އައްޑޫގައި އެކްސިޑެންޓެއް ހިނގައި ޒުވާނަކު މަރުވެއްޖެ

މަރިޔަމް އަނާ

12 އޭޕްރީލް 2025 - 22:31

0 comments

އައްޑޫ ސިޓީގެ ފޭދޫ ލިންކް ރޯޑްގައި ހިނގި އެކްސިޑެންޓެއްގައި މީހަކު މަރުވެއްޖެ އެވެ.

މި އެކްސިޑެންޓް ހިނގާފައި ވަނީ މިރޭ 7:29 ހާއިރު، އައްޑޫ ސިޓީ ފޭދޫ ލިންކު ރޯޑުގަ އެވެ.

މަރުވެފައި ވަނީ މި އެކްސިޑެންޓްގައި ހިމެނޭ ސައިކަލު ދުއްވި ފޭދޫއަށް ނިސްބަތްވާ އުމުރުން 36 އަހަރުގެ އެރަށު އުލްފަތުގޭ، އިބްރާހިމް ސިޔާދެވެ. ފުލުހުން ބުނީ ސިޔާދު ފޭދޫ ސިއްހީ މަރުކަޒަށް ގެންދިޔައިރު ވެސް މަރުވެފައިވާ ކަމަށް އެތަނުން މައުލޫމާތު ދީފައިވާ ކަމަށެވެ.

މި އެކްސިޑެންޓްގައި ހިމެނޭ ކާރު ދުއްވި ގދ. ފިޔޯރީ، މާގޯލްޑް، މުހައްމަދު މާހިލް މުމްތާޒް (23އ) ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ވެސް ފުލުހުން ބުންޏެވެ.

މިއެކްސިޑެންޓްގެ މައްސަލަ އިތުރަށް ތަހުގީގު ކުރަމުންދާ ކަމަށްވެސް ފުލުހުން ބުންޏެވެ.

މި އެކްސިޑެންޓްގެ މައްސަލަ ފުލުހުން ބަލަމުންދާއިރު، ރޭ ލާމު ލިންކު ރޯޑުގައި ހިނގާ ދިޔަ އެކްސިޑެންޓެއްގައި ވެސް ވަނީ ޒުވާނަކު މަރުވެފަ އެވެ. އުމުރުން 30 އަހަރުގެ އެ ޒުވާނާ މަރުވެފައި ވަނީ މިއަދު ހެނދުނު ގަން ރީޖަނަލް ހޮސްޕިޓަލުގައި ފަރުވާ ދެމުން ދަނިކޮށެވެ.