އީދު ކުލަގަދަކޮށް ފާހަގަކުރުމަށް އެހީވި ފަރާތްތަކަށް ރައީސް މުއިއްޒުގެ ޝުކުރު

މަރިޔަމް އަނާ

01 އޭޕްރީލް 2025 - 12:07

0 comments

ފިތުރު އީދުގެ ހަރަކާތްތައް އިންތިޒާމްކޮށް ކާމިޔާބު ކަމާއެކު ކުރިއަށް ގެންދިއުމަށް އެހީތެރިވި ފަރާތްތަކަށް ރައީސް ޑރ. މުހައްމަދު މުއިއްޒު ޝުކުރު އަދާކުރައްވައިފި އެވެ.

އީދު ހަވީރުގައި ހިމެނޭ ހަރަކާތްތައް އިންތިޒާމުކޮށްފައިވަނީ އެމްއެންޑީއެފް އާއި ސަރުކާރުގެ ބައެއް އިދާރާތަކާއި ސަރުކާރު ހިއްސާވާ ބައެއް ކުންފުނިތައް ގުޅިގެންނެވެ.

މީސްމީޑިއާގައި ރައީސް ހިއްސާކުރެއްވި ޕޯސްޓެއްގައި ވިދާޅުވީ، 1446 ވަނަ އަހަރުގެ ފިތުރު އީދުގެ މުނާސަބަތު ކުލަގަދަކޮށް ފާހަގަކުރުމުގެ އިންތިޒާމުތައް ކުރައްވައި، ކުޑަކުދިންނާއި އާއިލާތަކަށް އުފާވެރިކަން ގެނެސްދިނުމުގައި ބައިވެރިވި އެންމެހާ ފަރާތްތަކަށް ޝުކުރު އަދާކުރައްވާ ކަމަށެވެ.

އެމަނިކުފާނު ކުރެއްވި ޕޯސްޓުގައި 4 ވުޒާރާއަކާއި، ދިވެހި ފުލުހުންގެ ހިދުމަތުގެ އިތުރުން ސިފައިން ހިމެނެ އެވެ. މީގެ އިތުރުން ޕީއެސްއެމް ހިމެނޭހެން ސަރުކާރު ހިއްސާވާ 10 ކުންފުންޏެއް ހިމެނެއެވެ.

މިއަހަރު ފިތުރު އީދު ފާހަގަކުރުމަށް، ސަރުކާރުން ކޮށްފައިވާ މަސައްކަތްތަކުގެ ތެރޭގައި މުޅި ރާއްޖެ އީދަށް ދިއްލާލުން ހިމެނެ އެވެ. މިމަސައްކަތުގެ ތެރެއިން 64 ރަށެއް ޢީދަށް ވަނީ ދިއްލާލާފަ އެވެ.

ކުޑަކުދިންގެ ހަވީރުގެ ތެރެއިން އެމްއެންޑީއެފްގެ ހަތިޔާރުތައް ދައްކާލައި ފުލުހުންގެ ވެހިކަލްތައް ދައްކާލައި އެ ތަކެއްޗާ އެކު ފޮޓޯ ނެގުމުގެ ފުރުސަތު ވެސް ވަނީ ދީފަ އެވެ.

މީގެ އިތުރުން:

ސަގާފީ ކުޅިވަރުތައް ވެސް ކުރިއަށް ގެންދިޔަ؛ އޭގެ ތެރޭގައި ތިންހަމަ، އަންބަލަން، އޮށްވަޅުގޮނޑި އަދި ފަސްއޮށް ފަދަ ކުޅިވަރުތައް ހިމެނޭ
ކުޑަކުދިން ގަޔާވާނެ ފަދަ ޒަމާނީ ކުޅިވަރުތަކާއި ގޭމުތައް ވެސް ކުރިއަށް ގެންދިޔަ

އީދާ ގުޅުވައިގެން ކުރިއަށްގެންދިޔަ ކުޑަކުދިންގެ ހަވީރުގެ ސްޓޯލުތަކުގައި ކުޑަކުދިން ގަޔާވާނެ ކާޓޫނު ކެރެކްޓާތައް ވެސް ވަނީ ހިމަނައިފަ އެވެ.

އީދު ހަވީރުގައި ހިމެނޭ ހަރަކާތްތައް މިއަދު ހަވީރު 4:00 އިން އިރުއޮއްސި 6:00 އަށް ކުރިއަށްދާނެ އެވެ.