ޗައިނާއާ އެކު އޮތީ އިހުތިރާމާއި އެއްބާރުލުން ދިނުމުގެ ގާތް ގުޅުމެއް: ރައީސް

އަލީ ރާޒީ

29 ޖެނުއަރީ 2025 - 10:59

0 comments

ރާއްޖެ އާއި ޗައިނާއާ ދެމެދު އޮތީ އިހުތިރާމާއި އެއްބާރުލުން ދިނުމުގެ ގާތް ގުޅުމެއް ކަމަށާއި މި ގާތް ގުޅުން ރާއްޖޭން އަބަދުވެސް ބަލައިގަންނަ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ޗައިނާގެ އާ އަހަރުގެ މުނާސަބަތުގައި ރައީސް މުއިއްޒު އެކްސްގައި މިއަދު ކުރެއްވި ޕޯސްޓެއްގައި ވަނީ އެ ގައުމުގެ ރައީސް ޝީ ޖިންޕިން އާއި ޗައިނާގެ އެކުވެރި ރައްޔިތުންނަށް ތަހުނިޔާ ދަންނަވައިފަ އެވެ.

ޗައިނާއާ އެކު އުފެދިފައި ވަނީ އުންމީދީ އަދި އިހްތިރާމްގެ މައްޗަށް ބިނާވެފައިވާ ގާތް ގުޅުމެއް ކަމަށާއި އަދި އެގޮތަށް ދެމިގެންދާ އެ ގުޅުން ރާއްޖެއިން އަގުވަޒަން ކުރާ ކަމަށް ރައީސް ވިދާޅުވި އެވެ.

އާ އަހަރަށް ޗައިނާއަށް މަރުހަބާ ދެންނެވި އިރު، އެ ގައުމާ އެކު އޮތް ގުޅުން ދެ ގައުމަށް ވެސް ފައިދާ ވާ ގޮތަށް ބަދަލުވެގެން ދާނެ ކަމުގެ ޔަގީންކަން އެބައޮތް ކަމަށް ވެސް އެމަނިކުފާނު ވިދާޅުވި އެވެ.

ރައީސް މުއިއްޒު ވެރިކަމަށް ވަޑައިގަތުމަށް ފަހު ކުރެއްވި ފުރަތަމަ ފުރަމާނަ ދަތުރުފުޅުގައި ވަޑައިގެންނެވީ ޗައިނާ އަށެވެ. އެ ދަތުރުފުޅުގެ ތެރެއިން ރާއްޖޭގެ ތަރައްގީއަށް އެހީތެރިކަން ދިނުމަށް ޗައިނާއާ އެކު ގިނަ އެއްބަސްވުންތަކެއްގައި ސޮއިކޮށް، މަޝްވަރާތަތައް ކުރި އެވެ.