މެންބަރުން ހަމަނުވާތީ އެމްއާރުއެމް އުވާލައިފި

އަހުމަދު ނިހާން

29 ޖެނުއަރީ 2025 - 19:17

0 comments

މޯލްޑިވްސް ރިފޯމް މޫވްމަންޓް (އެމްއާރްއެމް) އުވާލާފައިވާކަން އިލެކްޝަންސް ކޮމިޝަނުން ރަސްމީކޮށް އިއުލާނު ކޮށްފި އެވެ.

އެމްއާރުއެމް އުވާލިކަން އިއުލާންކޮށް އިލެކްޝަންސް ކޮމިޝަން (އީސީ) ން ވަނީ ސަރުކާރުގެ ގެޒެޓުގައި ޝާއިއުކޮށްފަ އެވެ. އަދި މިހާރު އެ ކޮމިޝަނުގެ ވެބްސައިޓުގައި ސިޔާސީ ޕާޓީތަކުގެ ދަފްތަރުގައި ވެސް އެ ޕާޓީއެއް ނެތެވެ.

ސަރުކާރުގެ ގެޒެޓުގައި ބުނެފައިވާ ގޮތުގައި އެމްއާރުއެމް އުވާލީ ސިޔާސީ ޕާޓީތަކުގެ ގާނޫނުގައި ބަޔާންކުރާ މެންބަރުން ހަމަނުވެ، މެންބަރުން ހަމަކުރުމަށް ދިން މުއްދަތުގައި ވެެސް މެންބަރުން ހަމަނުކުރެވުމުންނެވެ.

އާ ސިޔާސީ ޕާޓީއެއް ހައްދަވާކަން މައުމޫން އިއުލާނު ކުރެއްވީ ޖަނަވަރީ 31، 2019 ގައެވެ. އަދި ފެބްރުއަރީ 10، 2019 ގައި އެމްއާރްއެމް އުފައްދަން ހުށައެޅި އެވެ.

އެ ހުއްދަ ކޮމިޝަނުން ދިނީ އޭގެ ނުވަ ދުވަސް ފަހުން ފެބްރުއަރީ 19، 2019 ގައެވެ.

ނަމަވެސް މައުމޫން ކުރީން އުފެއްދެވި ފަދަ -- ދިވެހި ރައްޔިތުންގެ ޕާޓީ (ޑީއާރުޕީ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ފަދަ ވަރުގަދަ ޕާޓީއަކަށް އެމްއާރްއެމް ނުހެއްދެވުނެވެ. އެމްއާރްއެމް ގައި އިސްކޮށް ހުންނެވީ މައުމޫންގެ ދަރިކަލުން ފާރިސް މައުމޫނެވެ. އެ ޕާޓީގެ މިހާރުގެ ރައީސަކީ ވެސް ފާރިސް އެވެ.

މެންބަރުން އިތުރުކޮށް ކާމިޔާބު ޕާޓީއަކަށް އެމްއާރްއެމް ހެދުމުގައި ފާރިސްއަށް ކާމިޔާބު ހޯއްދެވޭ ގޮތެއް ނުވި އެވެ.