ކުރީގެ ރައީސް މައުމޫނަށް 3 ނޮވެމްބަރުގެ ޝަރަފުގައި ހާއްސަ އައްޑަނައެއް އަރުވަނީ

މަރިޔަމް އަނާ

02 ނޮވެމްބަރ 2025 - 15:45

0 comments

ނިޝާން ޣާޒީގެ އިއްޒަތުގެ ވެރިޔާ، ރައީސް މައުމޫން އަބްދުލްގައްޔޫމަށް ނޮވެންބަރު ތިނެއްގެ ޝަރަފުގެ ހާއްސަ އައްޑަނައެއް އެރުވުމަށާއި ނޮވެންބަރު ތިނެއްގެ ޝަހީދުންގެ އާއިލާތަކަށް ހަނދާނީ އައްޑަނައެއް އެރުވުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.

ނިޝާން ގާޒީގެ އިއްޒަތުގެ ވެރިޔާ މައުމޫނަށް މި އައްޑަނަ އަރުވާނީ، މިއަހަރު ނަސްރުގެ ދުވަހުގެ މުނާސަބަތުގައި މާދަމާ ބާއްވާ ރަސްމީ ޖަލްސާގަ އެވެ. މި ޖަލްސާ އޮންނާނީ، ސޯޝަލް ސެންޓަރުގައި މާދަމާ ހެނދުނު 9 ޖަހާއިރު އެވެ.

ރައީސް އޮފީހުން ބުނި ގޮތުގައި މައުމޫނަށް މި އައްޑަނަ އަރުވަން ރައީސް މުއިއްޒު ނިންމެވީ، 3 ނޮވެންބަރުގެ އުދުވާނީ ހަމަލައިގައި އޭރުގެ ރައީސްގެ ގޮތުގައި ހުންނަވާ އެމަނިކުފާނު ކުރެއްވި ތައުރީފު ހައްގު މަސައްކަތްޕުޅުތަކުގެ އަގު ގައުމީ ފެންވަރެއްގައި ވަޒަންކުރެއްވުމުގެ ގޮތުންނެވެ.

ނޮވެންބަރު ތިނެއްގެ އުދުވާނީ ހަމަލާގައި ސިފައިންގެ ތެރެއިން ޝަހީދުވީ 8 ބޭފުޅުންނެވެ. އަދި އާންމުންގެ ތެރެއިން ޝަހީދުވީ 11 ބޭފުޅުންނެވެ.

މާދަމާގެ ޖަލްސާގައި މުއިއްޒު ގައުމާ މުހާތަބުކުރައްވާނެ ކަމަށާއި އެ ޖަލްސާގައި ޑިފެންސް މިނިސްޓަރު ގައްސާން މައުމޫން ވާހަކަދައްކަވާނެ ކަމަށް ވެސް ރައީސް އޮފީހުން ބުންޏެވެ.