މައުމޫންގެ މައްޗަށް ކުރި ދައުވާ އަނބުރާ ގެންގޮސްފި، އެއީ ކީއްވެގެން ކަމެއް، ހުކުމަކުން ނޭނގެ

މަރިޔަމް އަނާ

16 އޭޕްރީލް 2025 - 12:18

0 comments

އެމްޓީސީސީއަށް ޑީއާރުޕީން ދައްކަން ޖެހޭ ދަރަންޏަކަށް އެ ޕާޓީގެ ކުރީގެ ޒައީމް އަދި ރާއްޖޭގެ ކުރީގެ ރައީސް މައުމޫން އަބްދުއްގައްޔޫމް ޒިންމާކުރުވަން އެމްޓީީސީސީން ހައި ކޯޓަށް ހުށަހެޅި މައްސަލަ އަނބުރާ ނަގައިފި އެވެ.

މިއީ، ރައީސް މައުމޫން އިސްވެ ހުންނަވައި އުފެއްދެވި ޑީއާރްޕީން އެމްޓީސީސީއަށް 1.1 މިލިއަން ރުފިޔާ ދައްކަންޖެހޭ ކަމަށް އެމްޓީސީސީން ސިވިލް ކޯޓަށް ހުށަހެޅި މައްސަލައެވެ.

އެ މައްސަލަ ސިވިލް ކޯޓުން ކާމިޔާބު ނުވުމުން އެމްޓީސީސީން ހައިކޯޓުގައި އެ މައްސަލަ އިސްތިއުނާފު ކުރިއެވެ. އެހެން ނަމަވެސް އެމްޓީސީސީން އެދިގެން ހައިކޯޓުންވަނީ މި މައްސަލަ މިހާރު ބާތިލުކޮށްފަ އެވެ.

ހައި ކޯޓުން އިއްޔެ ބުނީ މައުމޫންގެ މައްޗަށް ކޮށްފައިވާ ދައުވާ އަނބުރާ ގެންދިއުމަށް އެދި މިދިޔަ ފެބްރުއަރީ މަހު އެމްޓީސީސީއިން އެދިފައިވާ ކަމަށެވެ. އެހެންވެ އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން މައްސަލަ ބާތިލް ކުރަން ނިންމާފައިވާ ކަމަށް ކޯޓުން ބުންޏެވެ.

އެމްޓީސީސީން މައްސަލަ އަނބުރާ ނެގީ ކީއްވެގެން ކަމެއް، ހުކުމަކުން ނޭނގެ އެވެ.

މައުމޫންގެ ފަރާތްޕުޅުން އަންނަނީ ޑީއާރުޕީގެ ދަރަންޏަށް ޒިންމާވާން ނުޖެހޭނެ ކަމަށް ވިދާޅުވަމުންނެވެ. އީސީން ޑީއާރުޕީ އުވައިލީ ގާނޫނުން ލާޒިމުކުރާ 3،000 މެންބަރުން ހަމަނުވެގެންނެވެ.