ސްޓެލްކޯގެ ޓްރާންސްފޯމާ ސަބްސްޓޭޝަނަކުން ވައްކަން ކުރަން އުޅުނު މީހަކު ހައްޔަރުކޮށްފި

މަރިޔަމް އަނާ

30 ޖެނުއަރީ 2025 - 11:28

0 comments

މާފަންނު މަދަރުސާ ސަރަހައްދުގައި ހުރި ސްޓެލްކޯގެ ޓްރާންސްފޯމާ ސަބްސްޓޭޝަނަކަށް ވަދެ، އެތަނުން ވައްކަން ކުރަން އުޅުނު މަންޒަރު ސީސީޓީވީ ކެމެރާ އިން ފެނުމުން އޭނާ ހުއްޓުވައި ހައްޔަރުކޮށްފި އެވެ.

ސްޓެލްކޯ އިން ބުނީ ރޭ ދަންވަރު 2:50 ގައި މާފަންނު މަދުރަސާ ސަރަހައްދުގައި ހުރި އެ ކުންފުނީގެ ޓްރާންސްފޯމާ ސަބްސްޓޭޝަނަށްވަދެ ވައްކަންކުރަން އުޅުނު މީހަކު ސީސީޓީވީ ކެމެރާއިން ފެނި، ފުލުހުންނަށް އެންގުމާ ގުޅިގެން އޭނާ ހައްޔަރުކޮށްފައިވާ ކަމަށެވެ.

ޓްރާންސްފޯމާ ސްޓޭޝަންތަކަށް ވަދެ ވައްކަން ކުރުމަކީ ފުރާނައަށް ނުރައްކާވެދާނެ ކަމަކަށް ވާތީ، އެކަމުން ދުރުހެލިވާން ވެެސް ސްޓެލްކޯ އިން އިލްތިމާސްކުރި އެވެ. އަދި ރައްޔިތުންނަށް ދަތިތަކެއް ކުރިމަތިވާ މިފަދަ ވައްކަންތަކުން ހޯދާ ތަކެތި ވިއްކާ އަދި ގަންނަ ފަރާތްތައް ވެސް ހޯދައި، ގާނޫނީ ފިޔަވަޅު އެޅުމަށް ކަމާ ބެހޭ ފަރާތްތަކަށް އެ ކުންފުނިން ގޮވާލި އެވެ.

ސްޓެލްކޯ އިން ވަނީ މިފަދަ ވައްކަންތަކުން ހޯދާ ތަކެތި ވިއްކާ އަދި ގަންނަ މީހުންވެސް ހޯދައި، ގާނޫނީ ފިޔަވަޅު އެޅުމަށް ކަމާބެހޭ އިދާރާތަކަށްވެސް އިލްތިމާސްކޮށްފަ އެވެ.

މާލޭގައި ހުރި ސްޓެލްކޯގެ ޓްރާންސްފޯމާ ސަބްސްޓޭޝަނަކުން ވައްކަން ކުރަން އުޅުނު މީހަކު ރޭ ހައްޔަރުކޮށްފައިވާއިރު މިމަހު ހުޅުމާލެ ދެވަނަ ފިޔަވަހީގައި ހުރި ސްޓެލްކޯގެ ހައި-ވޯލްޓޭޖް (އެޗްވީ) ދެ ޓްރާންސްފޯމަރަށް ބަޔަކު ވަނީ ގެއްލުންދީފަ އެވެ.

މީގެ އިތުރުން ޓްރާންސްފޯމަރަކުން ވައްކަން ކުރަން އުޅުނު މީހަކު ކަރަންޓުގައި ޖެހި މިދިޔަ އަހަރު ވަނީ މަރުވެފަ އެވެ.