ އަމުރެއް މިހާރު ނެރުނަސް އިތުރަށް ނުކުންނާނެ ނަތީޖާއެއް އޮތްކަން އޭސީސީއަށް ބުނެދެވިފައެއް ނުވެ އެވެ. އެހެންވެ، ޕްރޮމޯޝަން މަޑުޖައްސާލަން އަމުރު ނެރެދެވެން ނެތް ކަމަށް ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވެ އެވެ.

އެހެން ނަމަވެސް އެ މައްސަލާގައި އަމުރު ނެރެދެވެން ނެތް ކަމަށް ސިވިލް ކޯޓުން ނިންމި ނިންމުން ހައި ކޯޓުން ވަނީ ބާތިލްކޮށްފަ އެވެ. އެއީ އަމުރު ނެރެދެވެން ނެތް ކަމަށް ނިންމި ސަބަބު ބަޔާން ކޮށްފައި ނެތުމާއި އަސްލު މައްސަލާގެ ގޮތް ނިންމަންޖެހޭ ކަންކަމަށް ވަގުތީ އަމުރާ މެދު ގޮތް ނިންމިއިރު ގޮތް ކަނޑައަޅާފައި އޮތުމުންނެވެ.

އެ މައްސަލަ ހައި ކޯޓުން ބެއްލެވީ ފަނޑިޔާރު މުހައްމަދު ޝަނީޒް އަބްދުﷲ އާއި ފަނޑިޔާރު މުހައްމަދު ސަލީމް އަދި ފަނޑިޔާރު މުހައްމަދު ފައިސަލެވެ.

މީގެ ކުރިން ފުލުހުން ބުނީ، އެއީ މި އަހަރުގެ އޭޕްރީލް މަހުން ފެށިގެން އިއުލާނުކޮށް، ހަމަޖެހިފައިވާ ޕްރޮމޯޝަންތަކެއް ކަމަށެވެ. އެ ޕްރޮމޯޝަންތަކަކީ އެ ޚިދުމަތުގެ މަގާމުގެ ކުރިއެރުން ދިނުމުގެ ގަވާއިދާ އެއްގޮތްވާ ގޮތުގެ މަތިން އެކަމަށް ކަނޑައަޅާފައިވާ އުސޫލުތަކާ އެއްގޮތަށް ދެމުން ގެންދާ ޕްރޮމޯޝަންތަކެއް ކަމަށް ވެސް ބުނެފައިވެއެވެ.