ހަންކެޑެ ބްރިޖް އަންނަ ހޮނިހިރު ދުވަހު ހުޅުވާލަނީ

އަލީ ރާޒީ

30 ޖެނުއަރީ 2025 - 14:43

0 comments

އައްޑޫ ސިޓީގެ ހަންކެޑެ ބްރިޖް އަންނަ ހޮނިހިރު އާންމުންނަށް ހުޅުވާލައި، ބޭނުން ކުރަން ފަށާނެ ކަމަށް ކޮންސްޓްރަކްޝަން މިނިސްޓްރީން މިއަދު ބުނެފި އެވެ.

އެ މިނިސްޓްރީން ސޯޝަލް މީޑިއާގައި ކުރި ޕޯސްޓެއްގައި ބުނީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓު ފެސިލިޓީގެ ދަށުން ހަދާފައިވާ ޑީޓުއާ ލިންކް ރޯޑު އަންނަ ހޮނިހިރު ދުވަހު އާއްމުންނަށް ހުޅުވާލާނެ ކަމަށެވެ.

އައްޑޫ ގައުކެޑި އާއި މަރަދޫ ގުޅާލުމަށް ހަދާފައިވާ އެ ބްރިޖު ނުހުޅުވައި ދިގުލައިގެންދާތީ އައްޑޫ ސިޓީގެ މޭޔަރު އަލީ ނިޒާރު ދާދިފަހުން ވެސް ވަނީ ކަންބޮޑުވުން ފާޅުކުރައްވައިފަ އެވެ.

އެމްޑީޕީގެ ސަރުކާރުން އައްޑޫގެ ގައުކެޑި އާއި މަރަދޫ ގުޅާލުމަށް ހަދަން ފެށި ބްރިޖު މަސައްކަތް ނިމުނުއިރުވެސް އެތަން ނުހުޅުވާތީ އައްޑޫގެ މޭޔަރު އަލީ ނިޒާރުވެސް މީގެކުރިން ކަންބޮޑުވުން ފާޅުކުރައްވާފައިވެ އެވެ.

ހަންކެޑެ ބްރިޖު ހުޅުވާނެ އާ ތާރީހެއް ދީފައި މިވަނީ މިދިޔަ ޖުލައި މަހު އެ ބްރިޖް އާންމުކޮށް ހުޅުވާލާނެ ކަމަށް ސަރުކާރުން ބުނި ތާރީހް ފަހަނައަޅައި އެތައް މަހެއް ދިޔަ ފަހުންނެވެ.