ބޭނުންނުކޮށް ގިނަ ދުވަސް ވަންދެން އަޅާފައިވާ ދޯނިތައް ނަގަން އަންގައިފި

އައިމިނަތު ޝިޔާޒާ

06 ފެބުރުއަރީ 2025 - 21:48

0 comments

މާލޭ އުތުރު ފަރާތު މަސްމާރުކޭޓް ސަރަހައްދުގެ ފަޅުތެރޭގައި އަޅާފައިވާ އުޅަނދުތަކެއް - ފޮޓޯ: އަވަސް

މާލޭ އުތުރު ފަރާތު މަސްމާރުކޭޓް ސަރަހައްދުގެ ފަޅުތެރޭގައި ދަތުރުނުކޮށް، ކުށުގެ ވެއްޓަށް މަގުފައިވާ ގޮތަށް އަޅާފައި އޮންނަތާ ގިނަ ދުވަސްވެފައިވާ އުޅަނދުތައް އެތަނުން ނެގުމަށް މާލެ ސިޓީ ކައުންސިލުން އަންގައިފި އެވެ.

އެ ކައުންސިލުން މިއަދު ކުރި އިއުލާނެއްގައި ބުނީ، އެއީ މާލެ އާއި ވިލިމާލޭގެ ފަޅު ބެލެހެއްޓުމާ ބެހޭ ގަވާއިދާއި ހިލާފަށް، ބަލަހައްޓާނެ ޒިންމާދާރު ފަރާތެއް ނެތި އަޅާފައިވާ އުޅަނދުތަކެއް ކަމަށެވެ.

އެއްގޮތަކަށް ވެސް ދަތުރުނުކޮށް، ގިނަ ދުވަސްތަކެއް ވަންދެން ފަޅުތެރޭގެ އެކިސަރަހައްދުތަކުގައި އަޅާފައިވާ، ރަޖިސްޓަރީ ނަމްބަރު ވެސް ނުޖަހާ ހުރި އެ އުޅަނދުފަހަރުގެ ސަބަބުން، ފަޅުގެ ގަވާއިދާ އެއްގޮތަށް ހުއްދަ ނަގައިގެން ފަޅު ބޭނުންކުރާ މަސްވެރިންނަށް ވަރަށް ބޮޑަށް އުނދަގޫވާ ކަމުގެ ޝަކުވާ ކައުންސިލަށް ލިބިފައިވާ ކަމަށް ވެސް އިއުލާނުގައިވެ އެވެ.

ނަގަން އިއުލާން ކުރި އުޅަނދުތައް:

1. މުނިޔާ.

2. އުންމީދު.

3. ނަން ނުޖަހައި ރަޖިސްޓަރީ ނަމްބަރު ވެސް ނެތް ދެ އުޅަނދު.

އިއުލާންގައި ވަނީ ފަޅުން ނެގުމަށް އަންގާފައިވާ އުޅަނދުތަކުގެ ވެރިފަރާތްތަކުން އެއީ އެ މީހުންގެ އުޅަނދެއްކަން އެނގޭ ގޮތަށް ކަމާ ގުޅޭ ލިޔުންތަކާ އެކު ކައުންސިލަށް ހާޒިރުވެ އެކަން އެންގުމަށްފަހު އަންނަ ހޯމަ ދުވަހުގެ ކުރިން އެ އުޅަނދުތައް ނެގުމަށްވެސް އަންގާފަ އެވެ.

ކައުންސިލުން ދީފައިވާ މުއްދަތުގައި އެ އުޅަނދުތައް ނުނަގައިފިނަމަ ކައުންސިލުން ކަނޑައަޅާފައިވާ ސަރަހައްދަކަށް އެ އުޅަނދުތައް ގެންދިއުމުގެ މަސައްކަތް ކުރާނެ ކަމަށްވެސް އިއުލާންގައިވެ އެވެ.

އުޅަނދުފަހަރު ނެގުމާއި އުޅަނދުތައް ގެންދިއުމުގެ ތެރޭގަ އާއި ގެންގޮސް ބޭއްވުމަށްފަހު އުޅަނދާއި އޭގައިވާ ތަކެއްޗަށް ލިބޭ ގެއްލުމަށް ކައުންސިލުން ޒިންމާއެއް ނުވާނެ ކަމަށްވެސް އިއުލާންގައިވެ އެވެ.