ޚަބަރު
މުސާރަ ކުޑަކުރުމުން އިންތިހާބަށް ނެގި ދަރަނި ނުދެއްކޭނެ: ފަލާހް
ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކޮށްފިނަމަ އިންތިހާބަށް ނެގި ދަރަނި އަދާކުރާނެ ގޮތެއް ނޯންނާނެ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި މަޖިލީހުގެ މެޖޯރިޓީ ލީޑަރު އިބްރާހީމް ފަލާހު ވިދާޅުވެއްޖެ އެވެ.

ރައްޔިތުންގެ މަޖިލިހުގެ މެމްބަރުންނަށް މިހާރު ލިބޭ ކޮމިޓީ އެލަވަންސް އާއި މަތީ ފެންވަރުގެ އިންޝުއަރެންސް ޕެކޭޖްގެ އިތުރުން ކުރީގެ މެމްބަރުންނަށް ލިބޭ އިނާޔަތް ކަނޑާލަން އާންމުންގެ ބަޔަކު ވަނީ ޕެޓިޝަނެއްގައި ސޮއިކުރަން ފަށައިފަ އެވެ. އެ ޕެޓިޝަނާ ގުޅޭ ގޮތުން ލިއުނު ހަބަރަކަށް ރައްދު ދެއްވަމުން ފަލާހު ވަނީ، މި ދައުރުގައި އެ ބަދަލު ގެންނަން އޭނާއަށް ތާއީދުނުކުރެއްވޭ ސަބަބަބު ވިދާޅުވެފަ އެވެ: އިންތިހާބަށް ކުރެއްވި އެތައް މިލިއަން ރުފިިޔާގެ ހޭދަ އެވެ.

"އެތައް މިލިއަން ރުފިޔާ ހަރަދުކޮށް މަޖިލީހަށް ވަންނަ ތަނުން މުސާރަ ކުޑަކޮށްލުމުން އިިންތިހާބަށް ނެގި ދަރަނި އަދާކުރާނެ ގޮތެއް ނޯންނާނެ،" ފަލާހު ލިއުއްވި އެވެ.

މަޖިލިސް މެންބަރުންގެ މުސާރަ ކުޑަކުރަން ސޮއިކުރަމުންދާ ޕެޓިޝަންގައި ކުރީގެ ރައީސުންގެ އިނާޔަތާއި ފަނޑިޔާރުންގެ މުސާރަ ހިމަނަން ފެންނަ ކަމަށްވެސް ފަލާހު ވިދާޅުވި އެވެ.

މަޖިލީހުގެ މެންބަރުންނަށް މުސާރައިގެ ގޮތުގައި މިހާރު ލިބެނީ 62،500 ރުފިޔާއާއި ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާ އެކު ޖުމްލަ 82،500 ރުފިޔާ އެވެ. އެއީ، މެންބަރުން އަމިއްލައަށް ގާނޫނެއްގެ ޒަރިއްޔާއިން ކަނޑައަޅާ މުސާރައެކެވެ.

މިދިޔަ 19 ވަނަ މަޖިލީހުގައި މެންބަރުންނާއި ދައުލަތުގެ ވެރިންގެ މުސާރަ ބޮޑުކުރަން ވެސް މަޝްވަރާކުރި އެވެ. އެކަމަކު، ފާޑުކިޔުން ބޮޑުވުމުން އެ މަސައްކަތް ހުއްޓާލީއެވެ. އޭގެ އިތުރުން ވެސް މެންބަރުންނާއި މެންބަރުންގެ އާއިލާތަކަށް އާސިއާންގެ ގައުމުތަކުން ހިލޭ ބޭސް ކުރެވެ އެވެ.


ކިޔުންތެރިންގެ ޝުއޫރު
0%
0%
0%
0%
0 ކޮމެންޓް
މަގުބޫލު
އެންމެފަސް
އެންމެ ފަސް
އެންމެ މަގުބޫލު