މަޖިލީހުގެ ޖަލްސާތައް ރޯދައިގެ ފަހު 10އަށް މެދުކަނޑާލައިފި

ހަސަން ހަލީމް

19 މާޗް 2025 - 12:52

0 comments

ރޯދަމަހުގެ ފަހު 10 ދުވަހަކީ ސަރުކާރު ބަންދު ދުވަސްތަކެއް ކަމުގައި ސަރުކާރުން ހަމަޖައްސާފައިވާތީ, އެ ދުވަސްތަކުގައި ރައްޔިތުންގެ މަޖިލީހުގެ ޖަލްސާތައް ވެސް މެދުކަނޑާލަން ނިންމައިފި އެވެ.

މިއަދުގެ ޖަލްސާ ނިންމާލައްވަމުން، ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ އިއުލާން ކުރެއްވި ގޮތުގައި، މަޖިލީހުގެ ޖަލްސާއެއް ދެން އޮންނަނީ އަންނަ މަހު 7 ވަނަ ދުވަހު އެވެ.

އަންނަ މަހު 7 ވަނަ ދުވަހަކީ ރޯދަ މަސް ނިމި ހަ ރޯދައަށް ފަހު އެވެ.

މަޖިލީހުގެ މިއަހަރުގެ ފުރަތަމަ ދައުރުގެ ޖަލްސާތައް ފެށީ މިދިޔަ ފެބްރުއަރީ މަހު ކުރީކޮޅެވެ. މަޖިލީހުގެ ގަވައިދުގައިވާ ގޮތުން، މި ދައުރު ނިމޭނީ އަންނަ 15 މެއިގަ އެވެ.

މަޖިލީހުގެ ޖަލްސާތައް މެދުކަނޑާލާފައި މިވަނީ ރައްޔިތުންގެ ކަންބޮޑުވުން އޮތް ބައެއް ބިލުތަކުގެ މަސައްކަތް ނުނިމި އޮއްވަ އެވެ. އެގޮތުން އިޒްރޭލް ޕާސްޕޯޓު މަނާކުރަން ސަރުކާރުން ނިންމާ އިމިގްރޭޝަން ގާނޫނަށް ހުށަހެޅި އިސްލާހު އަދިވެސް އޮތީ ކޮމިޓީ މަރުހަލާގަ އެވެ.

ފަހު 10އަށް މަޖިލީހުގެ ޖަލްސާތައް މެދުކަނޑާލިއިރު، މުޅި ރޯދަ މަހަށް އެއްކޮށް ޖަލްސާތައް ނުބާއްވާ ގޮތަށް ޕީއެންސީގެ ޕީޖީން މީގެ ކުރިން މަސައްކަތް ކުރި އެވެ. އެގޮތަށް ކޮމިޓީން ފާސްކުރި ނަމަވެސް ފަހުން ޕީއެންސީ ޕީޖީގެ ވިސްނުން ބަދަލު ކުރި އެވެ.